Argentina leh FIFA World Cup (1930 - 2018)

byAdmin — 0
- K. Remruatfela

 
World Cup 1930:
He World Cup hmasa berah hian Argentina Football team South America khawmualpui aiawh team 7-ah tel ve in Group – A ah Chile, France leh Mexico ten en awm hovin an tumpui zawng zawng an hneh vek a. Group winner an ni nghal bawk. Group Winner an nih avangin Semi Final an in pet thleng nghal a. Semi Final-ah hian an tumpui United States of Amercia chu 6 - 1 laia hnehin Final-ah a thlengtu Uruquay team nen an intum a. A vanduai zawkah an tang ta hlauh a ni. He World Cup hmasa berah hian Argentina Football team innghahna ber chu Guillermo Stabile niin game 5-ah goal 8 lai a thun hman a. Top Scorer atana thlan a ni nghe nghe. World Cup 1930 hi football khawvela Argentina pholangtu ber a ni.


World Cup 1934:
​Hemi tum hian ram 16 an tel a. A hma anga group stage awm tawh lovin “Single-elimination Tournament” niin Mizo ten kan hriatthiam dan tur chuan vawi khat chak lova tlak nghal an tih ang chi khan an khel a. Vanduaithlak takin Sweden Football team te chu 2 – 3 in an hneh lova, puanthuah an tel zui ta nghal a. 



World Cup 1938, 1950 & 1954:
Hemi World Cup pathumah hian Argentina Football Team hi anmahni duh thuin an tel lova. Hei hi chhan ber chu politics thil vang a ni. World War II in tan lai leh a zawh hlimchhawn velte a nih avangin Argentina ram rethei tak tan chuan Football lama insawrbing thei dinhmunah an ding lo va, an hmel kan hmuh loh phah a, a pawi tak zet a ni.


World Cup 1958:
Group 1-ah West Germany, Northern Ireland leh Czechoslovkia te nen an awm ho a. Northern Ireland chiah hnenah an tumpui pahnih dang te erawh an hneh zo ta lova. Group stage-ah a vanduaiah an tang.


World Cup 1962:
Argentina Football thih hunlai vel a ni a. Hemi tumah pawh hian goal difference-ah England hneh lovin group stage an paltlang zo leh ta lo a ni.


World Cup 1966:
Group 2-ah West Germany, Spain leh Switzerland te nen an awm ho a. Hneh loh nei lova awmin Quarter final an in pet tling a. Amaherawhchu, knock out stage hmasa berah hian vanduithlak takin a hnua champion team ni ta, England Football team chu an hneh zo ta lova. Beiseina a thamral leh ta.


World Cup 1970:
Argentina Football team tana chhiatna rapthlak tak thlengin World Cup khel turin an inpet tling zo ta lova. Hei hi World Cup khel tura an inpet kai zawh loh hmasa ber a nih bakah vawiin thlengin a awm chhun a la ni.


World Cup 1974:
Group 4-ah Poland Italy leh Haiti ten en awm hovin group runners up an ni a. Hemi tum World Cup hi system dang deuh hlek hman a ni a. Group 4-ah inthenin group khata a sang ber leh dawttu te chu group 2-ah an inthen leh a. Chu chu a hmingah ‘Second Group Stage’ tih an vuah a. Group 1-ah Netherland, Brazil leh East Germany te nen an awm ho a. Vanduaithlak takin hneh nei lovin an thlen chin an duhtawk pui leh ta mai a ni.


World Cup 1978:
A thlengtu an nih kum a ni bawk a, khawvelin Argentina chhul chhuakte football lo thiam thin zia a taka an hriatna a ni tih hial thei tur khawpin hemi tum World Cup hi an game a mawiin an khel tha a, a vawikhatna atan champion nomawi an chawi hial nghe nghe a ni. Hemi tum world Cup a Argentina players innghahna te chu goal 6 lai thuna, Top Scorer ni bawk, Mario Kempes leh an Centre-back, Captain ni bawk, Daniel Passarella te an ni a. Anni pahnih hian champion nomawi an chawi theihna kawngah an thawhhlawk hle.


World Cup 1982:
He World Cup hian ngaih pawimawh a hlawh bik em em na chhan pakhat chu khawvel mihring piang tawh zinga mi tam takin football thiam bera an ngaih, Diego Armando Maradona World Cup khelh hmasak ber tum a nih vang a ni. Kum 21 lek la ni mah se, Argentine players inngahna ber a ni der tawh a. Tin, tournament chhung zawnga mipui mit fukna ber pawh a ni. Amaherawhchu, defending champion, Argentina Football team te hi mipuite beisei angin an thleng sang lo hle a. Second round-ah puan thuah an tel fer der a. Maradona goal hnih pawhin dinhmun sang a thleng pui zo ta lo.


World Cup 1986:
Vawiin thlenga mi tam takin footballer piang tawh zawng zawnga thiam ber leh ropui ber chu Diego Armando Maradona hi a ni an lo tih fo thin chhan chu hemi tum World Cup hi a ni ti ila tuman sawi sual min tih ka ring lo. Khawvel football history ina a sawi hmaih theih tawh loh tur ‘Hand of God’ an tih fo thin kha hemi World Cup chhunga thil thleng a ni. Field laia atanga ball lo thlawk tha zet chu England goal keeper, Peter Shilton man hman rual lova rang mangkhengin Maradona chuan a ti lut a. Vawiin thlengin England mipui mittui ti tla tu a la ni.


Tin, World Cup awm tawh zawng zawng goal mawi ber anga an la sawi fo, field lai tak atanga Maradona khalh goal kha hemi World Cup tournament chhungah tho a ni a. England nen an intum tum bawkin a ni. An thiampuipa, Maradona that vanglai tak a ni bawk a. Hemi tumah hian Argentina te chuan Final-ah West Germany hnehin a vawi hnihna atana Argentina chuan nomawi an chawi leh a. Diego Armando Maradona pawh a team te a chat thatpui em avangin ‘Golden Ball’ award hial a dawn phah nghe nghe.


World Cup 1990:
Mi tam takin he World Cup an theihngilh theih tawh lohna chhan chu FIFA World Cup hla lar leh chul thei lo ‘To be no.1’ tih hla lo chhuahna a nih vang a ni ber a. Hemi tumah hian champion lai, Argentina chuan Final an in pet kai leh ta tho a. Amaherawhchu, si 1 faia West Germany hneh lovin an vanduai hlauh a. Italy leh Brazil ten record an lo siam tawh, a zawna World Cup nomawi chawi chu an hlen chhuak thei ta lo a ni.


World Cup 1994:
Kum 1986 World Cup-a hming lo chher tawh tu, Diego Armando Maradona tan chuan he World Cup hi anchhia a ni thung a. Intih chakna damdawi a eia puh a nih avangin loh theih lova tournament chhung ngeia inthiarfihlim tura hriattir niin World Cup a khelh tawp ber a ni zui ta nghal a ni.

Amaherawhchu, Gabriel Omar Batistuta leh Cluadio Canniggia te that vanglai tak a nih avangin Maradona awm lo pawh lang em em lovin an awm theih phah a. Second Round hial inpet tlingin Romania lakah a vanduaiah an tang hlauh mai a. Champion nomawi zinkawng chu a thamral zui ta a ni.


World Cup 1998:
Maradona tel lova World Cup an hmachhawn lehna hmasa ber a ni a. Chutihlai erawh chuan rawlthawr players tha tak tak – Roberto Ayala, Hernan Crespo, Ariel Ortega, Claudio Lopez, Juan Sebastian Veron etc. te lo dawk chhoh vanglai a ni bawk a, mipui mit fukna berte zinga mi erawh an ni. Hemi tum hian quarter final hial inpet tlingin Dutch (Holland) team lakah an vanduai ta hlauh a. Nimahsela, an lawmna ber chu Round of 16-a an hmelma kumhlun, England an hneh kha a ni ngei ang.


World Cup 2002:
Hemi tum hi World Cup awm tawh zawng zawnga Argentina players that vanglai ber ni-a an sawi thin a ni a. Gabriel Omar Batistuta hova players tha tak tak – Hernan Crespo, Juan Seebastian Veron, Claudio Lopez, Pablo Sorin, Jabier Zaneeti, Pablo Aimar, Walter Samuel, Ariel Ortega, Diego Placente, Diego Simeone etc te fuankhawmna a ni bawk a, champion no mawi chawi tura rin kai ber pawh an ni. Amaherawhchu, an Captain, khawvela defender tha bera ngaih, Roberto Ayala inhliam an tuar deuh nge, knock out stage pawh inhlang kai zo lovin group stage-ah an tla a, an hmelma kumhlun England in an tlawm bawk a, zahna kawnah anmahni tan tute an din tir a, an lainatawm hle.


World Cup 2006:
Kum 2006 World Cup hi Argentina Team thar inchherchhuah lai ti-a sawi thin a ni a. Players hranghlui tam zawkte tel lovin rawlthar tha za rual – Riquelme, Saviolla, Carlos Tevez, Lionel Messi etc. ten team an awi nung. Group stage lama an chet that em avangin mipui beisei pawh a sang chho hle a. Amaherawhchu, vanduaithlak takin quarter final game tang takah Germany team te chu penalty-ah an hneh lo hlauh a. Uiawm takin an World Cup final zin kawng chu an titawp ta a ni.


World Cup 2010:
Tu pa hnial rual lova Lionel Messi in football khawvela ro a rel lai niin Argentina football history-a hmatawng an neih that hunlai bera sawi thin a ni bawk a. Chumai bakah khawvel piang tawh zawng zawng zinga mi tam takin football thiam bera an ngaih, Diego Armando Maradona ho-na hnuaia khel an ni bawk a, nomawi chawi thei tur zinga rin kai berte zinga mi hial pawh an ni phak. Chutihlai erawh chuan an chakna a kal tluan viau laiin quarter final-ah bawk German ral lian lakah si 4 fai laiin an tlawm nawn leh tlat mai.

 
World Cup 2014:
Kum 24 zet an nghah hnua World Cup final an thlen lehna hmasa ber a ni a. Nimahsela, extra time-ah si 1 faiin Germany lakah bawk an tlawm nawn leh a. German ral lian hnungkhirhna hun tha  a la her chhuak thei meuh lo a ni. Hemi World Cup-ah hian Lionel Messi a che tha fal em em a. Golden Ball a dawng nghe nghe. Tin, hmatawng dang - Higuain, Lavezzi leh Sergio Aguero te that vanglai tak a ni bawk a, champion mai thei dinhmuna mipuiin an rin tehlul nen hun pek belh tawp dawn tepah Mario Gotze an ngam ta leh lo si a. World Cup nomawi chawi lo bawkah a tawp an khar leh a ni.


World Cup 2018:
World Cup hnuhnung berah hian Argentina football team te hi an che chhe tak zet a. Group stage lamah Croatia lakah mualphovin Iceland pawh an draw pha tawk a. Harsa tak chunga Round of 16 an kai hnuah, France lakah an tlawm zui leh ta hlauh a. World Cup trophy chawi chaka tuihal, Lionel Messi tan chuan anchhia a ni hawt e! A lehlamah chuan hemi tum hian Argentina players te hi duhthusamin an tha tawk lem lo hle a. Players tawnhriat ngah zawk ten an chawlhsan pheuh pheuh avangin team thar an in din tan hun lai mek a ni a. A nghawng chu sawi ngai lovin a hril chho ta zel a nih kha!






(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)


Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post