Aizawl | Nov 25, 2022: Vawiin khan Provisional Employees Association of Mizoram chuan an General Assembly vawi 1-na Aizawl Vanapa Hall-ah an hmang a. Deputy Chief Minister Pu Tawnluia chu khuallian a ni.
Pu Tawnluia chuan sawrkarin provisional employees te a ngaihthah lo tiin an hamthatna tur ruahmanna hrang hrang sawrkarin a siamsak te a sawi a. Provisional Employee lakna tur inkaihhruaina mumal tak siamin a ngheta lak te ang thoa guidelines felfai tak dungzuia lak an ni a, an tlukpui a ngheta thawkte hlawh chanve pek an ni a, increment kum tin 4% pek an ni a, casual leave bakah maternity leh paternity leave an la thei a, TA/DA an bill thei a, medical reimbursement siamsak niin an hlawh atanga zaa pali an bill thei tih Deputy CM chuan a sawi. Regularisation Scheme siam a nih hnuah mi 900 chuang dah ngheh an ni tawh a. PE te dinhmun leh hamthatna hrang hrang ngaihtuahtu tur study team Sawrkarin a din thu a sawi bawk. Pu Tawnluia chuan an telloin sawrkar a kal tak tak thei lo tiin PE kalkhawmte chu anmahni zawn theuhah tha taka hna thawk turin a chah a. Hotute thuawih leh zah thiam, office dawrtute tana dawr nuam ni turin a fuih a ni.
Provisional Employees hi sawrkar department 50 ah mi 8112 an awm mek a. PHE ah tam berin mi 2010 an awm a, a dawttu chu Power and Electricity Department niin 1780 an awm a, PWD ah 1100 an awm a ni.
An pawl General Secretary report atanga a lan danin sawrkar inrenchemna dan avanga PE te Regularisation Scheme khaihlak rih phelh tura an nawrna chu kumin June 28 khan a hlawhtling a. “The Mizoram New Define Contributory Pension Scheme for Provisional Employees, 2018” chu Mizoram Sawrkar DP&AR (GSW) in a duang tawh a, Provisional Employee ten pension an neih theihna tur ruahmanna leh rawtna hi a la kal mek a ni.
Programme hi an President Pu Lalchamliana Tlau chuan a kaihruai a. An Assistant Secretary Pu K.Vanlalnunpuia’n thu a sawi a. An hmalakna chi hrang hrang te sawi langin an member te hmasawnna tur sawrkara an dil mek te leh an bawhzui dan te a sawi a ni.
Vawiin hian kum 2023-2021 atan Officer Bearer thar thlanna hun an hmang a. An hruaitu thlan thar te chu President atan Pu K.Vanlalnunpuia (SAD), Vice President ah Pu Lalbiakzuala (A&T), General Secretary ah Pu RK Zirliana (PWD), Assistant Secretary ah Pu Benjamin Malsawmdawngliana (Vety), Treasurer ah Pu Lalthansanga Varte (PHE), Finance Secretary ah Pi Marina Zothanpuii (DM&R) te an ni.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: