Minister Pu Lalruatkima’n Foundation for Drug-Free Mizoram, High Council Vawi 2-na a hmanpui

Aizawl | Nov 13, 2022: Nimin khan Foundation for Drug-Free Mizoram High Council Vawi 2-na Synod Conference Centre, Mission Vengah neih a ni a, he hunah hian Pu Lalruatkima, Minister I&PR chu khuallian  niin a hmanpui.



Khuallian Pu Laruatkima chuan thu sawiin, Foundation For Drug-Free Mizoram ten ruihhlo that lohzia inzirtirna (awareness) kawnga an hmalak thinna chu fakawm a tih thu sawiin, Zirna In leh Sunday School ah te awareness programme nei a an chechhuak thin te, thalai singkhat zet hnena ruihhlo laka fihlim tura intiamna an neihpui thei chu lawmawm a ti a. Mizoram chu International Drug Traffic Route-a awm kan nih avangin ruihhlo in kan ram a tibuai nasa hle a, nasa takin min chimral mek zel a, chutiang kara ruihhlo dotu tur pawl te an lo chhuak zel chu lawmawm a tih thu a sawi a ni. Mizoram sawrkarin theih tawp chhuahin ruihhlo a do thin a, chutih rualin sawrkar leh mipui inkarah thawh hona tha a pawimawh thu sawiin, NGO-ten ruihhlo do a an hma laknaah theih tawp chuah zel turin a ngen bawk.


Minister chuan ruihhlo dona kawngah hian sawrkar leh NGO te mai bakah hian Nu leh Pa ten mawhphurna sang tak an neih thu a sawi a, Drug-Free Mizoram hi a hlawhtlinna tur chuan chhungkuaah bul kan tan a ngai a ni, a ti. ‘Addict’  tih tawngkam kan hman apiangin ruihhlo lam ni lovin taimak leh hnathawh lam zawk he tawngkam hi kan kawhtir theihna turin tan kan lak zual zel a ngai a ni, a ti a. Mizoramah hian addict te tan Home awm nualin, an hnawthawh ropui hle mahse heng De-addiction Home neih avang hian mipui te kan inthlahdah deuh thin niin a lang thu a sawi a. Ruihhlo ngai te hi kan hnampui te, kan thisen zawmpuite an nih avangin hmangaih tak leh duat taka theihtawp chhuaha kan enkawl an mamawh tak zet thu a sawi. I&PR Minister chuan chhungkua atanga bul kan tan that a zirtirna dik kan pek a ,chu chu School leh Sunday school lamah zirtirna pek chhunzawm an nih chuan ruihhlo lakah hian kan tu leh fate kan venghim thei dawn a ni a, ti.


Mizoram hi a chhe zawngin kan sawi fo a, ruihhlo tamna a ni kan ti thin a, a dikna chen pawh awm tho ,mahse mi tha leh fel tak tak Kohhran leh khawtlang tana theihtawp chhuah, an thiamna leh finna hmang tam tak an awm thu Minister chuan a sawi a. Kan ramin thatna lai kan neih te pawh hi sawi tam a hun tawh a, mi tha leh fel te chu kan Idol te an nih theihna turin kan inzirtir pawh a tul hle a ni, a ti . Social Media kan hman nasat thu leh, a bik takin thalaiten a tha lam aiin a chhe zawng atan an hmang uar niin a lang a, hei hian kan ‘moral value’ tam takin a tichhe mek nia a hriat thu sawi bawkin Minister chuan Social Media kan hmanna kawngah pawh zirtirna tha neih zel a tul a ti.


Foundation for Drug-Free Mizoram te chu an dinna rei lo hle mahse an member te inpekna avangin hlawhthlinna an hmu chho mek zel chu lawmawm a tih thu Minsiter chuan a sawi a, Mizoram thalai te ruihhlo laka an fihlimna tura an kalzelna turah duhsakna a hlan nghal bawk a ni.


Nimina Foundation for Drug-Free Mizoram, High Council neih hi an Founding President Lalnunthara chuan a kaihruai a, General Secretary, C. Lanundika’n report peiin an member kal ta te sunna hun leh Life Member leh Patron Member thar te hnenah Certificate hlanna hun an nei nghal a ni.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post