Leisenzo-ah Alu chi semchhuak; Alu chingtute zirtirna pe

Champhai | Feb 23, 2023: Fostering Climate Resilient Upland Farming System in the North-East (FOCUS) kaltlangin vawiin chawhma dar 11 khan Leisenzo khuaa Farmer Interest Group (FIG) te hnenah District Bawrhsap Pu James Lalrinchhana chuan Alu chi a sem chhuak a, Alu chingtute zirtirna pek an ni bawk.


Bawrhsap Pu James Lalrinchhana chuan FOCUS kaltlanga Alu chi sem chhuah a nih theih nana FOCUS hnuaia thawktute hmalakna leh Leisenzo khawtlangte tanrualna fakawm a tih thu a sawi a. Alu chi dawng turte duhsakna hlanin, a chi sem chhuah chu hmalak bultan nana hmanga, nakin zela chin tur leh a chi intodelh nana hmang thei tura theihtawp chhuah turin a fuih a. Alu chingtu leh hmalak tum kalkhawmte chu rilru leh tum nei rana awm tura fuihin, an kawtkaiah ngei Alu chi pek an nih tawh avangin an kutah mawhphurhna leh a hlawhtlinna thui tak a innghah tlat thu a sawi a. Mithiamte zirtirna leh thahnemngaihpuinate ngai pawimawha chhinchhiah reng tur leh zawm fo turin a chah a. Nakin lawka Alu thar chhuah kawnga hmingtha leh midangte tih hmuhtu nih tum tura chahin, an hmalakna turah duhsakna a hlan a ni.


He hun Leisenzo Community Hall-a hman hi Pu MS Dawngliana, District Project Manager, FOCUS, Champhai District chuan kaihruaiin kalkhawmte lawmna thu a sawi a. Pu K.Ngaihthanga, VCP Leisenzo pawhin thu sawiin, khawtlng ram neih dan, dinhmun leh hmalaknate District Bawrhsap hnena an thlen ataka bawhzui a ni leh tih puitlin a nih avangin khawtlang aiawhin lawmthu a sawi a ni.

He hunah hian Pu Lalnunpuia, Technical Officer (Agri), FOCUS Champhai chuan kalkhawmte Alu chin dan chungchang a zirtir a. Alu chi sem chhuah chu natna, sik leh sa hrang hrang laka dam khawchhuak thei tura duan chhuah, tlangram mil tur Kufri Jyoti variety a nih thu a sawi a. Alu chi sawngbawl dante a taka entirna neih a ni nghal bawk.


Alu chi hi Leisenzo khuaa FIG 10 hnuaia chhungkua 129 te hnenah sem chhuah niin, avaiin quintal 75 (bag 170) bawr vel sem chhuah a ni a, ruahman dan chuan February-March thla chho hian chin tur a ni. Tun dinhmunah hian Champhai District chhunga khua 60 ah FOCUS hnuaia inziaklut FIG 629 an awm mek a ni.

Hun hman zawh hnu hian District Bawrhsap Pu James Lalrinchhana chuan MNREGA kaltlanga Leisenzo Field laih zau hna thawh mek, Apple Farm chuanchung Link Road siam leh Farmer Rest Shed sakte bakah Anganwadi Centre leh Fair Price Shop-te tlawhin hmalak dante a enfiah a. Kumina Alu chinna tura Leisenzo khawtlangin an ruahman Dampui ram pawh a tlawh nghal bawk.
- DIPR



(Khawngaihin, i lo share darh ve ngei dawn nia aw!)
 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(He website kal zel theih nan hian fakna lo langte hi i lo hmet ve thin dawn nia.)

Post a Comment

He post chungchanga i ngaihdan lo sawi ve rawh:

Previous Post Next Post