Minister of State zahawmtak Pu TJ Lalnuntluanga, ZOFEST 2022, Dec 7, 2022 nilaini chawhmaa a thusawi tlangpui a ni.
-T.J.Lalnuntluanga
A hmasain, vawiina MZP te buatsaih, ZOFEST rawn chhimtu chibai ka buk vek a che u.
ZOFEST hman tan atanga kum 22-na a lo ni chho ta der mai a. Hetiang hun hman a nih tan itrh laia chhimtu anga kal ve thin kha Khuallian atana ruat ka ni hi phu lo ka intiin, Pathian leh Hnam Inpumkhatna chungchanga chawl lova hma latu, MZP hruaitute chungah lawmthu ka sawi a ni.
Zofate inpumkhat hi a pawimawh em em mai a. Vawiina Hnam Inpumkhatna chungchang kan sawi bakah hian, mithiam leh thlir zau zawk tam takin Hnam Inpumkhatna chungchangah hian fuihna thu tha tak tak an sawi thin a, tha kan ti a, kan pawm tlang vek mai. Hetianga unaute kan inngaihsak tawn a, kan inhmangaih a, dinhmun sang leh hniam deuh kan awm a nih pawhin kan inenhran loh a ngai a ni.
Tin, tun dinhmunah kan ramin hri tha lo deuh kan vei a awm a, chu chu - Facebook/ whatsapp kan khawih nasa hle a, changkang kan inti a, social media khawih hi hna pui bera nei tawp kan tam lutuk hi a ni. Chanchinbu leh thildangah fiamthu a “An ti” tih hmangin bul kan tan a, hei hian kan rilru leh thinlung a piansualtir a; tute emaw dinhmun hmuh hniam leh zahsak lohna te, kan chenpuite tawngkam dengkhawng tak taka diriam leh sawichhiatna te a tihluar hle a, kan nun (moral) a tichhe nasa em em mai a ni.
Tin, vawina ka ngaihpawimawh em em chu , Kan Ram ah hian hma sawnna a pawimawh rual hian, a pawimawh chu, Kan zoram leh hnam a him a, hnam zalen leh ram ralmuang kan nih reng hi a pawimawh a ni. Tunlai hian kan hnam ngeiah pawh mi thiam tak tak leh thil hre tak tak kan ngah tawh a, Khawvel level ah pawh duai bik lo kan kat ve ta nuk mai a ni. Hetih rual hian kan thiamna leh theihna te mi dang fuihpawrh nan hmang kan pung chho a, hei hian nghawng tha lo tak a nei theiin ka hria. Tam takin thu thiam takin Manipur te Cambodia kalkawng te kan zawh kan ti a, chuvang chuan Ngaituahna hrisel rilru hrisel kan neih loh chuan nghawng tha lo tak neiin Politician te chauhin an an tuar dawn lo mi zawng zawngin kan tuar thei. Chuvang chuan kan thiamna finna hi midangte tan malsawmna a nih dawn loh ai chuan ngawih mai te a tha in ka ring thin. Kan Ram a zalen a, Nu nau te thla a muan zel theih nan rilru hrisel kan put thiam hi a pawimawh khawp mai!
Kan ramin hma a sawn zel theih nan kan hnathawhna apiangah hna a sang emaw a hniam emaw Dikna leh Rinawmna nen kan Zoram tan thawk tha tawp ila, midangin an lo thawk tha lo deuh a nih pawhin kep tum ila, thil an lo ti dik lo deuh anih pawhin a mawh an mahni ngeiin an phur mai dawn a. A nawlpui anga buaipui vut vutna hian kan ram hmasawnna tur, hun leh tha la hek nasa em em a, kan sakhuana pawh a ti dal ang tih ka hlau a ni.
Ram ropui leh Hnam upa zawkte nen kan intehkhin a, a tha viau tho ve. Chutihrualin, keini aia a kum sangbi leh zabi tela hnam upa zawk te nena inteh leh inkhaikhin hian a tha lo zawnin kan rilru puthmang kuai her bawih a, rualawh luatah midangte teh tling thei lovin, insawichhiatna leh elrelna nen nun kan hmang a. Hei hian kan chenhonaah boruak chhe tak a thlentir thin a ni.
Kan ram zimte, hnam tlemte te hian hmasawn tura bul kan tan a ngai a. Sorkar atang emaw, tute emaw kaltlanga hamthatna dawn ngawt tum lovin, chhungkua emaw, mimal anga tan kan lak a, kan theihtawk te ti a, kuthnathawh chungchangah pawh hma kan sawn a pawimawh a. “Ka ramin enge min tihsak theih” tih aiin, “Ka ram tan enge ka tih theih” tih rilru kan put theuh a pawimawh a ni.
