Upa R. Dengthuama leh R. Dengthuama Hall

Upa R. Dengthuama hi  Pukpui, Lunglei khaw chhuak a ni a, Assam hun laia MLA hmasa kha a ni.  Politician te zingah mahni hma sial lo leh duham ve lo a nihna hi ka rawn tarlan duhna chhan tak chu a ni. Thakthing tlangah in an nei a, 1983/84 vel khan an in hi ka hmu ve a, Ex-MLA ve meuh si chu ka hmuh tum aiin a lo tha lem lova. Assam type a ni a, a chhuat thingphel te kha a ban thenkhat tlakhniam tawh avangin a inhniam hleihin a sawi bei bui mai a. A chung rangva lah a tuiek pawp thluah mai a, ka mitthlain ka la hmu thei hial. A thih khan a vuinaa Politician mi pakhat thusawi ka la hriatreng chu, “Mahni tanghma a hai lo lutuk hi a in leh lo han en hian a lungchhiat thlak zawk a ni,” a ti.


District Council hotuten inhmun rawn dil ve rawh kan lo pe ang che an tih pawhin, “Pakhat ka nei tawh a, a dang ka mamawh love,” a ti  mai a. Mahse a hriat lohvin Pu Zalawma CEM khan  In hmun chu a lo pe a, chu chu Zodin Cinema Hall bula mi hi a ni.

Huan ram a dil ve te kha, a hnai deuh chu mi harsa zawk te tan a kian a, mi nazawng thlen phak loh, khatih lai atan chuan hla tak, Mualpui ramah huan a nei ta daih a. Mahse tun hnuah hian Sorkar hmangin Pathianin a hming a tarlang ve ta thung a. Hla taka a huan ram neih chu a hming tih larna a lo ni ta reng mai a. A ram chu Rajiv Ghandi Studium bul khu a ni a, Sorkarin Motor Parking hmun atan an mamawh avangin an dil a, a hming chawiin “R. Dengthuama Parking” tih a ni a. Mahse a hnu lawkah Hall hmun atan an duh leh tak zawk avangin  “R. Denghuama Hall” hi an sa  zawk ta a ni. Ka hriat danin a hming chawi chung chang hi chhungkuain an nawr vang nilovin, Chief Minister Pu Zoramthanga leh Political hruaitu midangten an rawt a ni awm e.
Phillippi bung 2:5-11 ah chuan Isua Krista chanchin leh a inngaihtlawmna thu a rawn sawi a. Chang 11 ah chuan, “.. Pathianin ani chu nasa takin a chawimawi ve ta thung a, ...”  a tih lai hi Upa R. Dengthuama chan chinah hian rilruah a lo lang tlat mai a. A hun lai khan mi hriat leh chawimawi hlawh lo mahse, Pathian a tihna leh dik taka a thiltihte chu Pathianin a hrereng a, a thih hnuah hetiang hian Pathianin Sorkar hotute hmanruaa hmangin a hming daih loh nan a chawimawi ve ta  ni hian ka hria.
R. Dengthuama Hall hi a lar ta hle mai a, mitin maiin kan hre tawh hial awm e. A hming putu hi tunge, eng ang mi nge a nih la hre lote tan tawite tala han tarlan hi tul riauvin ka hria a. Amah tihtute hi Pathianin a kalsan lova, a hrereng a ni. Pathian thu hi a dik a, a pawm tlak a, innghahna tlak a nih zia hi Upa R. Dengthuama chanchinah hian  a chiang riau a, a hre lote hriat atan ka lo tarlang a ni e.


Thlalak hi a thlan sawn ni Dt 25.01.2018 a mi a ni. A thlan hi Salem vengah a awm a, tlawh tur pawhin mi inchhung luh tlang ngai a ni a, R. Dengthuama Hall thlen dawn kawng peng 2 inkar zing zum laiah a ruh rote sawn a ni.


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post