Social Welfare Minister -in Vohbik Kutpui hmanpui

Aizawl | April 27, 2023: District Election Office, Aizawl buatsaih ‘Vohbik Kutpui’ chu vawiin khan AR Lammual-ah hman a ni a; Er. Lalrinawma, Social Welfare Minister chu khuallian niin rualbanlote dawmkanna kawnga thawh hlawk tak Pi Chhingpuii chu khualzahawm a ni.

Vawiin Kutpui lawmna-ah hian khuallian chuan vohbik te hmakhua ngai a, ram rorelna leh khawtlangah dinhmun pawimawh tak chelhtu an nih thu hriattirna tur programme hlu tak buatsaih a ni chu lawmawm a ti hle a. Mizo Kut hrang hrangte angin Vohbik Kut pawh chu kum tina hman thin tura ruahman ni se a ti a, ‘India ramah a te ber atanga a lian ber thlenga hlim taka kan awm hi kan chanvo a ni’ tiin vawiin programme chuan mipui rilruah vohbikte thlir dan ah hmasawnna thar a thlen ngei a beisei thu a sawi.

Minister Er. Lalrinawma chuan vote thlak pawimawhzia sawiin mihring dikna chanvo a ni, a ti a, India chu inthlang ram a ni tiin, khua leh tui kumtling tawhte chuan vote thlak chu mitinte chanvo anih angin, ngaipawimawh turin a ngen a. Sawkar pawhin mi zawng zawng ram rorelna a an tel ve a ngaihpawimawh thu leh chumi atan hma a lak reng thu a sawi bawk.

Khualzahawm Pi Chhingpuii, Rualbanlo te dawmkanna lama thawk thate hnena chawimawina, ‘State Award for the Welfare of Persons with Disabilities’ lo dawng tawh tu pawhin thu sawiin rualbanlo ten inthlanna a vote an thlak ve theihna tur ngaipawimawha Kutpui buatsaih a ni chu lawmawm a ti hle a. Mihring nih chhunga pawimawh em em vote thlak kawngah Vohbik nu leh pa leh chhung te pawh chu tan la a, vote thlakna hmun pan pui hram thin turin a ngen a; mihring zahawm tak Pathian in duh taka a siam, an tu leh fa te, chhungte enkawlna kawngah theihtawp chhuah turin leh an nih tur thleng pha tura kaihruaitu ni theuh turin a chah a ni.

Vawiin hun hi hun thumah then a ni a, chawhma lamah Pu Lalnundika Addl. DC in kawngzawh (rally) khuhhawnna a nei a, Vanapa Hall atangin AR Lammual thleng in kawngzawh neih a ni a. Hun hnihna AR Lammuala a neih hi District Bawrhsap Dr. Lalhriatzuali Ralte, DEO in kaihruaiin, Pu Lalnunfela Chawngthu, Election Officer in lawmthu sawina hun a hmang bawk. Epatha Special School, Shining Star School, Gilead Special School, Special Blind School, Redeem Garden leh Rephedim Home-te atangin zai leh lam, recitation leh items hrang hrang thlir ho niin chawhnuah intihhlimna hun buatsaih a ni bawk a ni.

- DIPR