State Level Committee on Standardisation thukhawm; zirna in hrang hranga Student Clubs on Quality and Safety din chungchang sawiho

Aizawl | Jan 17, 2023: Vawiin khan Secretariat Conference Hall, MINECO-ah State Level Committee on Standardisation (SLCS) chu a vawi khatnan an Chairman Dr Renu Sharma, Chief Secretary hovin an thukhawm a, he hunah hian Commerce & Industries Principal Secretary Pi Esther Lalruatkimi, FCS&CA Secretary Pi Ramdinliani te bakah Bureau of Indian Standards hotute an tel a, Legal Metrology, PHE, PWD, P&E, MPCB, ITI, NEIDA, MCC, MCU leh Mizoram Industries Association aiawhte an tel a ni.


Meeting kaihruaitu Dr Renu Sharma chuan Bureau of Indian Standards (BIS) chu mipuiten kawng hrang hranga service an dawnah a tha leh rintlak, an tana him bawk si an dawn theihna tura hmalatu pawimawh tak an ni tih sawiin quality control atana BIS in inkaihruaina leh zawm tura duante chu mipuite pawhin kan tana tha tur a ni tih an hriat a, an zawm a pawimawh rualin Mizoram sawrkar pawhin kan ngaih pawimawh a ngai a, product tha leh rintlak bakah mipuite himna kan ngaihtuah ve a tul takzet a, sawrkar hnuaia bungrua leh hmanraw supply chungchangah pawh a theih chin chinah BIS inkaihruaina kan zawm a tul a ni a ti.

Vawiin meetingah hian Mizoram sawrkarin kum 2020-a a lo din tawh Standardisation Cell chu India ramah a din hmasa ber pawl an nih thu BIS hotute chuan sawiin, entawntlak an nih thu an tarlang a, he Cell hian chak lehzuala hma a lak chhunzawm theih dan turte sawiho a ni a. sawrkar, Industry hrang hrangte leh BIS thlunzawmtu a nih avanga a pawimawhzia tarlan a ni bawk.


Meetingah hian State sawrkar official ten Standards mumal taka ruahman bakah mumal taka kalpui, a tangkaina enzui leh mipuiten an chhawr tangkai theihna tur atana hma an lak dan tur kawnga chetlak dan turte sawiho a ni a, tui connection nei ten BIS quality mil tui thianghlim in tur an dawn ziah dan tur chungchangte, ISI chhinchhiahna tel lo tui intur zawrhchhuah a nih lohna tura hmalak dan turte,ISI chhinchhiahna tel helmet chauh hralhchhuah a nih theihna tura hmalak dan turte sawiho niin, Mizoram sawrkarin hma a lo lak tawh dante tarlan a ni bawk.

A chunga tarlan bakah khian rangkachak, tlereuh dangte leh thil hlu dangte a dik leh dik loh chhinchhiah (Hallmarking of gold jewellery and artifacts) chungchangte, BIS management System Certification Scheme kalpui dan tur chungchangte, India Standards mipuite hriatthiam tura inzirtirna kalpui chungchangte, Sawrkar laipuiin Quality Control Order a tihchhuah a taka kalpui chungchangte sawiho niin zirna in hrang hranga Student Clubs on Quality and Safety din chungchangte sawiho a ni.

BIS hotute chuan “BIS CARE” mobile application an siam thu sawiin he mobile application hi playstore atangin download theih a ni a, he mobile app kaltlang hian kan thil lei chi hrang hrang - rangkachak, helmet, tui intur (bottle), mobile phone etc te chu himna kawngah India Standards mil a nih leh nih loh a endik theih tih an sawi bawk a ni.

Meeting zawh veleh hian Legal Metrology Controller Dr Andrew H. Vanlaldika hovin Legal Metrology leh Bureau of Indian Standards hotute an inhmukhawm nghal a, thil pawimawh tak tak an sawiho zinga insakna bungrua leh hmanrua chi hrang hrang him leh him loh chungchangte an sawi a, a tul anga endik hna thawh dan turte sawiho niin iron rod pawh BIS in a bituk aia te Mizoramah a rawn lut nasa nia hriat a nih thu an sawi a, hei hi vawiin chawhnu hian Legal Metrology Controller hovin an endik nghal dawn a, a tul angin sawrkarin thupek a tichhuak zui bawk ang.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post