Ticker

10/recent/ticker-posts

MZP Assembly Vawi 66-na chhunzawm; School Education Minister-in hmanpui

Aizawl | October 27, 2022: Mizo Zirlai Pawl (MZP) Assembly vawi 66-na chu vawiin October 27, 2022 chawhma khan Liandala Run, Darzo-ah hman chhunzawm a ni a, School Education Minister Lalchhandama Ralte in khuallian niin a hmanpui.

Khuallian School Education Minister Lalchhandama Ralte chuan, Pathianin 1935 October 27-ah MZP a lo din chu lawmawm a tih thu sawiin, "Ram leh hnam humhalhna leh Mizoram in remna leh muanna a neih theih nante theihtawpin a lo bei tawh thin a ni," tiin, MZP hruaitu hluite zahna chibai a buk bawk.

School Education Minister chuan, Zirlai kalkhawmte chu ruihhlo kaihhnawih leh mipat hmeichhiatna lakah fimhlim tura chahin, "kan nih tur ang min tih tir thgei lo tur thil lakah filhlim turin ka ngen che u a ni," a ti bawk.

School Education Minister chuan "Mizo nunze mawi tak takte boral mek a awm tam ta - aia upate zah thiamin, an thute awihin zawm fo rawh,' tih a va hun em! Pu Liandala'n hla tha tak a lo phuah hi chawinung thar leh turin bul tan turin ngaihtuahna i siam ang u," tinin, . "Social media kaltlangin mi dang hnehsawh taka kan sawi bawih bawihte hi inenchiang ang u," tiin, Zo ze mawi vawng nung zel turin palaite a chah a. "Kan ram chin, kan hnam humhalh kawngah hian theih tawp chhuah a, Kan ram hi timawia phochhuaktu tur kan ni tih hria a, kan hnam chawivul a, phochhuak zel turin zirlaite a chah bawk.

School Education Minister chuan "Zirlai kalkahwmte chu All India Services-ah inziak tling tura tumruhna, inpekna leh chhelhna nena theihtawp chhuaha bei turin a chah a,"kan ram mamawh chhanna pe turin kan zirna kawngah tum neiin i inbuatsaih ang u," a ti a. Sports hi School subject ah a awm tawh dawn a, NEP 2020-ah hian Skill Development leh Sports-ah Zirlaite chher hriam an nih tur thu sawiin, "Kan work culture te pawh kan ennawn hret hret a tul," a ti a. Darkar bi te hian inhlawh thei ila, thalai tam tak college kal rualte hi mahni intodelh kawngah hma an sawn theih tur thu a sawi bawk.

Khuallian chuan, "insawisel luih luih lovin, kan ram kan hnam dinchhuahna tur a nih chuan i tangrual ang u," a ti bawk

  
MZP President Lalnunmawia Pautu chuan, MZP Assembly hi harsatna tam tak tawk chunga buatsaih a nih thu sawiin, "Kan nu leh pate vanga tun dinhmun thleng a ni a, Kan khuallian ngei pawh hi nu leh pa chawimawi thiam a ni a, chumi vanga tun dinhmun thleng thei a ni," a ti a.
"kan nu leh pate chu eng ang dinhmuna ding pawh ni sela, kan chawimawiin kan ngaisang reng tur a ni," a ti bawk.


Lalnunmawia pautu chuan, "Mihringte hi nung ve tawp turin min duang lo," tiin, "keiamhni ah hian theihna leh thiamna a awm a, chumi hmang tangkai thiam tur chuan 'tunge ka nih, eng ang mi nge ka nih?' tih inhre chunga theihtawp kan chhuah a pawimawh a ni," a ti bawk.

MZP President chuan, "Kan thiam leh finna te hmang tangkai turin, kan zirnaah kan chian a pawimawh," tiin, "Kan hnam ziarang kan humhalh a, kan chawilar a pawimawh a, kan tawng leh kan hnam ziarangte hi kan vawnghim tur a ni." a ti a, Kan hnam ziarang humhim tur hian keimahni hi kan pawimawh thu a sawi bawk.

MZP President chuan, "hruaitute dodal leh sel zawng hlira chete hi chu khaw khat nu rawn pa rawn an ni mawh," a ti a, "Mizo mipate social media-a a tawng tam tam kan ni a, Zirlaite pawhin smart phone kan neihte hi a tha zawng-a hman kan zirin kan tum tur a ni,"a ti bawk.

MZP Assembly Rorel hi tukin dar 7 khan Govt PS - I, Darzo-ah neih niin, Zirna khawih leh ram leh hnam khawih chi hrang hrang bakah MZP danbu khawihte sawih hovin an rel a. October 25 zan atanga tan MZP Assembly vawi 66-na hi zanin hian a tiak dawn a ni.


Thurelte:
A. ZIRNA KHAWIH:
1. “Mizoram sawrkar enkawl zirna in hrang hrang fee kalphung hi ennnawn a, a tam thei ang ber zirnain hma asawn theihna atan hman a nih theih nan MZP in hma la rawh se.”
2. “Post Matric Scholarship-a Mizoram sawrkar tum ve tur State Matching Share (SMS) hi a hun taka pekchhuah a nih theih nan hmalak ni rawh se.”
3. “Mizoram sawrkar hnuaia College hrang hrang te’n Bus an mamawh hi sawrkarin a tul anga a ngaihtuahsak theih nan hmalak ni rawh se.”
4. “RUSA kaltlanga college hrang hrang sak that/ thawmthat hi a hun taka zawh a nih theih nan hmalak ni rawh se.”

B. RAM LEH HNAM KHAWIH:
5. “Mizoram chhunga NHIDCL hnuaia kawng laih hna thawh mekte hi, a nih dan tur dik taka thawh a nih theih nan enfiaha hmalak ni rawh se.”
6 “Mizoram sawrkar hnuaia hna lakah Mizo tawng Middle School standard tih hi exam a nih ngei theih nan hmalak ni rawh se.”
7. “Mizoram chhunga Insuarance company ten insuarance diltute hnenah harsatna an siam fo hi chinfel a nih theih nan hmalak ni rawh se.” 




(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments