MIZORAM KOHHRAN HRANG HRANG TEN INZAWMKHAWM DAN TUR AN NGAIHTUAH

  - Vanneihthanga

25.1.2023 (MSR) : Nimin chawhma dar 10:30 khan Mizoram Kohhran Hrang Hrang hruaitu te'n Kohhran inzawmkhawm dan tur ngaihtuahin inrawnkhawmna hun an hmang a, Mizoram Kohhran hrang hrangte inthlunzawmna 'church council' din dan turte an sawiho.

Tun tum Kohhran hruaitute inrawnkhawmna hi Mizoram Baptist Kohhranin thlengin Sap Upa leh Pu Buanga Hall, Headquarters Office, Serkawn-ah neih a ni a. Rev. Dr. C. Chawnghmingliana, Synod Moderator, Mizoram Presbyterian Church chuan a kaihruai a, Rev. R. Lalbiakliana, General Secretary, Mizoram Baptist Kohhran-in, kohhran hruaitu kalkhawmte lawmna leh chibaibukna hun a hmang a. He hunah hian Presbyterian Church of India, Mizoram Synod (PCI), Evangelical Church of Maraland (ECM), Baptist Church of Mizoram (BCM), The Salvation Army, Lairam Isua Krista Baptist Kohhran (LIKBK) aiawh kohhran hruaitu mi paruk(6) theuh an tel a ni.

He inrawnkhawmnaah hian Kohhran inpumkhatna tur atana thil pawimawh hrang hrang sawiho nghal a ni a, a langsar zual zingah inpumkhatna pawl hming tur chungchangte, eng chinah nge inzawmkhawm a, inpumkhatna kalpui tur tihte, a umzuitu tur Committee din chungchangte an sawiho a, Church Council din tha an ti a, a ruangam lo duang turin Drafting Committee din nghal a ni. Heng sawihona leh ruahmannate hi Kohhran hrang hrangte hian an rorelna sang berah thlen leh tur a ni.

Hetianga Kohhran Hruaitute inrawnkhawmna hi Mizoram Synod Inkhawmpui 2015 in, Kohhran Inpumkhatna a lo rel tawhte, Mizoram Baptist Kohhran Assembly 2021 in “Mizorama Kohhran hrang hrangte inpumkhatna leh thawhhona tha neih zel theih nan ‘Council of Churches in Mizoram’” din a lo rel tawhte leh kohhran pawl dangte pawhin Mizorama kohhran hrang hrangte inzawmkhawm dan, an lo ngaihtuah fo tawh thin, bawhzuina kal zel a ni.