_Pathian ṭhatna hnuaia nun
— Rick Warren
— Dec 28, 2022
Pathian ṭhatna rinnain kan nuna harsatna kan hmachhawnnaa min puih dan kan sawi tawh a.
Nimahsela thil ṭha chu i hlawhchhuah nia i inhriat a, ṭhatna chu Pathian aṭangin a ni tih i theihnghilh chuan eng nge lo thleng ang?
Luka 12 ah, Isuan mihausa hlawhtling tak nimahsela Pathian hnena thilpek engmah pe lo chanchin a sawi a. Pathianin mi hausa hnenah chuan, "‘Mi a, zaninah hian i thlarau an laksak dawn che a ni; i thil dehchhuahte kha tu ta nge ni ta ang le?’ a ti a. Mahni tana sum khawla Pathian lama ngah si lo chu, chuti chu a ni thin," a ti a. Luka 12:20-21
Chu chu inralrina ril tak a ni!
Lawmna chang hriatloh avanga chapona hi sual a ni a, vanram aṭanga Setana hnawhchhuah a nih chhan a ni a, chu chu sualna zawng zawng bul a ni. Pathian chungah lawmna chang i hriat loh chuan, buaina i tawk thuai ang: “Pathian hre siin Pathian angin an chawimawi lo va; lawmthu pawh an sawi hek lo; thil lawilo an ngaihtuah ta zawk a, an thinlung a chu a lo thim ta a." (Rom 1:21).
Mi vannei hausate harsatna chu a tawpah anmahni an in chawimawi zel hi a ni. Heti hian an sawia, “Minute khat min nghak la; Kut lawng maiin a nia he sumdawnna hi bul ka ṭan ni.” Mahse, tu in nge i kutte pe che? Anni chuan, “Sumdawnna chu keima ingaihtuah chhuah leh keima bul ṭan Iiau liau a ni tiin.” Mahse tu in nge i rilru kha pe che? Anni chuan, “Thlansa phul kaiin ka hna hi ka thawh avangin vawiina ka nihna hi ka thleng thei a ni” Mahse tu in nge rim taka hnathawh theihna pe che?
Bible chuan heti hian min zawt a: “Nang tuin nge tilem chuang che; I dawn loh chu engnge i neih ni? I dawn a nih si chuan engati nge dawn ni lo anga i uanpui ni?" 1 Korinth 4:7
Nung tura i neih engkim hi — hmuh theihna, hriat theihna, leh ei leh in theihna, i zalenna leh ngaihtuahnate hi— Pathian laka i bat a ni. Pathian ṭhatna chu hmu lo la chuan boruak hip tur pawh i nei lo vang.
Lawmna chang hriat lohna hi Pathian awm rin lohna bul a ni; i lung a awi loh chuan, Pathian thiltihte i hnualsuat emaw i phatsan tihna a ni. Chu chu Pathian awm rin lohna hmahruai a ni duh bawk a ni.
Han hawi vel la Pathian awmzia chu i hmu thei ngei ang tih hi thudik a ni: “A thil hmuh theih loh (a chatuan thiltihtheihna leh a Pathianzia chu) khawvel siam tirh ata fiah taka hmuhin a awm a, thil siamah chuan a lang a ni; chuvang chuan chhuanlam tur an nei lo” (Rom 1:20).
Pathian ṭhatna i ringhlel a nih chuan, pawnah chhuak la han hawi vel teh. Pathian ṭhatzia chu a thilsiam aṭangin i hmu thei ang!
Ngaihtuah zui atan
* Thil han hriatchhuah mai theih aia nasa ngaihtuah ula, ruah leh thingte nen, engtin nge leilungah hian Pathian ṭhatzia i hmuh theih?
* I nuna thil ṭha deuh lo thleng chu nangma hming mawina tur nge Pathian hming mawina tur i thlan dawn le?
* Pathian nihphung hriat dik loh hian nunah eng nge nghawng a neih? “thim leh buai,” Rom 1:21 ah hian engtin nge a lan?
*[Lettu: Sangpuia]*
Post a Comment
He post chungchanga i ngaihdan lo sawi ve rawh: