Ticker

10/recent/ticker-posts

School Edu Minister-in Braille Textbook sem


Aizawl | Oct 11, 2022:
Vawiin khan School Education Minister Pu Lalchhandama Ralte chuan a office chamber-ah Blind school-a zirlai mitdelte hman tur Braille text book a sem.


He textbook semnaah hian thusawiin School Education Minister chuan Mizoram tana chhinchhiah tlak tak zirlai mitdelte'n an chhiar theih tur zirlaibu an nei ve ta chu lawmawm a tih thu a sawi a. "Heng zirlaite tan zirlaibu an neih hmasak ber a ni a, an tan chuan chanchin țha a tling a, an khawvel hma lam a tieng hle dawn a ni," a ti. Minister chuan High School zirlaite tan pawh Samagra Shiksha-te nen hmalak zui a nih tur thu a sawi a. Minister chuan mitdelte tan pawh mi pangngaite nen inelna țha an nei thei tawh tur thu te, harsatna karah mi ropui tak tak an chhuak țhin tih hre reng turin a chah bawk. Braille textbook an neih thar chu khawvel hriata an talent phochhuah nan a țangkai a beisei thu a sawi a, society tan pawh rah țha zawk an pek chhuah a beisei thu a sawi. 


MBSE Secretary Pi Sarah Lalzampuii chuan Braille text book buatsaih dan a report a. Report-a a tarlan dan chuan tun dinhmunah hian mitdel lehkhabu (braille textbook) dawng tur zirlai panga (5) Higher Secondary stage lamah an awm a. High School stage-ah hian mitdel lehkhabu dawng thei tur mi panga (5) an awm bawk. Large font print textbook dawng thei tur hi Higher Section-ah mi paruk (6) leh High School-ah mi pasarih (7) an awm mek bawk. 
 
Commissioner PWD chuan April 2022 ah Braille text book buatsaih turin MBSE ah a thlen a, chumi bawhzui chuan MBSE in Dehradun a National Institute for Empowerment of Persons with Visually Disabled (NIEPVD) te an dawr a, NCERT textbook chu mamawh ang print sa an neih thu hriat a ni a. Braille texbook an neih sa chu Mizo zirlaite hnenah sem chhuah theih a lo ni ta a ni tih a sawi. Vawiina braille textbook sem te hi History, Political Science, English leh Sociology te a ni.

Commissioner PWD Pi Vanlaldiki pawhin he hunah hian thu a sawi a, braille textbook an neih tak avanga blind zirlaiten anmahni puitu tur reader an mamawh dawn ta lo tih sawiin lawmawm a tih thu hle a sawi.

Vawiina Braille textbook semnaah hian MBSE chairman leh officer te, SCERT officer te, Commissioner PWD te Blind school zirlai țhenkhatte leh thawktute an tel a ni.

- DIPR



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments