Anthurium Festival 2022 hmang; Tourism hian mipui hlimna kan ngai pawimawh ber a, Mizo mipuite hi hlim em em turin kan duh - Robert Romawia Royte

Aizawl | Oct 14, 2022: Covid hripui avangin kum 2 chhung virtual-a hman a nih hnuah kuminah Anthurium Festival, 2022 chu Reiek Tourist Resort-ah mipui chhim theih turin hman tan leh a ni ta a. Anthurium Festival a thawh khatna chu vawiin khan Reiek hmunah hman tan a ni a. Hawnna inkhawm hi Pi Manisha Saxena, IAS, Principal Secretary, Tourism Department-in kaihruaiin, Tourism Minister Pu Robert Romawia Royte chu Khuallian a ni. Khual zahawmah Pu T. C. Pachhunga, Vice Chairman, Tourism Development Board leh Pu B.B. Swain, Secretary, MSME Ministry Govt. of India te an ni bawk.


Khalkhawmte lawm nan Reiek Branch YMA ten 'Anthurium Theme Song' sain mipui an awih hnuah Khual zahawm Pu TC Pachhunga chuan Thusawiin Covid hripui avanga kum hnih chhung Anthurium Festival hman theih loh hnuah kuminah hman leh thei a ni ta hi a lawmawm a tih thu a sawi a. He festival hi khualzinte bakah Mizo mipuite intih hlimna hun nuam ni ngei se a duh thu a sawi a ni.

Khuallian Pu Robert Romawia Royte pawhin mipui lo kalkawmte chu lo lawmin hun rei tak hnuah Festival hman leh thei a ni ta hi a lawmawm a tih thu a sawi a. Anthurium Festival hi Reiek-ah kum 2009 atanga hman tan niin hmundangah te pawh hman kual ve thin ni mahse hmun dangte aiin Reiek-ah kan tlei ber a, helai hmun bawk hi Anthurium Festival atan hmang lehin, Reiek tlang thing leh mau, tumah ka khawih chhiat loh 'virgin forest' te leh Anthurium Festival a inhmeh thu a sawi bawk. Tourism hian mipui hlimna 'happiness' kan ngai pawimawh ber a, Mizo mipuite hi hlim em em turin kan duh a ni a ti.


Minister Pu Robert Romawia Royte chuan Tourism Department hian hmachhawp tam tak a nei a, mipuite mak tih khawpin hmasawnna a nei zel dawn a ni a ti. 'Tourism' hi a Department ta bik a ni lova, a hlawhtlinna atan chuan sorkar department hrang hrang, mipui leh NGO te thawhhona leh inlungrualna a ngaih thu a sawi bawk. Ni hnih awh tur 'Anthurium Festival' chu hlim taka hmang turin festival chhimtu zawng zawngte duhsakna a hlan a ni.


October ni 14 & 15, 2022 chhunga hman tur Anthurium Festival-ah hian Mizo hnamzia phochhuahna - hnam lam, zaithiam/band leh fashion show te bakah intihlimna chi hrang hrang nena hman a ni.

Anthurium Festival, 2022 chhung hian Mizo Handloom & Handicrafts exhibition, Mizo eisiam chi hrang hrang, Zokhua (Mizo Typical Village) Adventure activities - ziplining, climbing, Tent accomodation, Forest Bathing, Star Gazing, Anthurium Varietal Display & Sale leh inti hlimna dangte a chhawp chhuak a. Tourism Department chuan Mizoram mipuite leh Mizoram pawn atanga khualzinte chu Anthurium Festival-ah hlim taka hun rawn hmang turin a sawm a ni.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post