Aizawl | Jan 8, 2022: Naktuk chhun khian Central YMA bultumin Bangladesh Zofate thlavang hauh nan Mizoram Larsap chenna in gate kawtah an pungkhawm dawn.
Punkhawm tur chhhan:-
CHITTAGONG HILL TRACK-A KAN UNAU BAWM TEN DO RAWN AN TAWK! PASTOR CHHAWNKHUPA THIHNA KHA! - Vanneihthanga
8th January, 2023 (MSR) : Myanmar Arakan ram dep, Bangladesh ram chhung Chittagong Hill Track tia hriat thinah hian kan unau Zo hnahthlak Bawm hnam an cheng a, henglai rama cheng hnamdangte chuan tlang mite chu, 'Chin Kuki' tiin an sawi mai thin.
Chittagong Hill Track-a Zo hnahthlak Bawm ho hian Bangladesh sorkar lakah enkawlna hran ngiatin ralthuam an lek ve a. An ram leh hnam tan nun hlanin Kuki-Chin National Army (KNA) tiin an invuah a ni.
Hetih mek lai hian, Myanmar sorkar laka hel, zalenna sual ve mek Arakan Army (AA) te chu an chenna Myanmar Arakan-ah an dinhmun a chep chho ve tial tial a, an sahimna'n Bangladesh ram chhunga kan unaute belin Bangladesh ram chhungah an lut fo thin. Chu chu remchangah lain Bangladesh sorkar chuan Arakan Army te chu KNA te dopuiah sawmin inremna a siampui ta a. Tunhma lama buaina nei ngai lo khan, buaina leh harsatna an nei ta fo mai a ni. Bangladesh sipai leh AA tangkawpte chuan kan unau Bawm mipuite chu an rikrap ta fo mai a.
Pi leh Pu atanga an luah ramah kan unau Bawm hote chu an zalen lo ta hle mai a, Bawm hnam tan dawrah thil lei phal a ni lo va, dawr siamte pawh an phal sak lo. Chutianga inrahbehna an hmachhawn tak avang chuan kut inthlakna pawh a thleng ta fo a, KNA te hian AA te chu, "Tlang mi ve ve kan ni a, indo a tha love, tangrual tur zawk kan ni e" tiin, inbiak remna neihpui tumin hma an la a. AA camp-a mi 9 va kalte chu an lo man vek mai niin thu dawn a ni.
An inkar a chhe chho ta hle a, kum hlui December ni 15 khan AA leh KNA te inkarah inkahna thlengin AA lam mi 4 in nunna an chan a, KNA lam thi an awm lo thung.
PASTOR THINA KHA!
An ram chhung ngeiah rahbehin an awm a, buaina lian zawk thleng thei reng a nih avangin tar chak lo leh nunaute chuan himna zawngin kumthar January thla tir khan Mizoram an rawn pan ta a, an vaiin mi 164 an ni. AA leh Burma sipaite laka an him theih nan an kalna tur thlithlai hmasatu an insiam a, AA an hmuh chuan hla takah helin ramhnuai kawng awm lovah chhun leh zan tamtak thangin ei tur nei lovin an rawn kal a, hnah nem leh changel thlengin an khehin an ei zel a, an kalna hnu chu a petin a pe veng vung mai niin an sawi.
Chuti anga harsa taka himna zawnga Mizoram (India) border an rawn lut tur chu, BSF ten an lo hmuh hlauin Mizoram chhung Chakma khaw pakhat, Simnesora khaw daiah an biru a, chuta an awm lai chuan Chakma nu pakhatin BSF hnenah a report niin an sawi. BSF te chu ramri vengtu an ni a, chutia foreigner chuti ang zat rawn kal ta chu an awmna ram Bangladesh lama nawr kir leh kha an hna a ni a, Bawm unau himna zawnga Mizoram rawn luh tumte chu Bangladesh lamah an nawr kir (push back) leh ta a ni. BSF te hian a pawng a puiin raltlante hi an nawr bawrh bawrh bik lova, ei turte pawh an pe niin an sawi.
Hun rei tak chaw mumal ei tawh lo, hnah nem leh tuisik ringa thui tak rawn kal tawhte chu an chau hlawm em em mai a, an zinga tar chak lo Pastor Chhawnkhupa Kum 80 phei hi chu kal pawh kal tha hleithei tawh lo khawpa chau niin an sawi. BSF te hian pastor hi a chang chuan an han paw leh lawp lawp thin bawk a, kawng awm lovah, lui dung zawhin kham bakbahai tak tak lawn a ngai thin si a, Pastor pawh chu an han kaih lawp lawp chang a awm a, a chau lutuk chuan tlin lovin Pastor Chhawnkhupa hi January ni 4, 2023 zan dar 8:20 vel khan ramhnuai pilril takah a boral ta a ni. Pastor Chhawnkhupa hi Evangelical Baptist Church Pastor niin an sawi.
Pastor Chhawnkhupa thih thu hian Zoram pum a deng chhuak nghal a, lainattu a ngah hle mai. Lawngtlai District Burma ramri hnaih lamah hian Parva hming pu khaw pathum Parva I, Parva II leh Parva III te a awm a, Parva III hi Bawm khua niin Bangldesh atanga raltlante tan pan awmsam leh remchang ber a nih bawk avangin pan hmasakah an neih thin a ni.
Pastor Chhawnkhupa ruang la turin Parva III atangin tlawmngai mi engemawzat bakah Police leh BSF engemawzat chuan Simnesora an pan a, Pastor thihna hmun hi Simnesora atangin kea darkar 7 vel zet kal a la ni. Ruang la tura kalte hi an thlen har deuh tak avangin Pastor ruang hi Bangladesh ram chhung Salopi khuaah phum a ni. Salopi khua hi KNA ten an awp mek khua a ni a, Pastor Chhawnkhupa te awmna khua Chheihkhiang atanga km 30 vela awm a ni a, Bawm khua a ni. Pastor Chhawnkhupa ruang hi lak tuma ruahmanna siam a nih khan a unaute awmna khua Lunglei District Khawmawi khuaah phum tura ruahman a ni a, inkalpawhna kawng awm mumal lo avangin harsatna a awm a, Bangladesh ram chhung lamah phum a ni ta a ni.
NGAIHTUAH ZUI NGAI TE -
1. Arakan atanga nunau raltlante Mizoramin hmangaih takin kan lo kuangkuah a, Lawngtlai District maiah pawh tawp lovin, Aizawl lam thlengin kan lo tuamhlawm a nih kha kan ka hre theuh awm e. Chutiang a nih mek laiin Bangladesh ram chhunga kan Zo hnahthlak unau Bawmte chungah Arakan Army ten harsatna an siam hi an inenfiah ve a ngai hle mai.
2. Myanmar buaina avanga khawchhak lama kan unau raltlan ten ramri-ah harsatna an tawh kan hre ngai lova, Sangau tlangdung; Siaha District chhung thlengin Myanmar Border thuitak a awm a. Champhai lam tlang dungah pawh Mizoram rawn lut duh ten harsatna an tawh kan hre ngai lo. Bangladesh buai avanga rawn luh tum kan Zo hnahthlak Bawm unau ten Bangladesh border-ah harsatna an tawk bik thin hi ngaihtuah zui ngai tak a ni.
Date Wise Bangladesh Refugees Summary -
1. Dated 20/11/22 - 274 person
2. Dated 25/11/22 - 21 Person
3. Dated 08/12/22 - 15 person
4. Dated 02/03/23 - 17 person
5. Dated 06/01/23 - 45 person.
Total- 372 person
Source : Pu Lalngheta Ralte Journalist Lawngtlai & Pu Gospel-a Parva III VCP
....
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: