Aizawl | April 22, 2023: Vawiin khan Dy.Chief Minister Pu Tawnluia chuan Tanhril Setlak rama Urban Development & Povery Alleviation (UD & PA) hnuaia SIPMIU hmalakna 'Augmentation of Water Supply and Construction of 37 MLD Water Treatment Plant' chu a hmunah tlawhin, hnathawh dan hrang hrang leh project dinhmun te enfiahna a nei a ni.
Dy.Chief Minister hi Pu Lalrohthanga, Director, SIPMIU leh official dang ten lo dawngsawng in,SIPMIU Director hian project din hmun tlangpui leh hmalakna kal mek te sawifiahna a nei a .Tun dinhmunah hnathawh zawh tep tawh a nih thu sawiin,tui pump khawl chawmtu tur 33 KV line Sihhmui atanga lo kal tur chu peihfel loh deuh niin,tui pipe phum tur Hunthar -Chanmari West-ah 100 meters vel ala awm thu sawiin, he project hian kum 2033 thleng Aizawl khawpui tui mamawh a phuhru tura ngaih a ni, a ti.
Pu Tawnluia chuan SIPMIU-te hmalakna leh inpekna chu fakawm a tih thu a tarlang a.Tui hi pump theih anih hnuah pawh a sem chhuahna (distribution) lamah uluk taka hmalak zel a ngaih thu sawiin, felfai taka hnathawh zel anih theih nan theihtawp chhuah a ngai dawn a ni, a ti. Reilote ah Aizawl khawpuia cheng ten tui thianghlim tam zawk an dawng thei dawn a,tui harsatna chuan ziaawm lam a pan thuai dawn a,a lawmawm hle a ni, a ti.37 MLD Water Treatment Plant chu Aizawl mipuite nghahfak tak a nih thu a tarlang a,mipuite beisei ang taka tha leh chhawrtlak anih theih nan project khawihtu leh enkawltu SIPMIU leh Contractor-te chu uluk leh tha taka hnathawk chhunzawm zel turin a chah nghal bawk a ni.
37 MLD Water Treatment Plant-hi Aizawl khawpui tana tui thianghlim lakna tur hmun thar niin Aizawl hmar veng hrang hrangte chawm tura duan a ni a. Aizawl Greater Water Supply Scheme Phase I& II aiin a tui pump chhuah theih zat a tam zawk a. Phase I&II hian nitin tui thianghlim litre maktaduai 28 atanga 34 bawr vel a pump chhuak thei a. 37 MLD Water Treatment Plant-hian nitin tui thianghlim litre maktaduai 37 pump chhuak thei tura ruahman a ni. Helai hmun hi peihfel a niha hman theih hunah chuan Aizawl khawpuiin tun aia let hnih a tamin tui thianghlim a hmu thei dawn a, ram pum huapa mi pakhatin nitin tui thianghlim a dawn tur zat bituk litre 135 hmu thei tura duan chu a takin a hlawhtling thei dawn a ni.
Deputy Chief Minister hi Pu Zothantluanga, Vice-Chairman,Man Power Development Board,Pu Liansuama,Sate Planning Board Member leh Pu Lalmalsawma Pachuau, Secretary (UD&PA)- ten an tawiawm a ni.
Pu Tawnluia leh amah tawiawmtute hian thing phunna an nei nghal a,Herhse (Mesua ferrea) Mizoram State Tree-an phun a ni.
- DIPR
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: