MZU M.A Economics Gold Medalist 2022 Rinhlui kan belchiang.
Rinhlui tia hriat hlawh, CGPA - 8.216 hmua Master of Arts in Economics Gold Medalist 2022 Lalrinhlui hi Lalrinmawia (L) leh Lalrinchhani te fanu niin, March 25, 1999 khan a lo piang a. Unau hmeichhe pathum zinga upa ber a ni.
Rinhlui te hi Ramhlun South, Aizawl-a cheng leh khawsa niin, Presbyterian Kohhran-a lawi an ni.
Rinhlui'n EXPLORE MIZORAM zawhna a chhannate:
📌 Zirna lam:
~ Pawl 10 leh 12 hi Home Missions School, Zarkawt atangin 2015 leh 2017 khan ka pass a, B.A Economics hi Pachhunga University College atangin 2020 khan ka zova, Pathian zarah M.A Economics hi MZU atangin tha takin kuminah ka zo leh a ni.
📌 I lehkha zir dan?
~ Ka naupanlai atangin zan lama lehkha zir chi ka nih avangin zan dar 9 atangin ka zir tan tlangpui a, zing dar 2 thleng te ka zir thin. Exam lai bik chuan zing lam dar 3/ dar 4 ka thlen châng a awm. Zing lamah erawh ka zir belh tawh ngai lem lo a, zan lama ka zir sa ho ennawn nan ka hmang tlangpui.
📌 Harsatna I hmachhawn dan?
~ Pathian zarah harsatna em em ka nei hran lo a, BA final kan exam hma chiah hian ka pain min boral san a, amaherawhchu, mahni intihnual mai lovin Pathian hnena dil chung zelin ke ka pen ve zel a ni.
📌 Gold medalist i nihna (Subject) leh CGPA?
~ CGPA - 8.216 Master of Arts in Economics
📌 Gold medalist ni tura i beih dan?
~ Gold Medalist nih kher hi ka tum leh duh dan a ni ngai lova, ka zirlaite ka thiam phawt chuan kei chuan ka zirchhan ka chiang ka inti thin. Mahse, thiante leh chhungten duhsakna tawngkamin ka theih tur thu min hrilh thin a, chu chu ka rilru-ah a lang lian em em a, mahni leh mahni ka inel a, thiam inang rengah pawh ka danglam bik tur a ni tihna rilru ka pu chho ta a. Tichuan, 1st semester result a lo chhuah khan pakhatna pathum kan awm a, a aia nasa a bei zelin semester dangah pakhatna ka ni chho ta zel a, a tawpah Pathian malsawmna ka chang ve hlauh a ni.
📌 Gold medalist ni tura i beihnaah faculty lamin an ṭawiawm/pui ṭha chein i hria em?
~ Tehreng mai, a bik takin MZU a kan HOD Miss Lapuii hian zirlaite min ngaihsak em em a, ka râwn ber leh min fuih nasa bertu a ni a, tin, kan faculty dang te pawh ka tibuai nasa thei hle a, WhatsApp lamah te ka va zawt a, a chang leh ka call a, hrilhfiah har deuh te phei chu Google Meet hmang te'n meeting kan nei leh lawp lawp a, Dissertation atan phei chuan Miss Angie, ka supervisor ni bawk hi ka be buai nasa thin hle mai a, anni'n buai pawh sawi lovin min lo chhang zung zung zel a, tin, PUC lama faculty zingah Sir Mawitea leh Sir Hruaitea phei chu tun thlenga ka la tihbuai ngam te an ni a, an chungah hian lawmthu sawi sen loh ka ba a ni.
📌 I zirna atana i chhungte pawimawhna:
~ Ka chhungte hian ka tet te atangin rual ka awh hi an hlau em em a, kan lehkha zir chhohna atan mamawh tam tak kan nei a, mobile phone, laptop, etc., chuti ang zawng zawng chu mi ta awt lo in min siam a, ka mamawh chu min lakkhawmsak zel a, inchhung khurah pawh min awl thiam em em a, tin, ka pi hian bâng lo in min tawngtaisak thin bawk a, support tha tak min pe a ni.
