MIZO MIPA KAN VA HEK TAK EM! - II

(Kum 2021-ah CKṬP member thi 456, mipa 386 leh hmeichhia 70)

~ Zoa Tlau, 23.2.2023, (01:05 am)

Thufingte 22:3-4 "Mi hmanghria chuan thil ṭha lo chu a hmuhin a biru ṭhin a; Mi mawl erawh chuan a tawn mai ṭhin a, a tuar phah ṭhin. Inngaihtlâwmna leh LALPA ṭih man chu Sum te, chawimawina te, nunna te a ni."

Central KTP-in an member thi an chhinchhuah dan

Nimin lama Mizo mipa thih nasatzia leh mipa hek viau thu kan thailan khan sawizui a hlawh deuh a, mipa ṭhenkhat aṭanga ngaihdan lai tak taka chhutzuina 'comment' te a ngaihnawm hle mai. Mizo mipa hian kan dinhmun hi kan inpawm a ngai a, kan inpawm duh lo ṭhin hian sawtna a nei lo a. 

Nimin lamah MṬKP 'data' kan en tawh a. Central KṬP lam 'data' hi han thlir ve leh ila, kum 2013 aṭanga 2021 thleng khan mipa thih tamna 'percentage' hian 80% a pel vek mai. Kum 2021-ah CKṬP chhinchhiahna a lan danin member 456 an thi a, mipa 386 thiin, hmeichhia 70 an thi thung. Mipa thi zat 'percentage' hi kum 2021-ah ngei pawh hian 84.64% lai a ni a, kum 2013 leh 2021 inkara CKṬP member mipa thi 'percentage' san ber ṭum hi kum 2018 niin, 91.08% a tling hial mai.

Hmeichhe ṭhenkhatin hnamdang pasal an neihin kan na leh si a, 'hnam phatsanna' tiin nasa takin kan dem a, kan inenfiah a hun ta. Pa Pathian duhzawng ni lo, kan taksa chhiatna leh boralna thlentu lama kan tlan tam zawh poh leh; Mizo hnam hi kan phatsan a ni tih mipate hian kan pawm a hun a ni. Kan hnam a lo ral a, hmeichhia ten neih ngam loh emaw, neih tlak loha min ngaiha min chhuanlam pawhin, thinur mai lovin a chhan bulpui pakhat (factor) kan nihna pawm a ṭul ang.

Tunlai khawvelah ngat phei chuan Mizo hmeichhiate hian thawh hreh an nei lo a, chhungkaw eibel an ni ta zung zung bawk. Sa sat, sumdawng thlengin hmeichhia hian hmun lailum an luah zo a, mipate kan awm awl hlauh thung. Kan hunawl ngah avang hian zu leh ruihhlo sualna dangah kan tlan ta ṭhin. Ṭhalaiah pawh hmeichhe lamin nasa taka zirna an beih laiin, mipa tam zawkte erawhin ruihna lam kan pan nasa tual tual mai si.

Bible chang kan tarlanin 'hmanghria' a tihte hi Pathian ṭihtu leh a thu zawmtu an ni a, hei hi kan tlâkchham tak êm êm chu a ni mai awm asin! Hei vang hian Mizo mipate hi Lalpa lamah i let leh ila, Pa lawm (gladly father) i siam ang u. Kan in, kan hnam, kan chhungkua maicham chhawm nung turin mipa hian harhna kan mamawh a ni.

Thufingte 10:1 "Solomona thufing Fapa fingin pa lawm a siam a, Fapa â erawh chu nu rihna ni."

Kan ban phaka awm kawng dik leh ṭha zawh mai loa a diklo lam kan 'tawn' ṭhin avang hian hnam boral mêk chu kan ni ta. Hei hi kan vei zual a ngai tawh a, hmeichhiain an sawi lahin kan hua a, 'feminist' te kan ti thul. Mipa ngei hi nasa takin kan auchhuah a hun tawh a ni.

Hnam boral zia hmuh theih leh langsâr taka Mizo mipa zinga a lo lan mêk lai hian, insiamṭhat kan ngai tih hi pawm ngam ila. Khawvel thila kan tlan luatah chhuan lo la kal zel turte tan hmuh kan hnawhping thei.

Thlarau leh nun chawmtu Krista taksa kan Kohhrante inrelbawl danah pawh hian khawvel thila tlânna 'materialism' lam hian hmun a luah nasa ta mah mah em? Thawhlâwm ṭhahnemngaihna, fund hrang hrang, sumtuakna, 'building' ropui leh adangte. Inennawnna tur kan ngah ta khawp mai.

Bible-ah ngei hian thlahtu hrang hrang kan enin hnam a lo indinna chu 'mipain a hring a' tih a ni zêl mai. Mipa hi hnam kengtu, hmeichhe lu kan nih si chuan Krista hnung kan zui a ngai a, Krista lu chu Pa Pathian a ni si. Kan khawtlang natna hi; Pathian hnena kîr lehna te, simna leh inchhirna telin kan tuam dam a ngai tawh ang.

I hun tithianghlim la, Lalpa pawl fo rawh

Phuahtu: Suakropuia

I hun tithianghlim la, Lalpa pawl fo rawh,

Amah chu kumkhuain ring tlat zel ang che;

Pathian fate thian la, chak lo tanpuiin,

Ama malsawmna chu i lo chan theih nan.

HNAM ROPUI NI TUR TLUKCHHIATNA LAKA KAN HIM NAN LALPA LAM HAWI ILA; MIPA KAN NIH ANGIN KRISTA KAN LU NI TLAT RAWH SE.

Lalpa a ṭha. 🙏💜🙏

(Khawngaihin, i lo share darh ve ngei dawn nia aw!)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(He website kal zel theih nan hian fakna lo langte hi i lo hmet ve thin dawn nia.)