LUNGPHUM NGHET TAK I NEIH A NGAI

  _Lei Rem Rap Turin_

By Rick Warren 

— 03/28/2023

“Tlâng liante chu an kal bo vang a, tlâng tete chu sawnin an awm bawk ang; ka ngilneihna erawh hi chu i lak ata a kal bo lo vang a, ka remna thuthlung chu sawnin a awm hek lo vang, LALPA a khawngaihtu che chuan a ti...i lungphûmte chu sapphir lungtein ka rem bawk ang. I chhip zumte chu rubi lungin, i kawngkhârte chu karbankul lungin, i kulh zawng zawng chu lungmawitein ka siam ang." Isaia 54:10-12.

Bible ah hian lungrem rem ṭhatna chungchang hi Isaia 54 ah chauh hian kan hmu a. Babulon lakah Israel hnam chu a tlawm a, salah hruai an ni a. Kum 70 lai an tang a ni. 

Israel fate hnualna chhan chu — an ram tlukchhiatna vang ringawt a ni lova, an khawpui thianghlim, Jerusalem, ngei pawh tihchhiata a awm vang a ni.

Chung zawng zawng karah chuan Pathianin a la theihnghilh lova, an zingah a cheng reng a ni. Anni chu a hmangaih a, an nun leh an ram chu dinthar a duh a ni.

Pathianin Isaia 54:10-12 ah chuan, “Tlâng liante chu an kal bo vang a, tlâng tete chu sawnin an awm bawk ang; ka ngilneihna erawh hi chu i lak ata a kal bo lo vang a, ka remna thuthlung chu sawnin a awm hek lo vang, LALPA a khawngaihtu che chuan a ti...i lungphûmte chu sapphir lungtein ka rem bawk ang. I chhip zumte chu rubi lungin, i kawngkhârte chu karbankul lungin, i kulh zawng zawng chu lungmawitein ka siam ang" a ti.

Pathian chuan an khawpui leh an nun zawng zawng pawh a dinthar dawn a. Mahse a dintharlehnaah chuan a innghahna atan lei emaw lung emaw cement emaw a ni dawn lova. Pathianin Israel chu Sapphir leh Rubi in ka dinthar leh dawn a ti a ni.

Engvangin nge Pathianin Israel innghahna atan lunghlu hman a duh? A chhan chu lungphum dang chu an ṭawihin an ral thei a, sapphir leh rubi te chu chatuana awm tur an ni a. Chuvang chuan to pawh a to hle a ni!

Pathianin Israel lungphum chu khawvela thil hlu ber hmangin phum thar a duh a. Chutikhawp chuan a mite chu a ngaihsakin a hmangaih a ni. 

Joban harsatna lian tak a paltlang lai khan, a ṭhian chuan a chungchang ti hian a sawi a, “Nang chuan i thinlung i dah dik a, A lama kut i phar chuan; I kuta khawlohna a awm chuan dah bo daih la, I puan inah fel lohna cheng suh sela; Tichuan, hmêlhem lovn i dak chhuak ngei ang: A ni, i nghet ang a, i hlau lo vang; I hreawm i theihnghilh ang a, Tui luang bo tawh angin i hre reng ang: I nun chhun chang aiin a en ang. Thim pawh awm se, zing ang a ni ang. Tin, muanawm takin i awm ang, beisei a awm vangin; A ni, i en vêl ang a, muang takin i chawl ang” a ti. Joba 11:13-18.

I nunah danglamna lian tak thlentir i duh chuan lungphum nghet tak i neih angai a ni. Chu lungphum chu nangmah ngaihsaka hmangaihtu Pathianah chauh i hmu ang.

Pathian i en theihna daltu awm zawng zawng chu paihthla la. Chutichuan beiseina neiin, hmalamah huaisenna nen, ni ai pawha eng zawkin ke i pen thei ang.

Ngaihtuah zui atan

* Joban a lo sawi "thinlung dah dik" tih hi engnge awmzia ni le?

* I nun lian taka inthlak danglamna a thlen dawnin engvangin nge lungphum nghet tak i neih a ṭul?

* I nun lungphum chu Pathian a nih hian engtin nge huaisenna a pek che?

*I thinlung chu Pathian lamah i dah dik em?

Pathian nena lendunna atana bul ṭanna hmasa ber chu Isua hi Lal leh Chhandamtua pawm hi a ni a. He ṭawngṭaina hmang hian bulṭan ang che:

“Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*