NUPUI/PASAL NEIH HI

(with special reference on K. Hminga leh a hlate)
- K. Remruatfela


Thalai, kawppui la nei lo, kum 25 chin ni tawhte ngaihtuahna luahtu ber pakhat chu nupui/pasal chungchang hi a ni ngei âwm e. Mahni lamah chuan la inpeih lo viauin inhre hlawm thin mah ila, heti taka thalaite ngaihtuahna a luah thin chhan chu chhungte nawrna avang te leh society in a phûtna vangte pawh a ni thei ngei ang.


Khawvel hmun dang hi chu kan sawi phâk lovah dah ila, kan ram dinhmun bik hi han thlir hian thalaite hian a rûk tak chuan nupaa insiam tak hi chu kan hreh tlâng hle a ni tih hi hai rual a ni lo va, kan ram economy a that tâwk loh vangte leh kan social norms & practices in a zir tâwk loh vangte pawh a ni mahna le. Amah K. Hminga'n a lo sawi fo tawh angin kan tleirawl lai, a bik takin teenager kan nih chhoh lai kha chuan hmangaihna hi a nih takin kan dawngsawnga, kan ngaihzawngte kha an nih ang angin kan pawm a, kan hmangaih bur a, tun hnua ka ngaihtuah let hian khâng hunlai hmangaihna kha a van lo pure tak em ka ti rilru fo thin!

Kum 25 ral han pelh chunah erawh hmangaihna hi nasa taka thlitfim a lo ni tawh thin a. Engkim hi criteria vekin a khat tawh a, tehfung a tam tawh em thin avangin hmangaihna hi pawlh dalin a awm zo tawh thin a ni. Mahse, hei hi dem ngawt theih chu a ni si lo! Mi nung pahnih, mi nung pakhat ni tura belhbawm hi a thûk em avangin chutiang meuh puitlin tur chuan ngaihtuahnain kil tin a dap a ngai a, second thought mai ni lova, eleven thougt thlenga ngaihtuahna sên a tul châng te hi a awm thin. In dem ngawt theih a ni hauh lo!

Tun dinhnunah kan society in a hri vei tha lo tak chu Pathianin a zawm tawh mihringin kan then fo thin hi a ni kan ti thei ang. A mak asin! Kan hnain a ken tel a ni bawk a, ni tin zan tin mai hian nupa kawpchawi hlim tak ni-a kan lo râl khat hriat thinte hian an nupa nuna khi leh chat lek lek awmte hi insum zo tawh lovin kan bulah an inrawn inbunruak hawk hawk thin a. An thusawi tam ber chu kan inngaihzawn laia a fel thin tehreng nen, engkim kha a lem vek a lo ni a, ka dawh thei tawh thlâwt lo a ni; society laka ka chan tur zawng zawng hre lâwk vek mah ila inthiarfihlim mai hi a tha zâwkin ka hria tihte a ni nawk thin a. Hetianga thu lungchhiatthlâk lam han ngaihthlak fo hi chuan nupui/pasal neih hi hreh tak tea hreh mai te hi a awl rum rum thin.

Nimahsela, hetiang hunah pawh hian K. Hminga hla "Duhaisam" hi rilruah a lo lamg leh thin a. Ngun taka ka ngaihtuah hian nupa inthen kan lo awm leh fo thin chhan hi chu kan duhaisam tak kan tawn loh thin vâng hi niin ka hria. Amah K. Hminga'n "Ka duhaisam ve chu, ka duhaisam ve chu, a tlin lohna ka hmuh hnu pawha ka thinlung hneh tlattu" a lo tih angin an tlin lohna zawng zawng kan hmuh hnu pawha kan la theihngilh theih tlat loh, kan duhthusama tha, mi perfect an ni lo tih pawh kan hriatchian em em, mahse, kan mit an tlin tâwk lohna leh an that tâwk lohna kan hriat tam poh hnu pawha kan duhna la tizual ting, kan thinlung la luah tlattu te hi kan tawng a nih ngat chuan hmangaihna hian chatuan a daih hi ka ring tlat thin a, ka ring sual ang em chu ka hre lova, mahse, ka rin sual rin lohna thûk tak erawh ka nei. Ka thinlungah hian a fiah a ni.

Heng zawng zawngah hian a pawimawh ber chu inhriatthiam tawnna hi a ni ka ti lo thei lo. Inhriatthiam tawnna in hmun laili a chan tawh chinah chuan hmangaihna vangin engkim kan inhaider sak tawn tawh thin a. Nupa zinkawng hi "Bed of Roses" ni reng tura kan ngaih a, kan nupui/pasalte kha kan duh dan ang diak diak ni lova an lo khawsak vanga min bum a ni, ka rin ang a lo ni hauh lo tih ang zawnga kan lo dawngsawng thin a nih vaih chuan amah K. Hminga vêkin "Kawp rem lo tura duan" a lo tih ang dinhmun kha kan nun nen hmeh bel vat a awl thin ngawt ang. Kei chuan ka duhaisam ve chu a tlin lohna zawng zawng chiang taka ka hmuh vek hnu pawh a, ka thinlung la hneh tlattu, chu thiltihtheihna neitu chu a ni ka duhaisam ve chu.






(Khawngaihin, i lo share darh ve ngei dawn nia aw!)
 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(He website kal zel theih nan hian fakna lo langte hi i lo hmet ve thin dawn nia.)


Post a Comment

He post chungchanga i ngaihdan lo sawi ve rawh:

Previous Post Next Post