KHAWHARNA RÛN RAMAH

(Ka pa thihcham vawi thumna pualin)

✍️Remmuana Chawngthu📒*

Thuhma:

Pathian khawngaiha leh zahngaihna avang chauhin, taksa leh rilru derdep tak chungin, kum 2023 hmel te kan han hmu leh thei a. Pathian engkimtithei min hruaitu chungah lawmthu ka sawi a ni. Ka pa min awm lohsan achin-ah tun ṭumah Covid hrilengin min tihbuai tawh loh hnua a vawi khat nan, ka pa pualin thu ka ziak thei a. A va han lawmawm tehlul em!

_*26 January hi...*!_

India ram tana ni pawimawh leh chhinchhiah tlak tak - India Republic Day a ni a. Kum tin maiin, he ni a lo thlen hi chuan India thinlungah thil lo lang a awm ṭhin a. Ramchhung mipuite leh a rama mi pawimawh bikte chu an phu suau zel tih theih a ni. Thil liam tawh a hriat thar zingah, India sawrkarin a mi-pawimawh chatuan ram pan tawhte leh sipai, ram tana nun hlantute leh an hlutna a ni. Chung mite chu zah takin sûn an ni ṭhin a ni. 

 _*26 January 2020 ve thung hi...*_

 Midang tan thil thleng satliah ve mai a nih laiin, kan chhungkaw tan chuan, hriatreng tur thil, thil chhinchiah tlak, chhinchhiah loh pawh tum mah ila, theihnghilh theih miah loh hun - ka pa lei hringnun zawh tawpna ni a ni. A ni leh thla ang zawng chuan, hun rei va thawkhat ni tawh mahse, kan tan chuan tun maia thil thleng ang maiin a la fiah ṭha a ni.

_*Khawharna rûn ramah...*_

Hla phuahthiam lutuk tak mai- K.Hminga hlaa

 _"He khawharna run ramah hian,_

_Aw, enginnge min hnem thiam ang?"_ tih ang deuh a ni. Khawharna satliah a awm a, khawhar dan ki chi hran hran awm karah hian - thisen zawmpui emaw, chumi tlukpui deuhthawa kan tana mihlu tak, dairial chang tawhte ngaia khawharna zet hi chu a mi-ṭham leh fan hi a na fat fat kher mai.

*Mahse,*

Keini chauh hian kan lo tuar bik lo a, kan chhiat tawh atanga tun inkarah ringawt pawh midangte chhiat tawhnaah hian ka va chetla tam tawh tehlul em! Rilru ipikna tam tak hi min thawvensantute ai chuan keini ang bawka ipik ve bulah hian tuar a lo nuam bik zawk mah ni hian ka hria a. Kei ngei pawh hi, mi thawveng leh thawm na tak chhuaha ri chiam chiamte bulah hun rei tak chhung chu ka tel duh lo hial mawle.

Chhiat tawk ve dangte chhiat tawhah kan lawm ni hauh loin, midangte chhiat tawhna hian chhiat tawh chungchangah rilru zau tak min puttir hlauh a. Kan chhiat tawh hmaa chhiat tawkte ka kawm dan leh kan chhiat tawh hnua chhiat tawk vete ka kawm dan leh ṭawngkam hman chu danglam tak a ni. Chuvangin, thil tam tak hi chu a taka dai ve phawt hnua hriatchian lehzual chi a lo ni. Chung zingah chuan thihna avanga inṭhenna pawh hi a tel chiang mai. Mahse, vawi khat tawn hnuah chuan tawn tawh miah loh theih hi thil chakawm leh duhthusam ber a tling awm e.

Lungchhiatna mittui ṭhahnem tak mai hi - thihna avanga inṭhenna chuan a kochhuak ṭhin a. Biangah mittui a luan loh pawhin, thinlung chhungrilah a aia na mah hian a luang lut thei emawni tih turin na mangkhenga min ṭhamtu hi a awm tlat ṭhin a ni.

_*Jakoba nun ramah i lut daih teh ang.*_

Genesis 32:22-30 kan chhiar chuan, Jakoba tana hmun leh hun pawimawh tak mai kan hmu a, chu hmun chu 'Peniel' a ni. Jakoba nun ram aṭanga thlir chuan, khel ruh chuktuah tihpelhsawlhna hmun, mahnia ding thei tawh miah lo tura a mihring chakna laksakna hmun, hmun lungchhiatthlak a ni awm e. Mahse, Pathian tan chuan, a remruat thlen dikna hmun, A mi Israel fate tana, an pu Jakoba'n hming thar "Israela" tih hming a putna ni leh hmun a ni a. A pawimawh takzet a ni.

Hmanlaia tute thawnthu emaw ti ringawt lo ila, kan nunah thil tam tak sengluh thar tur a awm a ni. Harsatna leh manganna, lungngaihna leh lungchhiatna thlipuiin na tak mai a min nuai hrep lai hi chuan, chu hun ngei chu hun lungchhiatthlak dik tak a ni. Mahse, kan tana ṭha tur zawk zela engkim ruahman a, ro min relsaktu- kan Pathian chuan, heng hun hahthlak tam takte hi, kan tan zirlai thar zir chhuahna hunah min chansak zel a. Hringnun nihphung tam tak kan la tawn leh hriat ngai lohte hriat thar zelna zawk a lo ni. Thil kha deuh anga lang, thlumna nei ve phian tho si a ni ber ang chu.