HNATHAWHNAA MI KHIRH DEUHTE HMANGAIH DAN

 _Nungchang siam dan_

— Rick Warren 

— Dec 14, 2022

“In tih apiang chu hmangaiha tih ni vek rawh se” 1 Korinth 16:14

I thiltih mek kha engvanga ti nge i nih?

I dam khawchhuah nan chauha hna thawk i nih chuan, i nun chu i khawhral mai mai tihna a ni. Nung tur chauha hnathawh aia nasa zawk hi hringnunah hian a awm a ni.

Eng hna pawh thawk dawn ila min tiphurtu chu hmangaihna ni rawh se. Engkim hmangaihnaa i tih hian Pathian a tilawm a ni. Nilenga mi dang thiltih i endikin Pathianin i tilawm thei. Bawlhhlawh i chharin Pathian i tilawm thei. Computer-a hna i thawhin Pathian i tilawm thei. Damdawi in emaw Hotel room emaw i tihfaiin Pathian i tilawm thei. Engvangin nge? Hmangaiha i tih avangin.

Engkim hmangaihnain i ti thei a ni.

A chang chuan thil tha ni tho si rilru tha lo pu chungin i ti thei – Pathianin chungah chuan engmah in hlawh dawn lo min ti. Pathian chuan i thiltihah amah a awm em tih ai chuan engvanga chu thil chu ti nge i nih tih hi a ngai pawimawh zawk a ni. Bible chuan, “In tih apiang chu hmangaiha tih ni vek rawh se” min ti. 1 Korinth 16:14

Mite chuan zawhna min zawt thin a, “Rick, kum 40 chuang lai mai hi engtin nge Pastor i nih theih zawk?” min ti. A chhanna chu hote a ni. Hmangaihna nen ka ti thin, Pathian ka hmangaih a, mipuite ka hmangaih a ni.

I thiltih lai bansan i tum pawhin hmangaihna chuan a tih chhunzawmtir thin zawk che a ni. Bible-in 1 Thessalonika 1:2 ah chuan, “Kan Pathian leh Pa hmaah chuan rin avanga in thawh rimzia te, kan Lalpa Isua Krista beisei avanga in chhelzia te kha theihnghilh lova hre rengin” tih kan hmu a ni. Hmangaihna hi min tiphurtu tha ber a ni. 

Hnathawhnaah chuan mi chi hrang hrang i hrawn mai thei a.  A then chu rinawmlo te, midang remtheilo te, mahni inveng reng te, mumal lemlo te pawh an ni ang. I ngainat zawng ni lemlo pawh i thawhpui a ngai a ni.  

Mahse Pathian chuan hmangaiha thanglian turin a duh che a ni. Chuvangin thlarauva thanlen i duh chuan chung hote pawh chu hmangaih i zir a ngai a ni. 

Chu chu engtin nge i tih theih ang? Bible chuan, “Ngaihtuah hmun khatin awm tawn theuh rawh u. Inngaihtuah sang lutuk suh ula, mi tete pawl zawk rawh u. Intifing suh u. Tu sual pawh sualin thungrul suh u. Mi zawng zawng ngaiha thil mawi ngaihtuah lawk rawh u. A theih phawt chuan nangmahni lam tal, mi zawng zawng nen inremin awm rawh u.” Rom 12:16-18.

Hengte hi hnathawhnaa mi khirh deuhte hmangaih dan tur a taka kan hman nghal theih te chu an ni. Mi tu te pawh zaidam takin bia la. Nangma ngaihdanin hruai tum suh. Hlim takin hna thawk tlang ula. Khawngaihna leh ngaihdamna nen chhang let thin la. Mi dangte nena in inrem theihna turin eng thil pawh ti la.

Hmangahnain engkim ti rawh.

Ngaihtuah zui atan

* He zawhna hi engtin nge i chhan ang, “I tih mek hi engvanga ti nge i nih?” Pathianin hnathawhnaa i phurna hi engtin nge a ngaih ang?

* Mi dang nena in inrem theih hramna turin, i hnathawhnaah i eng nge thlak danglam ngai, nangmah ngei pawh tiamin?

* I hnathawhnaah tu nge hmangaih harsa deuh an awm em? Tunkar chhung hian engtin nge lainatna an chungah i lantir ang? 

*[Lettu: Sangpuia]*