Ticker

10/recent/ticker-posts

Tualbung khaw kum 100 tlin lawmna Art & Culture minister-in hmanpui

Saitual | Nov 25, 2022: Tualbung khua kum za tlin lawmna Tahreuh kawn, Tualbunga hman chu vawiin khan Art & Culture Minister Pu R.Lalzirliana chuan a hmanpui a, he hunah hian Tualbung Centenary Souvenir leh Pu C.Lalngaihzuala’n Tualbung chanchin a ziahna ‘Aw Bungkhawpui’ tih chu a tlangzarh nghal a ni.


Khuallian Pu R.Lalzirliana chuan a pianna khua Tualbungin kum 100 a tlin lawmna a hmanpui thei chu a lawm thu a sawi a. Tualbung khua chu rambuai hma atang tawh pawhin khaw taima leh thawkrim, mahni a intodelh leh midangte pan buai ngai lo an ni, a ti. Dikna leh rinawmna nena mipuiten an nun an hman chuan, Tualbung khua nih chu a zahpuiawm ngai dawn lo a ni, a ti bawk a. Zirlaite chu an thiamna leh an finna chu khua leh ramin hma a sawn zel nana hmang turin Art & Culture Minister chuan a chah a. Mizoramin zalenna a sual laia Tualbung inkahna thlenna hmun Pholeng tlang chu Ministry of Culture hnuaia ‘Financial Assistance for Tagore Cultural Complexes’ hnuaia chei that turin hmalak mek a nih thu a sawi a ni.


Tualbung khua hi Pawihbawiha Sailo hovin kai a ni a, rauhsan a nih hnuah a fapa Thangkama Sailo hova luah leh a ni a, heng hunlai hi kum 1890 vela ngaih a ni. Tuna Tualbung khuain kum 100 tlin an lawmna hi Tiluia Sailo in kum 1921 a Tualbunga kai leh champha hriatrengna atana hman a ni a. Hri pui len avangin a hun takah hman theih a ni ta lo a ni.

Tualbung khuain an kum 100 tlin an lawmna pual hian sial pakhat leh vawk pasarih talh a ni a, senso phuhruk nan Pu R.Lalzirliana chuan cheng nuai khat a pe a. Zan lam lawmna hunah Mizoram Cooperative Union President Pu K. Lalchamreia chuan khuallian niin a hmanpui dawn a ni.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments