Ticker

10/recent/ticker-posts

Chief Minister in OP-12 Bio-Fertilizer Production Unit a hawng

Aizawl | Nov 7, 2022: OP-12 Bio-fertilizer Production Unit, SEDP hnuaia Agriculture Department in a buatsaih chu tukin khan Chief Minister Pu Zoramthanga chuan khuallian niin Agriculture Research Farm, Neihbawi, Sihphir-ah a hawng. Agriculture Minister Pu C. Lalrinsanga chu khual zahawm a ni a, Agriculture Development Board Vice-Chairman, Pu Biakzauva pawhin he hun hi a hmanpui.


Khuallian Chief Minister Pu Zoramthanga chuan kuthnathawktu te tana hlawkna nasa tak thlen thei tur OP-12 Biofertilizer Production Unit hawn theih tura peih fel a ni chu lawmawm a tih thu sawiin, he Biofertilizer siam chhuah hmang hian agriculture leh horticulture kalphungah nasa taka danglamna siamin hma a sawn phah ngei a beisei thu a sawi. Leilung ngheng a eizawnna, a bik takin agriculture leh horticulture kan tih te hmanga sang taka economy khaikan theihna potential Mizoramin a neih that zia sawiin, Chief Minister chuan chung zinga pawimawh tak pakhat chu leitha a ni, a ti a. Hetianga mahni ram ngeia fertilizer tha leh him siamchhuah a ni chu ropui a ti a. Tharchhuah tam kawngah pawh thui tak a pui ngei a beisei thu sawiin, productivity a tam chuan a lei duh tu pawh a awm zel thu leh, a kawng erawh dapchhuah thiam a pawimawh thu a sawi a. Heng hmalaknaah hian cooperative society pawimawhna tarlang tel bawkin, hmasawn zel duh avanga hmathlir tha tak nen a kuthnathawktu an intelkhawm chuan pawl pawh a ngelnghet in hlawhtlin a awl zawk thu a sawi bawk.

Khualzahawm Pu C. Lalrinsanga chuan kuthnathawktu te tana bung thar thlen thei tu programme kan nei thei hi lawmawm a tih thu a sawi a. Kalkhawmte hmaah hian Agriculture Department hmalakna hrang hrang te tarlangin Lengpuia Biocontrol Laboratory, RIDF, NABARD hnuai a din mek te, NEC hnuaia “ Aeroponic Technology” hmanga Alu chi siamna tur Project Thingdawl Agriculture Farm a hmalakna kalpui mek te pawh a tarlang bawk.

He Programme ah hian Dr. Samuel Lalliansanga, Deputy Director in Technical Report pein Project lo intan dan tlangpui a tarlang a. He Project hi kan Chief Minister Vision tih hlawhtlinna anih thu tarlangin Mizorama Loneitu ten hlawk zawka an thlai chinte Chemical fertilizer tel lova an tharchhuah theihna tura hmalakna pawimawh tak a nih thu a tarlang a. He Project hi kum 3 chhunga SEDP hnuaia kalpui turin kum 2019 ah approved a ni a, he project kalpuina tur hian Rs. 125.31 lakh ruahman a ni.

He Project hnuaiah hian Research Institute leh University - Biotechnology Department, Mizoram University leh CSIR – North East Institute of Science & Technology , Jorhat ten en Agriculture Department chu thawkhoin 2019 atanga bul tan anih thu report a ni bawk. Biofertilizer Production Unit siamna tur atan a Technology hi CSIR-North East Institute of Science & Technology, Jorhat Patented Technology niin hemi atan hian Agriculture Department leh CSIR-NEIST, Jorhat te chuan 2020 khan MoU, Turn Key Project a kalpui turin an lo siam fel tawh a ni. He Bio-fertilizer Production Unit atanga siam chhuah Bio-Fertilizer ah hian micro-organism kengtu (carrier) atan Talc Powder hman a ni a, thla 6 chhung a dah that theih a ni. Buh leh thlai chi hrang hrangah a chi chiah nan (Seed Treatment) leh leilung sawngbawl (Soil Application) atan a hman theih a ni. Neihbawia Bio-fertilizer siamna hmun a?ang hian batch khatah Biofertlizer quintal 18 a siam chhuah theih a ni.

He Project hnuaiah hian Mizoram University te hian hmun hrang hrang atangin Soil sample te lakhawmin kan Leilung a hrik tangkai (Plant Growth Promoting Bacteria) hrang hrang te zir chianna an nei mek bawk.

Vawiina OP-12 Bio-fertilizer Production Unit hawnna programme hi Pu J. Hmingthanmawia, Secretary, Agriculture chuan kaihruaiin Pu James Lalsiamliana, Director, Agriculture Department chuan lawmthu sawina hun a hmang a. Loneitu thahnem takin an chhim bawk a ni.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments