CM-in Mamita Circuit House, damdawiin leh sawrkar hmalkna dang tlawh

Mamit | Nov 29, 2022: Chief Minister Pu Zoramthanga chuan vawiin khan Mamit ah kalin, Circuit House leh 100 bedded hospital leh District Sports Complex siam hmalakna te leh Mamit Multipurpose Indoor Stadium te a hmunah tlawh in a enfiah.

Chief Minister hi Sports & Youth Services Minister Pu Robert Romawia Royte leh Mamit bialtu MLA, Road & Infrastructure Development Board Vice-Chairman ni bawk Er. H. Lalzirliana te'n an tawiawm a ni.




Chief Minister chuan Mamit khaw changtlun zelna tur atana hmalakna hna thawhte chu fakawm tiin, belhchian dawl tak turin thawktute'n uluk taka an sak a beisei thu a sawi a. Heng hmasawnna ruhrel hrang hrangte hi khawtlang leh a bik takin thalaite hmasawnna tur atana din a nih angin, mipui pawhin a tir atanga neitu rilru pu zel se a ti a ni.

Mamit Circuit House hi June ni 13, 2019 atang khan sak tan niin, July ni 16, 2021 khan zawh a ni a. Rs. 273.34 lakhs sen niin, ram 293.38 metre bial a zau a awh a ni. Chhawng thum awmin, basement floor ah dormitory, dining hall, kitchen leh store a awm a. Ground floor ah reception area leh office bakah riahna room (ordinary) te, First floor ah suite room (3) leh VIP room (2) a awm a. Dormitory bakah riahna hi a vaiin 9 a awm a ni.


Sports and Youth Services Department kaltlangin PMJVK atanga sum hmuhin District Sports Complex din hna thawh mek a ni a. A hmunpui tur Bawngva bakah DC ground-ah Futsal ground leh Tennis Court pahnih siam ni dawn in, multipurpose hall sak a ni bawk a. Chief Minister hian DC Ground a hna kal mek chu a enfiah a ni.

Heng bakah hian SYS hnuaia Mamit Multipurpose Indoor Stadium sak mek chu a enfiah bawk a. Heihi SEDP atanga Rs. 4.62 cr leh Special Assistance to States for Capital Investment (SASCI) atanga Rs. 7.88 cr hmuh, belhkhawm in Rs. 12.50 Cr hmanga sak a ni.

100 bedded hospital sak mek hi Power Finance Corporation atanga an CSR kaltlanga Rs. 17.93 dawn hmanga sak a ni a.

Chief Minister hian chawhnu lamah Mamit Chhimveng Branch YMA Hall-ah vantlang inkhawm a hmanpui nghal bawk a ni.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post