MZP-in dan lova hnam dang khawsate dap chhuak

Aizawl | Feb 4, 2023: MZP General Headquarters  bultumin vawiin khan Aizawl khawpui kawn hrang hrangah hnam dang dan lova khawsa dapchhuah hnatlang neiin, Inner Line Permit (ILP) nei lo mi sawmthum pasarih (37) chuang bakah kumtling lo hnathawka chhawr thahnem tak an hmuhchhuak a, thuneitute kutah an hlan nghal a ni.

Sorkar leh thuneitute pawhin theihtawp chhuaha hma an lak mek lai a, Ni khat hnatlanna a hnam dang permit nei lova khawsa leh dan lova sumdawng thahnem tak man chhuah tur an awm hi MZP chuan pawi an ti hle a, heng hnam dang dan lova khawsate hi permit neilo bakah permit dam hun chhung zo tawh te annih hlawm thu MZP chuan vawiin khan thuchhuh siamin a tarlang.

MZP chuan, India danpuiin a bik taka min humhalhna dan Inner Line Permit (ILP) hi a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute a ngen nawn leh a. Mizoram chhunga Veng/Khua Local Council/Village Council thuneitu zawng zawngte, hnam dang ILP issue chungchangah document felfai lo chu hriatpuina lehkha pechhuak tawh lo turin a ngen bawk a ni. 

Dan lova hnam dang khawsate dapchhuah hnatlangah hian MZP hruaitute bakah College hrang hrang Students Union(SU) hruaitute leh Hnampual Zirlai Pawl hrang hrang hruaitu mi thahnem tak an thawkchhuak a ni.

MZP chuan hnam dang dan lova khawsa a hmuhchhuah te chinchang chu ngun takin a enzuiin, thawnkir (push back) an nih dan pawh a enzui dawn niin an thuchhuah chuan a tarlang.

MZP chuan Mizoram chhung a dan lova hnam dang sumdawng te dapchhuakin a tul angin hma lak zel a tum a, hnam dang dan lova Sumdawng te dapchhuah kawngah hian MZP chuan Zoram mipuite thlawpna a ngen bawk a ni.

.