📌 I zirna atana i ṭhiante pawimawhna:
~ Thian ngaina leh ngaihlu mi ka ni a, chuti ang bawk chuan, ka thiante hian ka tana tha tur zel min duhpui bawk. Anmahni mai ni lo in an nu leh pa thlengin kan inkawmngeih hlawm a, anni hian topper ni turin min fuih nasa thei hle. Tin, MZU a ka classmate te zingah pawh Maths hi ka chak lohna ber a nih avangin thiamloh han zawh pawp pawp châng te ka nei a, ning miah lo in min hrilhfiah ziah thin a, Discord a ka thiante, a then chu an hmel pawh ka la hmuh ngai miah loh te thlengin fuihna ka dawng thin a, he Gold Medalist title ka chan theihna tura pawimawh tak vek an ni.
📌 I duhzawng leh ngainat zawngte:
• Rawng - Black & Pink
• Chawhmeh - Ka ei thei vek a, a hun azirin ka insiamrem thei zel, Alu erawh ka ngaina bik hle 😁
• Incheina - Mize nu hnâp an tih hi ka nih lem loh avangin smart taka inchei hun a nih lem loh chuan tlema pa deuh hlek ka ngaina 😅
• Rimawi Lam – Drums leh Ukulele hi ka khawih ber a, vengchhungah te leh platform hrang hrangah kan lo perform ve tawh a, instrument ka khawih hma hian band ah te ka zai thin bawk a, KTP ah solo na hun ka chang ve thin bawk.
• Mizo Ziaktu zingah - KC Lalvunga (Zikpuii pa) & Lalhruaitluanga Chawngte
• Hla - Mizo-ah chuan K. Hminga hla 'Tunge inthlei thei?' tih hi ka duh em em a, Sap hla ah chuan Pink hla 'Perfect' hi ka duh ber. A genre ang zawng chuan Rock music ka ngaithla nasa a, band ah erawh Paramore ka duh ber
• Hla phuahtu - Taylor Swift
• Teacher - Teacher ngainat zual bik sawi tur em em ka nei lo a, ka zirchhohna ah hian min duhsakin biak an nuam em em vek a, a bik takin PUC leh MZU, Department of Economics faculty te hi ka tihbuai nasat theih em avangin ka ngaina in ka ngaisang em em a ni.
• Leader - Abraham Lincoln, BA kan zir lai hian kan Prof pakhatin "Hero of the day" tih topic hmangin presentation min neihtir thin a, Abraham Lincoln hi America president, bâwih chhuahtu ropui tia kan hriat lar a ni a, a chanchin atang hian beih hram hram hlutzia ka hre chhuak a, tun thlengin ka leader duh ber leh ka "Hero of the day" a la ni zel a ni.
📌 Mize ngainat zawng:
~ Fiamthu duh ve tak, midangte tana inpe, mahni nihna anga lang ngam.
📌 Mize ngainat loh zawng:
~ dawheh, chapo, aipui leh aite nei.
~ dawheh, chapo, aipui leh aite nei.
📌 Hobby:
~ Lehkhabu chhiar, games khelh, ukulele nena zai
~ Lehkhabu chhiar, games khelh, ukulele nena zai
📌 Kawppui atan duhzawng:
~ Mawhphurhna hria leh hlen thin mi, midangte zah thiam, ruihtheihthil laka fihlim
Zawhna dang:::
1. A tel lova i awm theih loh:
~ Pathian leh chhungkua
2. I nun kaihruaitu:
~ Pathian thu leh tawngtaina
3. Hringnuna i hlauh ber:
~ Beidawn
4. I tih ngai miah loh tur:
~ Midangte hmuhsit
5. Mizo Tualzal nuna ṭha i tih:
~ Tlawmngaihna
6. Quote i duh ber:
~ "Whatever Your Mind Can Conceive and Believe, It Can Achieve.” – Napoleon Hill
7. Mizoram leh Mizo tualzal nuna Mizo hmeichhiate dinhmun:
~ India ram state dang nena tehkhin chuan Mizoramah chuan hmeichhe dinhmun a tha tawk tawh hle a, hlawhtlinna lamah pawh mipa aiin hmeichhia an tam tawh a, hnathawhna ah pawh hmeichhiate hian hma kan sawn nasa tawh hle. Pathianin ropui taka a duan hmeichhiate hian inchhung sekrek engkim ti chungin fanau an enkawl a, an hna an chawlhsan chuang lo hi hmeichhiate ropuina a ni. Hmeichhiate thlavang hauh turin NGO te leh dân (law) hrang hrang kan nei tawh a, keimah ngei pawh hmeichhiate chunga domestic violence a thlen lohna tura pawl din Mahila Police ah te ka'n tel chho a, hmeichhiate thlavang hi kan hauh nasa ve tawhin an dinhmun pawh a tha chho ve zel a ni.
8. Hnam hmingṭhat leh hmingchhiat kawngah Hmeichhiate'n mawhphurhna:
~ Hnam humhalh hi chu mitin tih tur a ni a, hmeichhiate hian kan timualpho zual bik thin tihna a ni bik loa, Mizo hnam ziarang hi chhawm nung zel ila kan hnam hi a hmingtha a ni mai. Ram pawn leh hnam dang bula kan khawsakin kan nun dan leh kam chhuakte veng thiam bawk ila, hnam hmingchhiatna ah kawng tam takin kan veng thei dawn a ni.
9. Hnam ziarang chawinun kawnga Hmeichhiate mawhphurna:
~ Kan hnam ziarang hi zahpui lo ila, kan chawhmeh te leh kan thuam thlengin inbel tam ila, nu in a fate ei zirtirin inthuam dan dik hrilh thin bawk se, hei hi hmeichhiate tih makmawh a ni. Tuna office leh school a Nilaini apianga Zo thuam inbel an ti te hi a tha hle a, kalpui zel theih ni se ka ti.
10. Mizote tan 'Fa neih tlem' inzirtir hi a ṭulin i hria em?
~ National Population Policy in fa neih tlem leh indanna hman an rawn sawi nasa a, China ah te pawh 'One Child Policy' te an kalpui a, mahse an tihtâwp hnuah pawh ramah a chhe zawngin nghawng a nei ta neuh neuh a. Chuvang chuan Mizote hi hnam tlêm tê kan la ni a, Aadhar Statistics 2021/22 atang phei chuan 1.21 million chauh kan la ni, nu leh pa in an châwm zawh dawn phawt chuan fa hi nei zel mai se tih hi ka ngaihdan a ni a, amaherawhchu châwm zawh loh tur fa erawh pai lo ngam ang u.
11. Mizo hnam ṭhanmawh bawk nia i hriat?
~ Tih tak takna nun leh tei rei peihna kan nei lo hi a pawi ka ti. Tin, ruihtheihthil lama kan kal nasa lutuk nen hian.
12. Mizo hnam damna atana kawng awm nia i hriatte?
~ Hruaitu tha neih chu tupawhin kan duh ang, mahse Economic reform emaw Political reform emaw kan neih hma hian Moral reform hi a pawimawh zual ka ti. Mitin hian kan hruaitute hi dik vek leh rinawm vek tura kan phût ang bawk hian mipuite pawh hi ram hmangaihna tak tak rilru kan put a ngai a, kan attitude kan siam that a pawimawh.
13. Hnam chhan nana Hmeichhiate ṭangkaina leh mawhphurna?
~ Lehkhathiam a pawimawh ber. Tun hnai issue hrang hrang atang pawh hian a hriat viau awm e. Hmeichhia, ram tana mi pawimawh tak tak kan hre teuh tawh ang a, thiamna hi tumahin min laksak theih loh a ni a, chuvang chuan ram leh hnam tana thawka, hnam chhan nana ke pen tur chuan lehkhathiam a pawimawh ka ti.
14. Zirna, Khawtlang leh Kohhran hi?
~ A kalkawp thei. Amaherawhchu engkimah chin tawk a awm. Hei hi chu inhnialna tawp thei lo tur niin ka hria. Mihring kan inang lo a, lehkha zir dan leh rilru chak dan thlengin a danglam a, hun bik fel taka induan thlap chuan a tihkawp theih. Mahse, kan inhmang duh anih chuan midangte aia thawhrim inhuam a ngai thung. Kan thei lo a nih chuan kan zirlaia insawrbing rih mai a tha ka ti a, hruaitute pawhin hriatthiamna sang tak an nei thin, a tawpah erawh Kohhrana lêt leh tluka tha a awm lo.
