DANGLAMNA HI DUHTHLANNA ATANGIN A INTAN

 _Lei Rem Rap turin

— Rick Warren 

— Mar 29, 2023

“Thil dang ber aiin i thinlung veng tha rawh, nunna lo chhuahna a ni si a.“ Thufingte 4:23

Bul tan that i duh em ni? Hmun danga pem ka sawi lo. Ka sawi zawka chu i mutanna lam apianga insiamthat a ni. Kawng tam takah bultan tharna i nei ang. Pathianin awm mai mai tura a siam loh vang che a ni. A siamchhan ang tak i nih theih nan a tidanglam zel che a ni.

I dinhmun siamtha tur leh i nunah danglamna thlen turin, i tih tur hmasa ber chu i rilru lam inbuatsaihna hi a ni – nangmah i inhmuh dan te, mi dang i hmuh dan te, a pawimawh berah chuan Pathian i hmuh dan hi a ni. 

I rilru i thlak danglam phawt loh chuan, i awmna leh i chhehvel danglam mah se awmzia a awm chuang lo. A chhan chu, he khawvel kilkhawr berah pawh i awm theia, chutah pawh chuan i rilru chuan a rawn zui zel dawn vang che a ni.

Entirna lo pe lawk ila, rilru thawpikna deuh i nei a, intih thawven nan Hawaii ah kal i tum ta a. Mahse i rilru hahna chuan a rawn zui tho dawn che a chhan chu i taksa awmna apiangah a awm ve zel vang a ni. I rilru thawpikna chu i chinfel hmasak phawt loh chuan khawiah pawh kal mah la a rawn zui zel ang che.

Nun danglamna chu i rilru atangin a intan, a chhan chu i suangtuahna chuan i nun a hruai tlat vang a ni. Thufingte 4:23  chuan, “Thil dang ber aiin i thinlung veng tha rawh, nunna lo chhuahna a ni si a,“ a ti. 

I nuna i thiltih leh i thiltihin a nghawng engkim, i suangtuahna leh rilru sukthlek te hi i ngaihtuahna atanga intan a ni a. I rilru atangin a intan hmasa vek mai! I ngaihtuah hmasak phawt loh chuan, thil a lo thleng ngawt lo a ni.

Chu rilru ngaihtuahna chu thil tha leh tha loah i hmang thei a: Ngaihtuahna dik chuan duhthlanna dik leh thiltih dikah a hruai a; ngaihtuahna tha lo chuan nungchang leh chindan tha lo tak tihnaah a hruai thin.

Hei hi thudik chu a ni, kan thusawi leh thiltih hian vawi tam mahni hlawhtlinna tur kawngah kan indal fo tih hi kan inhrelo a nih chu. Nangma chungchang kha insawi reng ang i ni si a.

Bible chuan, “A suangtuah ang chiah zelin a ni, a awm ni” a ti a ni. Thufingte 23:7.  

Inlaichinna kawnga i harsatna chu inlaichinna atangin a intan lo va. I thluak atang khan a intan hmasa a ni. Hei hi sum leh pai, mipat-hmeihchhiatna, chindawklak, ei leh in, hnathawk leh thil dangah te a dik vek a ni. I nun engkawngah mah i insiam tha thei dawn lo, i ngaituahna i thlak phawt loh chuan.

Danglamna chu duhthlanna atangin a intan a. I ngaihtuah ang apiang chu i thlang thei a ni. Pathianin awm tura a duh che anga duhthlanna siam a hun ta hle a ni. 

Ngaihtuah zui atan

* Rilu thawpikna i neihin i taksa peng eng nge i hrilh hmasak ber? 

* Hun harsa a lo thlen changin engti kawng zawngin nge i rilru chuan i suangtuahna leh thiltih a nghawng nia i hriat?

* I ngaihtuahna i innghawngtir anga mi dang awm ve te ngaihtuah teh. Fing taka duhthlanna siam i tumna kawngah hian engtin nge mi an puih a – mi rilru an tihnat tih zir rawh?

*[Lettu: Sangpuia]*