Ticker

10/recent/ticker-posts

HREHAWM I TAWRHTE KHA SAWTPUI NGEI TUM RAWH*

 _Nun duhawm zawk nei tura inbuatsaih dan_

— Rick Warren 

— November 2, 2022


“Thil chuti zozai chu sawtpui lovin in tuar em ni? Sawtpui lo ni tak tak ta ang sela.” Galatia 3:4

Bibleah hian harsatna tam tak paltlang hnu pawha nunkawng min kaihruai thei a awm ṭeuh a. Nimin lamah a hmasa ber atan: Chiaina hmachhawn ṭhin turah inngai rawh tih kan zir tawh a. Vawiinah chuan a pahnihna atan: *Zirlai pawimawh atan hmang rawh* tih kan zirho leh ang.

Harsatna i paltlang chu nawtreha thil thar i ngaihtuah hmain han ngaichang leh lawk la, Pathianin eng nge zirchhuah i neih tih ngaihtuah turin a duh che a ni. I hrehawm tawrhte chu sawtpui miah loin liamtir suh. I tawnhriat tawhte aṭangin eng nge thlarau lama thutak chu hriat tum rawh.

Bible chuan, “Thil chuti zozai chu sawtpui lovin in tuar em ni? Sawtpui lo ni tak tak ta ang sela" tih kan hmu a. Galatia 3:4

Hun harsa tak i paltlang tawh sawtpui dan pakhat chu zirlai pawimawh i zirchhuah apiang ziahchhuah zel hi a ni. Chutiang chuan nakin hnuah pawh ṭhangthar zawk te nen pawh in thlir let thei ang.

Chutianga i tih chuan eng nge lo thleng ang? Tawrhna i paltang tawhte chuan awmze thuk tak an nei hlawm ang. Deuteronomy 4:9 ah chuan, “Engpawh ni sela, fimkhur ula, ngun takin invawng phawt mai rawh u; chuti lo chuan in mitin a thil hmuhte chu in theihnghilh ang a, in dam chhûngin in thiinlung ata a bo dah ang e; in fate leh in tute zirtir rawh u."

Nangmah chauhin ngaihtuahna fim taka senna hun hmang la ziak ang che. Chu chu nangma nun inziahna zel a ni. Nun zirna chu nitina thil thleng ziah hi a ni ngawt lo va. Ṭhangtharte chuan i hun liam tawhah khan eng nge i lo tih tawh tih ai chuan eng nge i zirchhuah tih an ngaihtuah zawk ang.

Heng zawhnate hi i nun zirna ah chuan i inzawt thei ang:

Eng thil nge pawimawh ber tih eng nge ka zirchhuah?

Eng thil nge pawimawh nep deuh tih ka zirchhuah?

Ka chak lohna lai engte nge ka zirchhuah?

Ka chakna lai engte nge ka zirchhuah?

Inlaichinna chungchang eng nge ka zirchhuah?

Ka nun danah eng nge zirchhuah ka neih?

Pathian chungchangah eng nge zirchhuah ka neih?

Khawvel leh hnam hrang hrang tih dan eng nge ka zirchhuah?

Sum chungchang eng nge ka zirchhuah?

Hlimna chungchang eng nge ka zirchhuah?

Hriatreng tur atan chuan harsatna i paltlang hnu a nun bul i ṭan thar leh hmain i thil zirchhuah zawng zawng te ziak vek ang che. Tichuan Pathianin i tana a thiltihte i hrereng anga, zirlai zir nawn ngai a ni tawh lo vang.

Ngaihtuah zui atan

* Ziaka thil chhinchiah zel hi i ti ve ṭhin em?

* I tawrhna paltlang tawh aṭang khan eng nge zirlai pawimawh ber?

Mi dangin an hlawkpui theih nan engtin nge i sawichhuah ang?

* Hun harsa i paltlang laiin damchhan nei loah i inngaih chang a awm ṭhin em? Hun liam tawha i thil zirchhuahte ngaihtuah letna hun hmang la, Pathianin a hman hun tur che thlir ngawt mai rawh!

*Pathian zalenna chu vawiin hian i ban phakah a awm e*

Pathian chuan Isua ringtute tan chuan thiamloh chantirna reng a awm tawh lo tih min hrilh a. I sualna laka chhandam turin Isua a rawn tir a. I thil tih sual tawh leh la tihsual tur zawng zawng te pawh krawsa a thihna chuan a tlak fai vek a ni. A inhlanna avang chuan a felna kan lo hmu a, Isuan Pa Pathian nena inzawmna kan neih theih nan hna min thawhsak a ni.

Chanchin ṭha chu chutah chuan a tawp mai lo. Pathianin thihna hnehin Isua chu a kai tho va, sualna leh thihna chu a ngam ta tih a tichiang a ni, chuvang chuan chatuanin vanramah amah nen kan leng dun thei dawn ta a ni.

I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.

“Lalpa duh tak, misual ka ni tih ka inhria a, chu vang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawh ṭanna atana pawimawh te a thlawnin ka lo thawn ang che.

*[Lettu: Sangpuia]*

Post i hmuh dan

Post a Comment

0 Comments