Ticker

10/recent/ticker-posts

NIT Mizoram-in Convocation vawi 6-na hmang; "hmachhawp lian zawk leh harsa zawk hmachhawn tura bul tan thar leh na ni a ni" - Governor

Aizawl  | Nov 16, 2022: National Institute of Technology Mizoram (An Institute of National Importance, Ministry of Education, Govt of India) chuan nimin  tlai khan MZU Auditorium, Mizoram University, Tanhril-ah Convocation vawi 6-na an hmang a. He hunah hian Governor Dr. Hari Babu Kambhampati chu khuallian a ni a. Convocation program hi Prof. S. Sundar, Director & Chairperson, Board of Governors, National Institute of Technology Mizoram chuan a kaihruai a ni.


Governor Dr. Hari Babu Kambhampati chuan Engineering College-ah Professor hna a thawh tawh thin thu sawiin Engineering college tha bika chhal NIT convocation a hmanpui thei chu lawmawm a tih thu a sawi a. Engineer zirlaite fuihin chona lian tham zawk hmachhawn tura inbuatsaih turin a chah a ni. Graduation Day chu zirlai hlawhtling te tan zin kawng tawpna ni a ni lova; thiamna degree nei tura  thawhrah an seng ni chiah a la ni a, hmachhawp lian zawk leh harsa zawk hmachhawn tura bul tan thar leh na ni a ni, a ti.


Engineer te tan chuan suangtuahna liantham neih a ngai a, thil thar, nitina kan khawsak tiawlsamtu leh hmasawnna thlen thei thiamna emaw thil hmuchhuak tura chawl lova ngaihtuahna sen char char a, naupang ang maia dil chhuta, thil chik taka thlir a, thil ngaihtuah a ngai tih a sawi a. Thil harsa nia lang te chu chona anga hmachhawn zel mai tur a ni a, hetiang rilru pu te hian thil thar an hmuchhuak chawk a, thil tangkai an siam chhuak thin a ni a ti.

Governor chuan Prime Minister Narendra Modi in a lo hmathlir “New India – India, ram ropui leh thil ti thei zawk” in a tak ram a chan theihna turin Engineer te kokiah mawhphurhna pawimawh tak a innghat a ti a. Tunlai khawvelah chuan kawng engkimah “Data” a pawimawh em em vek a. Hei vang hian “data science” huangah intihsiakna a awm mek a. Data Science behchhan hian kan hnathawhna tur tiawlsam turin technology thar miin an hmuchhuak a, hmasawnna lian tham tak tak a awm mek tawh avangin vawiina NIT Engineering Graduate te pawh helam hawia ngaihtuahna an sen a ngai a ni a ti.


Engineering Graduate te chu zirna huang dang atanga graduate tawh te ang bawkin khawtlang leh ram tana rawngbawlna huangah mawhphurhna an nei tih a sawi a. Ram hmasawn leh khawtlang hmasawnna atana theihtawp chhuah turin degree nei thar te chu a fuih a. Mi hnuaia thawh tum mai lovin entrepreneur nih tum a, midang te tana eizawnna siamtu nih tuma, ram chhung sum leh pai peipunna kawnga hlawk taka thawk chhuaktu ni theuh turin a fuih bawk a ni.

Governor thusawi kimchangin (sap tawngin):

NIT Mizoram Convocation vawi 6-naah hian zirlai 158 in degree an dawng a. Heng zinga 126 chuan Bachelor of Technology(B.Tech), zirlai 26 in Masters of Technology( M.Tech) leh zirlai 11 in Doctor of Philosophy an dawng a ni.

NIT Mizoram atanga zirchhuak B.Tech zinga 70% hian an degree neih rual hian hna tha tak tak an hmu nghal a; heng zinga hmu tha ber chu Electronics & Communication Engineering graduate an ni. 2018-22 batch te hian Larsen & Toubro, Infosys, Vedanta, Samsung Electronics, Alstom, Deloitte USI, 314e Corporation, ThoughtSpot, Albatronix Consulting, Info Edge, Valiance Solutions, Tata Consultancy Services, Centre for Development of Advanced Computing (CDAC), Publicis Sapient, Tata Power, Anheuser-Busch InBev GCC, Cogoport, tec., ah te hna an hmu nghal a. An zinga hlawh hmu sang pawl chuan a bul tan nan kum khat chhungin Rs 17 lakh an hlawh pha nghal a ni.

Prof. S. Sundar, Director, National Institute of Technology Mizoram in a mawhphurhna a rawn lak hnu hian zirlai titha zual puala lawmman leh chawimawina a siam thar nual a.  Heng lawman te hi ‘Institute Blues’ for B. Tech Top Student, ‘Best Thesis’ for PhD students in Engineering and Basic Science & Humanities and Social Science, ‘Best Faculty through Research and Development’, ‘Best Officer’, leh ‘Best Staff’ for administrative staff te a ni.  Heng lawmman te hi vawiina convocation program ah hian a dawngtute hnenah a vawikhatna atan hlan a ni a. Praveen Akurathi, Department of Electronics and Communication Engineering chuan  ‘Institute Blues’ chawimawina a dawng a, Surendra Kumar Patel, Department of Mechanical Engineering in  ‘Best Thesis’, Prof. Ajmal Koya Pulikkal, Department of Basic Science & Humanities and Social Science chuan ‘Best Faculty through Research and Development’, Pi. Lalthianghlimi Zote, Deputy Registrar chuan ‘Best Officer’ leh Pu Benjamin Lalbiakmuana, Superintendent ten ‘Best Staff’ award te an dawng a ni. Hun tawpah Governor Hari Babu Kambhampati hnenah hian Programme memento chu Prof. S. Sundar, Director & Chairperson, Board of Governors, National Institute of Technology Mizoram chuan a hlan bawk a ni.

Convocation Program-ah hian  Dr. Lalthanchami Sailo, Registrar & Secretary, Board of Governors & Senate, National Institute of Technology Mizoram, Dean Academics Dr. Rudra Sankar Dhar, Dean Student Welfare Dr. Konthoujam Gyanendra Singh, Dean Planning & Development Dr. Bijayananda Mohanty, Dean Faculty Welfare Prof. Ajmal Koya Pulikkal, Dean Research & Consultancy (i/c) Prof. Alok Shukla, Head – Department of Civil Engineering Dr. Ricky Lalthazuala, Head – Department of Computer Science and Engineering Dr. Sandeep Kumar Dash, Head – Department of Electronics and Communication Engineering Dr. Sushanta Bordoloi, Head – Department of Electrical and Electronics Engineering Dr. Suman Majumder, Head – Department of Mechanical Engineering Dr. Saurav Suman, Head – Department of Basic Science & Humanities and Social Science Dr. Surender Ontela, Board of Governor te, Senate member te, mi pawimawh sawmbik te, faculty te, staff te leh zirlai nu leh pa te an tel a ni.


Thuthar thehdarhtute zawhna chhangin NIT Mizoram director chuan, NE-a NIT tha berah NIT Mizoram hi siam kan tum a ti a, tunah pawh hian zirna lamah chuan NE-ah a tha pawl kan ni mek, a ti.

NIT Mizoram campus chungchanga zawhna chhangin, Riverine Reserved Forest-in a tihbuai vanga harsatna tawk an nih thu leh, kum khat emaw chhunga an intihfel thuai a beisei thu a sawi.


Thawktu lak belh chungchangah, hun rei lote chhungin Non Teaching staff lak belhin post ruak awm an hnawhkhah tur thu a sawi bawk.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments