Larsap-in National Voters’ Day, 2023 puala inkhawm hmanpui

Aizawl | Jan 15, 2023: Vawiin khan Assembly Conference Hall-ah Office of Chief Electoral Officer, Mizoram chuan National Voters’ Day vawi - 13-na puala inkhawm a buatsaih a. He hun hi Governor Hari Babu Kambhampati chuan khuallian niin a hmanpui a ni. Kumin National Voters’ Day ah hian thupui atan, ‘Nothing like voting, I vote for sure’ ( Vote thlak hi a pawimawh takzet a; vote thlak ngei ka tum) tih hman a ni.



Governor Hari Babu Kambhampati chuan NVD 2023 puala thuchah sawiin he hun pawimawh takah a tel thei chu lawmawm a tih thu a sawi hmasa a. Inthlan Mizoramin a lo hmachhawn tawhah te kha hlawhtlinna langsar tak a awm a, kan hlawhtlinna te hi state dang te entawn mek a ni a, a chhuanawm hle a ni a ti.

Political party te leh mipui vantlang te thuawihna leh inthlan thianghlim kalpui tha tih leh ngaihhlutna avangin boruak muang tak hnuaiah inthlanpui thianghlim taka neih a ni thin a ti. He hlawhtlinna chungchangah hian a bik takin Mizoram People’s Forum (MPF) leh Young Mizo Association (YMA) te an thawh hlawk tak zet tih a sawi bawk a. January 1, 2023 qualifying date atana hmanga Summary Revision of Photo Electoral Rolls pawh tha takin January 13, 2023 khan tlangzarh a nih thu a sawi a. He Summary Revision atana theihtawp chhuahtu zawng zawng, a bikin District Election Officer, staff leh an thawhpuite chungah lawmthu a sawi a ni.

Governor chuan tunhnaiah ECI in mitin ten awlsam taka Vote an thlak theih theih nan leh vote nei thei tura an awlsam taka an inziahluh na turin hmalakna pawimawh tak tak neih a ni tih a sawi a. Taksa lam leh thildang avanga vote thlak chungchanga harsatna nei thin, a bikin Persona with Disabilities (PwDs) te tan vote an thlak theih na turin kawng hrang hrangin ruahmanna siam tawh a ni a, a tul anga siam belh mek zel a ni a ti.

Dr Hari Babu Kambhampati chuan Election Department, Mizoram ten voter zinga mit lama harsatna nei(visually impaired voters) te tan Braille Epic Cards a siam thar chu a lawmawm takzet a ti a. Hei hian phurna leh awlsama a Siam dawn a, vote thlak pawh a tih pun ngei a rinawm a ti. Mizoramah Inthlanpui thianghlim takin kalpui thin a ni a, hei hi a ropui a, kan chhunzawm zel tur a ni tiin Mipuite chu kan hmaa inthlanpui Kan hmachhawn turah pawh phur taka Vote thlak theih turin a sawm a ni. Governor chuan voter ten Inthlanpui to hlawhtling turin mawhphurhna pawimawh tak Kan nei a; van vote hlu tak hmangin ram kalsiam a tha zawnga her rem turin mi tha nia Kan hriat te kan ai aiawh a rorel turin kan thlang thei a. ECI in kan tana awlsamna tura ruahmanna a siam te leh khawl thar a hman te hi ngaih tha taka kan pawm a, kan zawm tlan a ngai a ni a ti. Governor chuan ka hmaa inthlanpui lo awm turah pawh phur taka Vote thlak theih turin voter zawng zawng te a sawm bawk. Full speech of Governor: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-national-voters-day-2023-at-assembly-conference-hall-on-25-january-2023

Tun dinhmunah, Mizoram hian Legislative Assembly inthlan vawi 12 leh parliament inthlan vawi 11 hlawhtling takin a lo nei tawh a ni. 2013 assembly election ah khan India rama vawikhatna atan Voter Verifiable Paper Audit Trail or VVPAT chu Mizoramah hman tan a ni bawk. Tunah hian Mizoramah 8,42,388 vote nei an awm mek a; heng zingah hian 51.5% chu hmeichhe voter niin mipa vote nei an tlem zawk a ni. Mi tam zawkin awlsam zawka vote an neih theih nan ECI chuan dan a Siam tha a. He Danthar ang chuan Vote neih tuma diltute tan qualifying date chu kumkhata vawi khat ni thin kha vawi 4 - January 1, April 1, July 1 leh October 1 ah tih pun a ni a. January 1 a vote nei hman lo tan a kum leh nghah a ngai dawn ta lo a ni.

Dr.Lalhriatzuali Ralte, District Election Officer, Aizawl District hnen atangin inlawmna thuchah leh thuhmahruai ngaihthlak niin National Voters' Day 2023 pual program hi tan a ni a. Hla - “Main Bharat Hoon” tih ngaihthlak ho chhunzawm a ni a. Hemi zawhah hian NVD 2023 puala thuchah Rajiv Kumar, Chief Election Commissioner chu en ho leh a ni a. Hei hi NVD thutiam chhamruala in a chhunzawm a. Thutiam chham rual hi Mizo Higher Secondary School zirlai ten an kaihruai a ni.

Kumin NVD programah hian Booth Level Officers(BLO) hnathawk thazual te hnenah Best Performing BLO Award Governor in a hlan a. Governor hnen atang hian Vote nei thar thlanchhuah te chuan EPIC an dawng bawk a ni.

Pu H.Vanlalmawia, 7-Tuival (ST) AC, Pu Ramdinliana, 10-Aizawl North I (ST) AC, Pu RC Lalruatchhunga, 11-Aizawl North II (ST) AC, Pu Lallungmuana, 12 – Aizawl North III (ST) AC, Pu Lalrintluanga, 13 – Aizawl East I AC, Pu Joseph Vanlalhruaia Sailo, 14- Aizawl East II (ST) AC, Pu Zirkima, 15 – Aizawl West I (ST) AC, Pu R.Vanlalfaka, 16 – Aizawl West II (ST) AC, Pi K.Vansangpuii, 17 – Aizawl West (ST) III AC, Pu K.Chanchinmawia, 18 – Aizawl South I (ST) AC, Pu Lalfakzuala, 19 – Aizawl South III (ST) AC leh Pu Lalchawimawia, 20 – Aizawl South III (ST) AC te chuan best performing BLO Awards Governor hnen atangin an dawng a. Vote nei thar mi 10 in Governor hnen atangin EPIC an dawng bawk a ni. Pu David L Pachuau, Jt CEO, Mizoram chuan lawmthu sawiin NVD 2023 program chu khar a ni.


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post