ATM BOOT BOMB CHHETU KHA

- ZR. Lalthlanmawia


Zanin 23th. Jan. 2023. Chanchinthara Republic veng Kawipui bula ATM Boot bomb chhetu nia rin chu man a nih thu leh a thlalakte nena tarlangin, Social Media lamah pawh darh ta chuaih chuaih kha heti zawng hian ka ngaihtuahnaah a lo lut daih mai a. 

He tlangval hi a hmel ka en vang vanga, chuta ka hmuh chu, misual leh mi awmherh chi hrim hrim a ni lo tih ka hmu thei a ni. He ATM Boot a bomb chhiat chhan nia an sawi, STATE BANK OF INDIA-ah Loan a dila, mahse a loan dil chuan a rilru lamah beidawnna bak a pe lo tih a chiang hle bawk. Tichuan, an hma lam hun atan an khawsak dinhmun siamrem ve nana loan puk a dil chu, a tan vana rah ang chauh a ni ta si a. A dil ang loan a hmu a nih chuan tia a lo suangtuah leh an dinhmun chhe lutuk te pawh a lo kanghlan ve na tur nia a ngaihtuahnaa a lo inruahmannte chuan thinrimna leh pawisak neih lohnaah a hnuk lut ta zawk tih pawh a chiang khawp, hei hian kan ramah mi rethei leh hausa dinhmun inkar hlat zia a ti chiang hle kan ti thei bawk ang. 

He tlangval hmel fel tak, Police ten an man hnua a hmel en pawha zamna hmel emaw, inchhirna hmel leh a thil tiah pawi tihna hmel leh tlanchhe hmel hmuh tur awm miah lo hian, hmana Israel Prime Minister Yitzak Rabin kap hlumtu Juda tlangval B.A. zirlai kha min hriat chhuah tir daih mai le. Kha Israel PM khan an ram chu Palestne hnenah pek tumin inbiakna an kalpui meka, an thutlukna ngaichangin Israel ram mipui chuan beng an chhi ṭhuap mai a. Chhun chawlh an neih lai takin kha Juda tlangval khan an Prime Minister chu a chengrang hmangin a sai ta pawp mai a nih kha. Chutah a mah chu tlanchhiat a hnekin Police kutah a inpe a, engvanga an PM chu that nge a nih an han zawt mai a le, a ni chuan Pathianin a tih tir a ni tiin a chhang hmiah bawk, a zawttu Police te kha an zak zawk hial ta ve ang. 

Mi retheite retheihna hian kan ramah hian eng ang thil nge a la rawn hrin chhuah dawn hriat a ni ta lo tawp mai. Sawrkar in mipui Sawrkar a ni tih in hre map lovin, Minister leh MLA ten nuam an tawla, an party mi leh sa ni ve lote tan beisei tur a awm lo va, mipui Sawrkar ni lovin Party Sawrkarin an party ni ve lote min awp bet tlawk tlawk a nih hi. Tun ang renga kan kal chho zel a nih ngat chuan, kan ramah hian ngaihsaktu leh duhsaktu nei ve lo mi retheite hian  pawisak kan nei tlem tawh tih hi, hriatna tura beng nei chuan hre mawlh rawh se.



(Khawngaihin, i lo share darh ve ngei dawn nia aw!)
 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(He website kal zel theih nan hian fakna lo langte hi i lo hmet ve thin dawn nia.)

Post a Comment

He post chungchanga i ngaihdan lo sawi ve rawh:

Previous Post Next Post