15. Khawtlang, Kohhran leh nangmah:
~ Ka theih ang tawkin ka inhmang ve a, KTP group committee, Sound committee, YMA Library committee leh section committee ah te member ka ni mek a, music lama kan tui avangin hla zir neuh neuh te a awm lo thei loa, chuti ang chânga ka tel duh a nih chuan midangte aiin ka meng reiin ka zir hnem tur a ni tiin ka infuih thin. Lehkha zir ka induhthawh deuh chang erawh chuan ka tel lui bik lova, tha takin ka pha mai zel.
16. Social Media leh Nangmah:
~ WhatsApp, Instagram leh YouTube hi ka khawih nasat an ni a, hunawl ka neih that deuh hian Valorant hi ka khelh thin vangin Discord ka hmang nasa bawk. Lehkha ka zir duh chuan ka dah thei mai zel, min tibuai em em hran lo.
17. Mizoram ṭhalai tam tak tlakchham:
~ Tlakchham chu mitin tan a inang lo theuh ang, thil tih tumna tak tak kan tlachham furin ka ring a, tin, tih hram hram, beih hram hramna nun hi kan tlachham bawkin ka hria.
18. Mizo ṭhalaite hian ngaihsan tur dik an ngaisangin i hria em?
~ Ngainat zawng leh duh zawng a inan loh ang bawkin kan ngaihsan zawng a inang lo a, a thenin BTS an ngaihsan laiin a then chuan an ngainep em em thung, footballer an ngaihsan laiin football en ngai lo an awm tho. Tupawh ngaisang ila, an incheina te, an hmel leh pian te en lo in khâ dinhmun a chan theih nan khan engtin tak nge a lo thawh, engti anga bei chho nge a nih tih lam hi kan en a pawimawh em em a, Mizo thalaite pawhin chuti ang lam chu an thlir nasa tawhin ka hria. Hemi kawngah hi chuan hmasawnna tur kan la ngah hle in ka hria.
19. Ngaihsan tur dik nia i hriat:
~ Mi huaisen, tum ruh, dikna ngaina mi
20. Hlawhtlinna tura pawimawh:
~ Tum ruhna, mahni inthunun theihna, tawngtai
21. hloh i hlauh ber:
~ Hmangaihte
22. Hnam dang nupui pasal neih hi:
~ Nakin zela hnam tana thil pawi thei tur a ni a, pawlh dal leh chim ral kan nih theihna tur pakhat a ni.
23. Nupui pasal inneih hmaa mipat hmeichhiatna hman hi?
~ Pathian phal loh thil a nih vangin sual a ni a, fihlim a tha.
24. Hlawhtlinna hi?
~ Hlawhtlinna chu harsatna leh hlawhchhamna tam tak karah pawh beidawn duh lohna hi a ni. Rah tam tak a seng kher lo a ni thei, mahse Robert Louis Stevenson khan "To travel hopefully is better than to arrive" a lo tih ang deuh khan, hlawhtling tura a zinkawng, a lo beih fan fanna ah khan tam tak a zir chhuak tawh a, chu lai chu a pawimawh hle bawk.
I thalaipuite tan fuihna---
~ Midangte fuih tur hian ka tling ber lo a, ka tha ber hek lo. Mahse, ka thalaipuite, takna nun nei turin ka duhsak a, kan tum hi sâng se, beidawng duh miah lo ang u! Midangte tan kan phak tawkah theuh malsawmna thlentu nih tum ila, chhungkua ngaipawimawhin tawngtai bansan lo bawk ila, kan ram hian a mamawh ngawih ngawih che u tih rilru ah lo hre thar zel bawk ang u.
EXPLOREMIZORAM.COM i hmuh dan:
~ EXPLOREMIZORAM.COM hi a bengvarthlakin a hlawkthlak thin khawp mai. Keimah pawhin ka ngaihhlut em em website a ni a, in rem hria ka ti a, a buaipuitute in ngaihsanawm khawp mai. Tin, keini ang tana platform min buatsaihsak ringawt pawh hi a lawmawmin a ropui ka ti hle bawk. In kal zelna turah midangte tan malsawmna lo ni zel ula, tangkai taka in website an lo hman zel theih nan te pawh duhsakna sang ber ka hlan a che u.
Explore Mizoram fighting 💪🏻🙏🏻.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: