Manipur Governor-in Unau Suopui Cultural Festival 2023 ropui takin a hawng

PARBUNG | Jan 13, 2023: 'Unau Suopui Cultural Festival 2023' chu zani January 12, 2023 khan Manipur Governor- La. Ganesan-in Parbung Khêlmuol-ah ropui takin a hawng.

Hun hmasa tieng Khuollien, Manipur Governor- Shri La. Ganesan-in Unau Suopui Cultural Festival Balloon inthlasuokna a nei a, 'Suopui Lung' a hawng zoin Suopui Dâr vuokna hunser hmang a nih. Hi huna hin Manipur Governor-in Suopui Festival Souvenir 'COMMONS' ti lekhabu a tlângzar.




Hi huna Khuollien Manipur Governor, Shri. La. Ganesan-in thu a hrilnaa chun, "Unau Suopui Cultural Festival a hmun ngêia hmang theia a um chu lâwmum a ti thu a hril a. Suopui Festival hin Unau Suopui hnam hran hran hai lai inthuruolna le inpumkhatna intlun mawl sien, tiin a ditsakna thu a'n hlân a, Suopui Dâr hi a vawtu hnam hran hran ni inla khawm, a ri suok ruok chu chi khat chau a ni a, chu ang chun Unau Suopui hnam chi hrang hrang hai hmun tin le ramtin-ah lo chêng ta inla khawm, Dâr ri hin unau/pumkhat in nizie a suklang a nih tiin a hril a, ama ngêi khawm Tamil Nadu-a tribal hnam laia mi a ni thu hrilin, Unau Suopui hnam lâi mi zêl lût ve ro, tiin a hril.

Thu a hril peinaa chun, Pherzawl district sûnga sawrkar school le Sawrkâr department hran hran hai sukhmasâwn dingin Sawrkârin hmâ a lâk pei ding thu a hril. In umna leilung a mâwi ang bawkin in hnam thuom le lâm hai khawm a mawi hle. Pherzawl District hi hung ka nuomna a sawt ta a, tuta ṭum Suopui Festival leiin ka hmu nuom em em Pherzawl district ka hung hmu thei leiin program huoihawttu hai chungah lawmthu ka hril a. Pherzawl district  sukchangtlung hi ngaipawimaw a um hle in ka hriet a, chu ding chun hma ei lâk tlâng pei ding a nih ti'n a hril. Pherzawl District a hin Hospital khawm a um, amiruokchu infrastructure le staff  Hospital in a mamaw hai a um mumal naw hi pawi ka ti hle a, ṭha taka a um theina dingin sawrkar tieng hmâ lak ning a tih tiin a hril a. Lampui khawm motor inpêl thei mumal loa a um hi pawi ka tia suklien dingin hma lâk ning a tih tiin a hril. Education chungchang khawm hrilsa in, vâwisuna National Anthem saktu school naupang hai lâwm an um hle lai zingin Pherzawl District sûngah Novadaya school le a dang dang hai a um naw chu a ngaipawimaw hle thu a hril a. Pherzawl District-ah Sub Division pahni a um a, vawisûn pakhat-ah ka hung thei hi ka lâwm hle a, thla 6 sûngin Sub-Division pakhat lem (Vangai Sub Division)-ah hung nâwk ka tih tiin a hril.

Suopui Festival a ni khatna hmanga um a hin Functional President-in, Dr. L. Fimate, Chairman, Core Committee a ṭhang a, Chief Host-in Pu Haulianlal Guite IAS, Deputy Commissioner, Pherzawl District a ṭhang a, Guest of Honour-in Pu Richard Lalṭanpuia, General Secretary, Hmar Inpui le Pu Elmuonvel Buongpui, President, Hmar Inpui, Hmarram Region, Manipur hai an ṭhang.

Hun hmangna hi Mr. John L. Varte le Ms. Grace Buhril ha'n hne takin an keiṭhuoi a, Rev. L.K. Thanga, Chairman, Hmarram Kohran Inzawmkhâwm (HKI)-in ṭawngṭaiin hun a hawng a, hun hawngna hla 'Vawisûn Suotlanga' Suopui Choir ha'n an sak zoin, Unau Suopui Cultural Festival Core Committee Chairman- Dr. L. Fimate-in lâwm lûtna thucha a hril a. Hi hunsera hin Suopui hnam hrang hrang- Manipur, Assam, Tripura, Delhi le Mizoram a'nthawka hung khâwm ha'n greetings hrilin hun an hmang.

Suopui Festival-a hin Suopui Cultural Troupe ha'n Hnam Lâm hai chi tin chi tang an pholang a, mipui mit a tlei hle. Suopui hnam hrang hrang ha'n an pi-le-pu hla hai an sak a. Lâwm thu hrilna hun, Dr. David Buhril, Secretary, Core Committee-in a nei zoin hun khatna khâr a nih.

Hun hnina dâr 2:30 PM in hmang nâwk a ni a, hi huna hin Guest of Honour-in Pi Thangṭhatling, Social Worker a ṭhang a, Chief Host-in Pu Rothanglien Khawbung, President, HSA GHQ a ṭhang. Hun hawngna hla Nk. Mercy Lalumpui-in a sak a, chuonglai zing chun Hmar Cultural Warrior ha'n items en nuom um tak tak el an pholang. Keynote Address Dr. Immanuel Zarzosang Varte, Asst. Secy., Core Committee-in a hril a, Pu R.T. Akhel, President, Aimol Tribe-in thu hrilna hun a hmang a, Unau Suopui hnam hrang hrang ha'n an hnâm lâm hai an pholang.

Hun thumna zân program-ah Dr. Bosco Jaiche Ph.D, Kharam Tribe, Manipur, Mr. Reuben Ranglong, President, Namlusi, Tripura le Special Invitee- Dr. Vanlallien Pulamte, President, HNU, Assam hai a'nthawkin thu hril ngaithlâk a ni a, Unau Suopui hnam sûnga Artiste hai le Sinlung Express Band ha'n hla'n mipui an inâwi. Unau Suopui Cultural Festival a ni hnina, January 13, 2023 hin Ruonglevaisuo ṭieupho-ah hmang nâwk ni'ng a tih.

- Virthli.in



...


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)


Post a Comment

He post chungchanga i ngaihdan lo sawi ve rawh:

Previous Post Next Post