Aizawl | Nov 3, 2022: President Droupadi Murmu chuan vawiin hian ni 2 cham turin Mizoram a rawn tlawh dawn.
Droupadi Murmu hian vawiin chawhnu dar 1 leh minute 50-ah Lengpui ţumhmun a rawn thleng dawn a, heta ţang hian Helicopter hmangin Mizoram University Convocation vawi 17-na hman pui turin Mizoram University a pan ang a. Hetah hian State Sawrkar leh Sawrkar laipui hnuaia hmasawnna tur ruahmanna hrang hrang lung phumin a hawng dawn bawk a ni. Tlai lamah President hian Mizoram University-a zirlai hmeichhe awmte nen inkawmhona hun a hmang ang a, zanah Raj Bhavan ah hun a hmang thung ang. Zirtawpni chawhma lamah Chief Minister leh Council of Minister te nen Raj Bhavan Banquet Hall ah inkawmkhawmna hun an hmang ang a, chumi hnuah chuan Mizoram Legislative Assembly House chhungah thu a sawi dawn bawk a ni.
President hian Mizoram Assembly House-a thu a sawi zawh hian Thuampui Helipad a pan ang a, helicopter hmangin Lengpui ţumhmun a pan leh ang a. chawhnu dar 12:30-ah Lengpui ţumhmun chhuahsanin Sikkim a pan leh dawn a ni.
Aizawl a President a cham chhung hian venhimna khauh taka kenkawh tura ruahman a ni a. Vawiin leh naktukah hian Lengpui, Sairang, ITI Mualpui, Mizoram University, Pachhunga University College leh Raj Bhavan chungah te Remote Control hmang Drone Aerial Camera leh hetiang lam chi reng reng thlawh tir khap a ni a. Aizawl bawrhsapin thupek a chhuah danin thupek bawhchhia an awm a nih chuan an Drone/Aerial Camera te mansak emaw kahthlak sak emaw a ni ang a, an chungah dan angin hremna lek a ni ang. He thupek hian Sawrkar-a Competent Authority in hetiang ti tura phalna bik a pekte erawh a huam lovang.
Aizawl district SP Pu C. Lalruaia chuan President lo zin chhung hian venhimna khauh taka ruahman a nih thu a sawi a. Kawngpui dung, President kaltlang turahte Police ţhahnem tham tak dah an nih tur thu a sawi a. A bik takin a thlenna tur Raj Bhavan leh a chhehvelah te, Assembly House bul velah leh Mizoram University-ah te pawh khauh taka venhimna ruahman a nih thu a sawi a ni.
SP Traffic pawhin lirthei chet dan turah thupek chhuahin Mizoram University leh Raj Bhavan inkara veng hrang hrang - Tanhril, Sakawrtuichhun, Tuivamit, Chawlhhmun, Luangmual, Vaivakawn, Dawrpui Vengthar, Dinthar, Tuikual North leh Tuikual South kawngpui dungah te hian tukin dar 6 atanga tlai dar 6 inkar ah Lirthei leh Bungrua dah a khap a. President hian naktuk (Zirtawpni) ah Mizoram Legislative Assembly House a tlawh dawn avang leh a haw dawn avangin Raj Bhavan atanga Thuampui Helipad inkara veng hrang hrang - Venghlui, Dawrpui, Zarkawt, Chanmari, Chaltlang, Bawngkawn leh Thuampui huam chhung kawngpui dungah te hian zanin dar 9 atanga naktuk chhun dar 12:30 inkar hian lirthei leh bungrua dah a khap bawk.
President kal laiin he’ng kawngpui-ah te hian lirthei tihdin a ngai dawn a, chutiang atana inher rem a, harsatna an tawh lohna tura mahni inruahman tur leh tihdin an nih pawh a dawhthei taka nghak turin lirthei khalhtute an ngen nghal a ni.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: