Aizawl | Oct 18, 2022: ZPM PAC Member TBC Lalvenchhunga chuan vawiin khan Aizawl Press Club-ah thuthar thehdarhtute kawmin, Assam smuggler-in Mizoram-ah vote a neih thu sawiin, "Sual zalenna ram, smuggler-te Paradis-ah kan ram a chang a ni ta ber mai," a ti.
"kan ramah dan lova thiltih an zalen ta hle niin a lang," a ti a. "Sual zalenna ram, smuggler-te Paradis-ah kan ram a chang a ni ta ber mai a, heta mawhphurtu chu sawrkar a ni." a ti bawk.
TBC Lalvenchhunga chuan, "October ni 15, 2022 khan khan Zoram mipui ten vai hming kan hriat lar em em thin, Abu Majumdar-a boss ni a sawi, smuggler zinga a hotupa ber leh meizang hlaptu Musa Ahmed, Nilambazar (Karimganj District) mi nia sawi chu Assam Police ten kum khat chuang an veh hnuah Silchar Airport-ah an man thu chanchintharah kan hmu a. Musa Ahmed Siddiqui (Amosa tia sawi bawk) hi kumin kumtir khan kan ruling MLA pakhat nen an inhnimhnaih thu TV kaltlangin Ruatfela Nu chuan a lo sawi tawh a. Musa Ahmed Siddiqui hi Aizawl West I biala Sairang III polling station-ah vote neiin, serial number 448, Voter ID No. GDP0094425 a ni." a ti a.
"A sumdawnna hrang hrangte hre reng chungin keini lam chuan mit kan siai san nge, tourist-ah kan chhiar nge, zalen takin kan state ṭhenawm ten man tuma an veh reng chu kan lo kawl a. A tawp a tawpah chuan Assam sawrkar chuan a man ta nge nge a. Abu Majumdar aia thleng sang a nih thu leh Minister challang tak fanu nen pawh a inhnimhnai hle nia sawi a ni leh ta zel a ni." a ti bawk.
Sawi chhunzawmin, "He sawrkarah hian smuggler an zalen a, dikna a chep tawlh tawlh niin a lang a. Musa Ahmed Siddiqui (Amosa tia sawi bawk) bakah hian Abub Mazumdar-a hming a ri ring hle bawk a." a ti a.
"ZPM Leader Pu Lalduhoma chuan Assembly House-ah ngei Abub Mazumdar-a kha sawrkar thar lawmna CM Bungalow-ah te, Raj Bhavan-ah te a tel thu leh a nupui neihnaah hial CM nupui a tel thu a sawi tawh bawk a. Hei mai ni lo hian Abu Majumdar hi ramri buai chungchanga state 2 CM te inbiaknaah official delegation zingah a ṭhu ve tawh bawk a. MNF thuchhuahah (Memo No. MNF/Media/03/2022/366 Dt.07.02.2022) chuan Mizoram House-a thlen a tum thu te pawh kan lo hmu a nih kha. Tun hnai maiah man niin bail-a a chhuak chu FCS&CA Minister inah tukṭhuan thlamuang takin a ei lai hmuh a ni leh a, sawrkar official function, District Fast Track Court lungphumna, Kolasib-a neihah a tel zui leh bawk a. Kan sawrkarah hian smuggler te an zalen zia a lang chiang hle a ni. " tiin TBC Lalvenchhunga chuan a sawi.
"Chief Minister-in Anthurium festival-a a thusawinaah Zoram malsawmnate haichhuah a nih theihna atana tawiawm turin Mipuite thawhpuiah min sawm mek laiin, hengho hi an thawhpui tlat nia a lan avang leh an hum tlat nia a lan avang hian tunah chuan thiltitheiah an ṭhut tir tawh a ni ber a. Hemi chungchang hi keini pawhin zawhna kan zawt fo tawh a, vawiin thleng hian chhanna kan la hmu lo. Mipuite hmaah sawifiah turin kan phut nawn leh a ni. " a ti a.
"Heng smuggler Mizoram ti hmingchhetute leh kan ṭhalai duhawm taktakte nunna tam tak min laksaktute chhuina kawngah hian kan ṭuanfum hle niin alang a. Kan Police ṭha tak takte kut hi phuarin a awm ta mai em ni tih Mizoram sawrkar kan zawt a ni."
"Heng thil te hian nghawng ṭha lo tak min hnutchhiah mek a, damdawi hmansualna a hluar a, ruihhlo ngaite enkawlna kan neih te a khat reng a. October ni 13, 2022 Jail report kan en chuan jail-a leng tur zat 1,386 turah 1,649 kan inkhung mek a, 263 zetin a leng tur zat aiin a tam zawk. Hetiang renga kan kal chuan ṭhalai an suat zo mai dawnin a lang. Excise report kan en chuan Zu leh a kaihhnawih avangin kum 4 chhung (2019 – 2022) ah mi pakhat a thi a. Kum 10 chhung (2012 – 2022) ah mi 106 an thi. Damdawi leh a kaihhnawih vang erawh chuan hemi hun chhung vek, kum 10 chhungin thalai 523 zet an boral a, tun hnai thla 6 chhung (April – till date) in 20 kgs chuang zet Heroin man a ni bawk. Heng ruihhlo, kumin chhunga man ringawt pawh Vbc 100 chuang man a tling tawh a ni.'
"Kan Ram, kan khawtlang, kan chhungkua a damlo a, ṭhalai hnathawk rual, Jail bâng zutin, de-addiction centre lah a khat reng bawk. Heng zawng zawng bul hi smuggler-te kan ramah an zalen em vang a ni ti ila a sual tampui awm love. Heng bakah hian kan sawrkarin chengkhat hlawh tura a chhawr, mipui sum nuai tel senralna, Delhi tlanga awm reng hi a hnathawh leh kan sawrkarin a rawih reng chhan mipuite min hrilh turin ZPM chuan kan phut bawk a ni.
ZPM chuan kan ram leh hnam a dinchhuah theihna turin theihtawp kan chhuah zel dawn a. Kan ram leh hnam himna tiderthawng thei thil chu, eng thil pawh nise, kan dodal zel dawn a ni." a ti bawk.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: