Ticker

10/recent/ticker-posts

Aizawl Mayor-in Local Council te Sustainable Development Goal tihhlawhtlin kawnga inelna tur hawng

Aizawl | Nov 2, 2022: Aizawl Mayor Pu Lalrinenga Sailo chuan vawiin khan Directorate of Economics & Statistics Conference Hall, MINECO-ah Sustainable Development Goals (SDGs) tihhlawhtlin kawnga Aizawl Municipal Corporation huam chhunga Local Council thlanchhuah 19 te inelna tur “Urban Indicator Framework for Localization of SDGs” a hawng a, he hun hi Aizawl Deputy Mayor Pu R. Thanglura, Municipal Corporator-te, SDGs Core Committee memberte, Planning Department officialte leh Local Council aiawhten an hmanpui a ni.


Hawnna inkhawmah khuallian Pu Lalrinenga Sailo chuan thu sawiin SDGs 17 zinga a hnuhnung ber “hlawhtlinna chang tura thawhhona tha neih” chu bulk an tanna tur a ni, a ti a. Local Councilte pawimawhna leh tangkaina sawiin an tel lo chuan hmasawnna hna a thawh tluan tak tak theih loh a, anni bakah khawtlanga tlawmngai pawl hrang hrangte nen lungrual taka tan kan lakho a tul a ni, a ti. Planning Department-in ngaihtuahna tha tak senga India rama a hmasa ber ni tura Localization of SDGs an ruahman chu lawmawm a tih thu a sawi bawk a ni.

Pu Rinenga chuan AMC hnuaia local council 83 awm thin chu tunhnaiah Zembawk South Local Council leh Durtlang Leitan Ramthar Local Council a pian leh tak avangin 85 a ni tawh tih a sawi a. Property Tax chungchang sawifiahin tunhmain data mumal leh felfai kan nei lova, self-declaration kan tihin a dik lova report a tam a, kum engemawzat hnuah ennawn leh a nih avangin insa thenkhat chuan chhawng engemawzat an lo belh tawh bawk a, floor area atanga chhut zel a nih avangin leh survey leh data uluk taka kan lakkhawm avangin a dik thei ang berin kan siam tha a, kum 7 chhunga a punna hi Annual Property Value atanga tax lak 0.42% chauh a ni a, sawrkar laipuiin GSDP mila tax la tura min nawr chung hian kan ti lo rih zawk a ni, a ti a. A tirah dik taka thil tih nise a punna hi tam tia sawi theih a ni lo, a ti bawk.


Mayor chuan SDGs tihhlawhtling vek tur chuan AMC hi tun aia thuam chak a ngaih thu sawiin, he inelna hian a tha zawngin awmzia thui tak a neih a beisei thu a sawi bawk a ni.

United Nations hnuaia ram hrang hrang 193 ten kum 2015 a lungrual taka hmasawnna kawng hrang hranga thawhhona tur atana thuthlung an ziah Sustainable Development Goals (SDGs) hi hmasawnna ngelnghet, mitin hnena thleng tura duan niin tihhlawhtlin tum (goals) 17 a nei a, hengte hi kum 2030 ah chuan tihhlawhtlin vek tumin nasa taka tan lak mek a ni.

Aizawl khawpui chhunga SDGs ti hlawhtling tura hmalakna hrang hrangte vila umzui turin Local Council an awm a, SDGs te hi kan khawtlang nunphung mil turin Planning & Programme Implementation Department chuan a siam rem a, hengte hi chak taka tihhlawhtlin a nih theih nan tehfung chi hrang hrang siamin Local Councilte inelna a buatsaih dawn a ni. Inelna hi kum khat chhung (calendar year) atana ruahman tur niin, a bul tanna leh enchhinna (pilot project) atan AMC Area a ward hrang hrang 19 atangin Local Council pakhat theuh thlan an ni a. Pakhatna in Rs nuai 10, pahnihna in Rs. nuai 8, pathumna in Rs. nuai 5 an dawng dawn a, heng an lawmman dawn te hi tangkafaia pek ni lovin, a hu ang tawk khawtlang hmasawnna project siam nan hman a ni ang.

Local Council 19 thlanchhuahte chu :

Durtlang Leitan (Ward – I), Chaltlang (Ward – II), Ramhlun North (Ward – III), Ramhlun South (Ward – IV), Chanmari (Ward – V), Chanmari West (Ward – VI), Thuampui (Ward – VII), Armed Veng South (Ward – VIII), Chhinga Veng (Ward – IX), Chawnpui (Ward – X), Luangmual (Ward -XI), Tuikual North (Ward – XII), Dawrpui Vengthar (Ward – XIII), Khatla (Ward – XIV), Bungkawn (Ward – XV), Bethlehem (Ward – XVI), Venghlui (Ward – VII), Mission Veng (Ward – XVIII), Kulikawn (Ward – XIX) an ni.

Ruahman dan chuan AMC hnuaia Local Council zawng zawng huapa he inelna hi la kalpui tur a ni.

Vawiin hun hi Planning Secretary Pu Lalmalsawma Pachuau in a kaihruai a, “Urban Indicator Framework for Localization of SDGs”  chungchang inhrilfiahna bakah zawhna leh chhanna hunh man ni bawkin, Dr Lalrinchhana, Principal Adviser-cum- Additional Secretary, P&PID in lawmthu sawina in hun a khar a ni.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments