ARGENTINA PLAYERS THA ZUAL SÂWM THLANCHHUAHTE

- K Remruatfela

Heng a hnuaia mi te hi Argentina Football player lo awm tawh zawng zawng zinga Argentina team tana thawhhlawk ka tih langsar zual 10 an ni a. Hemi tehfung atana ngaih pawimawh ber chu an thiam leh theihna lam aiin Agentina football team tana an tha thawh, eng ang takin nge tangkaina an lo neih tawh tih zawk a ni. Players quality atanga teh dawn chuan Alfredo De Stefano te hi an buk a rit lo thei lova. Khawvela player tha bera ngaitu pawh tam tak a nei ngei ang. Amaherawhchu, Real Madrid tana a thawhhlawk zia ngaihtuahin Argentina tan erawh sulhnu hnutchhiah a nei tam lo khawp mai a. Chu chuan a buk a ti zang lo thei lo a ni.

 

1. Diego Armando Maradona:

Khawvela mihring piang tawh zawng zawng zinga Football thiam bera mi tam takin an ngaih, Diego Armando Maradona hi ni 30 October, 1960 khan Argentina khawpui, Buenos Aires chhunga mi retheite awmkhawmna vengah rethei takin a lo piang a. A pa hi factory-a rim taka hna thawk thin a ni a. Chu chu an chhungkaw eibel ber pawh a ni.

 

Kum 8 a nih atangin a talent hi mipui hmuh theiha phochhuah tan a ni a. Kum 12 a nih phei chuan a football thiam zia hi hahipa sawi a ni tawh. Kum 16 a nihin an ram club, Argentinos Junior tan a in lan tan a. Chuta kum 5 zet a awm hnuah Boca Juniors-ah insawnin hei hi khawvel hriata a lar chhuah tak tak bul tanna a ni kan ti thei ang.

 

Argentina tana a football khelh hmasak ber chu ni 27 February, 1977-a Hungrary nen an intum tumin a ni. Kum 1978 World Cup an thlen tum khan Agentina squad-ah koh a nih zet hnuah a la nau lutuk tiin hnawl a ni leh a. A World Cup khelh hmasak ber chu kum 1982 kha a ni. Hemi tum hian Second Round-ah Brazil hneh lovin an tla a. Maradona hian game zawng zawng thlak awm miah lovin a khel tluan parh a, goal 5 lai a thun nghe nghe a ni.

 

World Cup zawh a nih veleh hian a hunlaia players man to ber ni turin Barcelona in an lei a. Barcelona a awm chhung hian khawvelin a theihngilh theih tawh loh tur thil ropui min hnutchhiat nual mai. Khawvelin Maradona a theihngilh theih tawh lohna ber erawh World Cup 1986 kha a ni. Hemi tum hian a ram, Argentina chu ama thawh rah vang tih theih liau liauin a champion pui a. Quarter final an khelh tumin England lakah khawvel football history-a goal sawisel hlawh ber leh goal mawi ber ni kumkhua tawh tur a hnutchhiah ve ve a nih kha!

 

Club lama a sulhnu hnutchhiah lam aiin ram tana a sulhnu hnutchhiah hi a ropuina zawk a ni kan ti thei ang. Kum 1990 World Cup kha a hovin an hmachhawn leh a. Hemi tum pawh hian final hial thlen pui lehin German ral lian an tawn tlang zo ta lo a ni. Kum 1994 World Cup ah erawh match hnih chiah a khel hman tiin drug-test a paltlang zawh loh avangin thawn hawn a ni a. Ram tana a football zin kawng chu a lo zawh tawp ta a ni.

 

2. Lionel Messi:

 

Maradona aiin Lionel Messi hi a tha zawk a ni ti tu pawh an awm nuk a rinawm. Amaherawhchu, a pahnihnaa ka han dahna chhan chu Maradona angin Argentina tan World Cup trophy a la chawi pui ve loh vang a ni. Football khel ram zawng zawngin an ngaih pawimawh ber chu World Cup nomawi chawi hi a ni a. Chumi chawi pui theitu ngat chu hero an ni lo thei lo!

 

Lionel Messi hi ni 24 June, 1987 khan Argentina khawpui pakhat Rosano Santa Fe ah a piang a. A pa hi factory hnathawk a ni. Messi hi Barcelona Football Academy atanga inchher chho a ni a. A vanglai hun tha zawng zawng chu Barcelona FC tan hian a hmang zo a ni kan ti thei ang. Barcelona a awm chhung hian champion nomawi chawi theih zawng zawng leh mimal chawimawina dawn theih zawng zawng chu a chawi kim deuh vek hman a. A upat hnu lamah PSG lamah insuanin goal thun pup pup tawh lo mah se, game tana tangkai tak chu a la ni chhunzawm reng tho a ni.

 

Argentina FC tan hian World Cup vawi 4 a khel tawh a. Nimahse, vanduaithlak takin nomawi pakhatmah a la chawipui lo. Kum 2014 khan final a thlenpui a. Nimahsela, Argentina FC ten final an thlen hnuhnun ber tuma an hneh loh, Germany lakah bawk an tlawm leh a. Kumin World Cup 2022 erawh Copa Amercia nomawi a chawipui hlimchhawn a ni bawk a, hun tha a ni tawh chek turah ngai ang.

 

3. Mario Kempes:

 

Mario Kempes tih hming sawi rual lova thil lo lang nghal chu kum 1978 World Cup kha a ni. Hemi tum hian Argentina ram chuan World Cup an thleng a. A vawikhatna atan nomawi an chawi bawk a. Chuta mimal taka thawhhlawk lawr lak chu Marios Kempes hi a ni.

 

​Argentina FC tan hian World Cup vawi 3 a inlan tawh a. Nimahsela, a hming chherna ber chu kum 1978 World Cup kha a ni. Hemi tum hian World Cup chhung zawnga goal thun hnem ber a nih bakah players khel tha bera thlan a ni bawk a. Argentina tana a thawhrah hi engtakah mah theihnhilh a ni ngai tawh lo ang. Club lamah chuan Spanish team, Valencia lamah a vanglai hun a hmang tam deuh ber a. A club career ah game 555 khelin goal 302 lai a thun thei a. Hei hian eng ang player quality nge a ni tih chu sawi ngai lovin a tilang fiah mai awm e.

 

4. Daniel Passarella:

 

Argentina in kum 1978-a World Cup nomawi an chawi hmasa ber tuma an Captain a ni a. Hemi tum hian Mario Kempes nen an thawhhlawk fal em em a ni. Defender nei tha lo thina sawi, Argentina chhul chhuak zinga defender tha ber anga ngaih a ni a. Khawvela defender tha ber anga ngaitu pawh tam tak an awm a ni.

 

Football a chawlhsan hnuah Argentina team hi kum 1998 khan a enkawl leh a. Vanduaithlak takin quarter final a paltlang pui zo ta lova. Dutch lakah uiawm takin an tlawm a ni. Coach a nih laia a hmingthan hatna pakhat chu mipa sam zuah a tei thei lo kha a ni. Hemi vang hian an player pawimawh pahnih Fernando Redondo leh Claudio Caniggia te nen khelmualah an thawhho theih loh phah hial a nih kha!

 

5. Gabriel Omar Batistuta:

 

A pet goal theih em avanga ‘Batigol’ tih hming lem an put tir hial thin, Gabriel Omar Batistuta hi Argentina ram tana goal thun hnem ber dawttu a ni a. Game 78 a khelhah goal 56 ngawt a khung. World Cup 1994, 1998 leh 2002 ah te Argentina player pawimawh leh an innghahna ber a ni chho char char a. Ram tan World Cup vawi 3 a khelh tawhah hian goal 10 lai a thun tawh bawk a. He a record hi Argentine player zingah tumah khum thei an la awm lo.

 

Club lamah chuan Serie A lamah hun a hman tam ber a. A vulchhuahna ber chu Fiorentina FC tan a ni. A hnuah AS Roma leh club dang dangah insawnkualin goal thun a thulh thei chuang lova. A club career ah game 444 khel tawhin goal 248 zet a khung tawh hem mai! A vanglai chuan khawvela player tha berte zinga an sawi tel ve ziah thin a ni a. Khawvela mihring awm tawh zawng zawnga striker tha berte zinga mi a ni pawh ti ila kan sawi uar lutuk awm lo ve. FIFA World Player of the Year Bronze medal lawmman te a lo dawng tawh a. Ballon d`Or nominee ah a lang nual tawh bawk a. Heng bakah hian FIFA Best of XI-ah kum 2 ngawt a lang tawh bawk! Chutianga taka player ropui leh huhang ngah chu a ni.

 

6. Guillermo Stabile:

A hun hi a rei deuh tawh avangin a ball pet lai hi chiang faka hmuh fuh a har hle a. Chuvang chuan a quality hi chhutthiam a har hle. Nimahsela, football hre ril leh zir zau zawk ten an player dah san a nih tlat avang hian a nep lo ang tih chu a rin theih. FIFA World Cup khelh hmasak ber tuma Argentina team te final thlen pui theitu kha a ni a. Hemi tum hian match 4 ah goal 8 lai thunin goal thun tam ber a ni nghe nghe.

7. Roberto Ayala:

 

Leadership quality a neih that em avanga player te zahkai leh ngaihsan, Roberto Ayala hi Captain Armband hreng chunga Argentina ram tana inlan tam ber a ni a. Argentina player tan mai ni lo, club lama a vanglai a hman liamna, Valencia FC tan pawha kawng engkima player te fuihphura, ti tha tho thin tu, an chak lohna laite hliahkhuaha an theihna sang zawk an lan chhuah tir theihna tura uap lum thintu pawimawh tak a ni.

 

Khawvela piang tawh zawng zawng zinga Right-back tha berte zinga ngaih a ni a. Hmar lam bang sut tlang theih loh ban rinawm tih hiala koh thin a ni. Argentina ram tan hian World Cup squad-ah vawi 3 (World Cup 1998 – 2006) awmin vawin 2 a inlan thung a. World Cup 2002 tan a nih dawn khan game hnuhnung berah a inhliam hlauh mai a. Squad atanga paih theih a ni tawh si lova. Khawvelina champion tura an rin ber, Argentina team te chu an Captain Ayala tel lo chuan group stage pawh an paltlang zo ta lo a nih kha!

 

8. Javier Zanetti:

A vanglaia player mit fing leh tha rum ngah sawi thin, Javier Zanetti pawh hi a nihna takah chuan a hming thanna tak chu Argentina team tan ni lovin a club khelhna, Inter Minal FC tan a ni mah a. An Captain kulhlum niin an Club Football-a player ropui berte zinga an ngaih leh an dah san, an zah rawn em em a ni.

Argentina team tan hian World Cup 1998 leh 2002 a in lan a. Copa Amercia lamah erawh final vawi 3 hial a thlen pui. Kum 2002-a Captain Roberto Ayala a inhliam tak avanga an tlar hnung rinrawl ber ni chho ta a ni a. Thil mak tak erawh chu a ropui vanglai, FIFA World Cup 2006-ah erawh ram tana koh a ni lo tlat a. Sawi hat pawh a awm phah reng a nih kha. Roberto Ayala chawlh hnuah Argentina tan Captain Armband a hreng chhunzawm a. Argentina ram tana inlan tam berte zinga mi a ni.

9. Javier Mascherano:

Argentina jersey ha chunga a zawna World Cup tum 4 (2006, 2010, 2014 leh 2018) inlan thei leh rinrawl bera awm thei a ni a. Argentina mai ni lo, khawvel ram dangah pawh hian players pakhat World Cup tum 4 ngawta rinrawl ni thei hi sawi tur an tam lo khawp mai. Argentina players ah phei chuan an la awm lo tih theih deuh thaw a ni a. Legend pahnih Maradona leh Messi te pawh hian he dinhmun hi an la luah phak lo! Maradona hian a teuh ber a. World Cup 1982,1986, 1990 leh 1994 kha a khel a. Nimahsela, World Cup 1994 erawh a khel tluan ta lo tih kan hriat kha! Lionel Messi pawh hi World Cup 2006, 2010, 2014 leh 2018 ah te inlan tawh mah ni se, a World Cup hmasa berah khan rinrawl a la ni phak miah lova. Chung zawng zawng ngaihtuah chuan Argentina tana Javier Mascherano hlutzia hi sawi nawn ngai lovin kan hre thei awm e.

Javier Zanetti thlakin ni 10 November, 2008 khan Argentina Captain armband a hreng tan a. A captain nihna hnuaiah World Cup 2010 pawh kha hmachhawn a ni. Argentina tan hian vawi 147 zet a inlan tawh a. Lionel Messi tih lova ram tana inlan tam ber dinhmun hauh mektu a ni. Argentine defence pawp tiphuisuitu, Defensive Midfielder khawng tak a ni a. Khawvel huapa club lar tak tak, West Ham United, Liverpool leh Barcelona tan te a lo khel kual hrep tawh a. Argentina Defensive Midfielder neih tawhah chuan a la tha ber ang tih ngam a ni.

 

10. Sergio Aguero:

 

Manchester City tan mai ni lo, English Premier leaque history-a Striker ropui berte zinga ngaih a ni a. Argentina player zinga English Football-a roreltu lu ber a ni pawh ti hial ila kan sawi sual lo ang. Chuti khawpa players thawhhlawk leh ropui chu tuna kan sawi Sergio Aguero hi a ni.

 

Argentina tan hian World Cup vawi 3 (2010 – 2018) a in in lan a. Ram tan goal 41 a thun a. A aia goal thun tam chu Lionel Messi leh Gabriel Omar Batistuta chiah an awm. Players tha leh talent ngah tak ni mah se, Lionel Messi hunlai leh a vanglai hi inrual chiah a nih avangin a teammate Messi hian thui takin a chanchin a hliah khuh phah a ni a tih loh theih lova. Nimahsela, amah hrechiangtu te hi chuan hnial rual lovin Argentina player awm tawh zawng zawng zinga forward tha berte zinga mi a ni tih chu an nemnghet tlat thung a ni.