Tin, midangte dik lo vek tura kan hmu leh ngai tlat thin hi a lo ni erng reng lova. Kan politician te, Minister leh officer rualte corrupt vek anga kan ngai thin te hi a dik lova. Politician te, Minister leh officer te zingah hian corrupt duh miah lo engemaw zat an awm a ni. Lo dai pelh palh leh felhlel tawk an lo awm a nih chuan thuhran a ni a; a mipui zawkte rilru (moral) corrupt chungchang pawh hi kan vei tel a pawimawh tak zet a, kan zavaia tanlak a pawimawh tak zet a ni.
Politics ah kan hun te hmang vein, ram leh hnam hmasawnna atan rilru leh ngaihtuahna phak tawkin kan seng ve a. Chutih mek lain, pawisa min dil leh eng eng emaw chungchangah min nawrtu an tam si. Mahni tawkah dik leh fel nia lo inhriain, phak tawkah dik takin hun kan lo hmang ve a, chutiang hun a lo thlen chang chuan mite nun ka hmuh leh tehdan khan ka thahnemngaihna pawh a vaw chau thin hle a. Hmanni Israel ram kan zu fan khan “Thlalera hnimbuk to ri re ang mai” tih kha ka rilruah a awm ta tlat mai a. “Aw, kan lo tha lo hle mai. Mite diptu leh mite tan hling ka lo ni thei reng mai a.. Hetiang rilru pua ka Ram leh Hnam ka hmangaihna kawnga keimah min daltu ka lo insiam thin hi ka tih loh tawp tur a ni. Ka neih chhun, ka Ram leh Hnam tan hian kei chuan ka theihna zawng zawng ka hlan zel a tul a ni” tiin ka ngaihtuah a, theihtawp chhuah zui zel pawh ka tum a ni.
Dik tak chuan Mizoram pawh hian hma kan sawn ve a ni. Tunhma chuan huanah Ek In kan nei a, kan inthiar zawhah Ek In bang te thliakin, Maian hnah leh Iskut hnah te kan hmang thin a, thenkhat chuan bottle ah tui khaiin kan intifai thin a; tunah chuan khaw kilkhawr berah pawh mahni inchhungah inthiarna changkang tak kan nei fur tawh a ni. Tin, tuikhur leh luiah tui kan chawi a, tuikawhna leh tel tin hmangin kan ei leh in tur kan chawi a, tunah chuan In tin deuh thaw ah Tui Connection kan nei tawh a ni. Lirthei chungchangah pawh tunah chuan Traffic Jam buaipui ngai khawpin kan awm tawh a, Commercial Vehicle aiin Private Vehicle hi a tam zawk a, hengte hian mipui hmasawnna a tilang hlein a lang a. A eng zawnga thil thlir duh tan chuan “Ramin hma a sawn a ni” tih hi hmuhhmaih rual a ni lo.
A chunga kan sawi ang hian Hnam naupangte ni mahila, khawvel huap pawh zahpuiawm bik lo, mithiam leh fing tam tak kan nei ve tawh a, heng kan mithiamte hi ram leh hnam din chhuahna atan kan hman tangkai thiam a hun ta hle a.
Thalai hnathawk lo kan tam lutuk hi hma kan sawn theih lohna a ni. Hmanni lawk khan Israel ramah kan zu kal ve a, an thalai (nula leh tlangval) te khawlaiah an reh duk a, ram a buai vang a niang a, kan ti a. Amaherawhchu, “Hna an thawk a ni” tiin min chhang a. Hmasawn tur chuan taihmakna chungchangah tan kan lak thar a pawimawh hle a ni.
saRam hmangaihna leh ram hmasawn na thawk tur hian mahni sum ngah, hnam dang tawng thiam ringawt hi kan tinzawn ang tih hlauhawm khawp in ka hria, heng hi kan ram ah hian a thlen chuan kan ram boruak tur hi a ngaihtuah awm ngawt in ka ring! Chumi tur chuan rilru hrisel kan put thiam hi a pawimawh khawp mai. Khawvel-ah hian hnam ral tam tak an awma, chuvang chuan kan ram, kan hnam a him a, kan dam khawchhuah zel theih nan kan hnam nihphung zahpui lova, chhawm nung zelin, tlang hrang hranga zohnahthlak unaute inpumkhatna kawngah theihtawp chhuahin ke i pen zel ang u.
Ka lawm e.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: