Ticker

10/recent/ticker-posts

PATHIANIN A HMU A, LAWMMAN PAWH A PE

  _Chatuan Nihphungte_
— Rick Warren 
— 27 Sept., 2022


“Amaherawhchu in hmelmate hmangaih ula, an ṭhatna tur ti ula, puktir rawh u, beidawng hauh lovin; tichuan in lawmman a tam ang” Luka 6:35

Vanram sawi chuan a ri a va mawi em i ti maithei e. Vanramah chuan lawmman a awm dawn tih i hre tawh em?

He Leia Isua thu i awih avanga i thiltih zawng zawngte lawmman i hmu dawn a ni.

I nun engkim hi Pathianin a thlir reng a. Vanramah chuan i thiltih te, i thusawi te, i ngaihtuahna leh i nungchang ṭhatnate, i thutlukna dikte, i thilphalna leh i inhlanna avang tein lawmman i hmu dawn a ni. I hmelma i hmangaih avang leh dik taka thil tih a harsat lai te pawha i beidawn duh loh avang tein lawmman i hmu ang. 

Isua hnena hruai i neih avang pawhin lawmman i hmu ang. (Nangmah avangin mi tuemaw tal vanram kai tur an awm em le?)


Kristian i nihna avanga sawiselna i tawh avang leh tihduhdahna i tawh avang pawhin lawmman i hmu ang. Chuvang chuan Isuan, “Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang. Lawm ulangin, nasa takin hlim rawh u; vanah in lawmman a awm hnem si a; chutiang bawkin in hmaa zawlnei awmte pawh an tihduhdah ṭhin kha” a ti Matthaia 5:11-12.

Pathianin engkim a hmu a, lawmman pawh a pe vek dawn a ni.

Heng lawmmante hi chhandamna nen chuan inkungkaihna a awm lova. Vanram i luh theihna erawh chu Isua Krista'n i tana engkim a tihsak tawhna che i rinna kha a ni zawk. I thiltih ṭhat avangin vanramah i lut thei lo. Mahse Bible chuan vanrama i luh chuan, i thiltih ṭhat ang zelin lawmman i hmu ang min ti thung.

Bible hmun hrang hrangah kan hmu a. Matthaia 10:42 ah chuan, “Tupawh heng mi te tak zinga pakhat hnenah hian, zirtir a nih avanga tui vawt no khat chauh pawh pe apiang chuan, tih tak meuhvin ka hrilh a che u, an lawmman chu an chan tawp lovang” a ti a. Midang hnena tui vawt no khat lek pek emaw mi chaw eia sawm hi thil hote angin lang mahse, Pathian chuan hetiang hian a sawi angah ngai la, “I thiltih kha ziakin ka chhinchhiah e. Engkim hi ka chhinchhiah vek a ni” tiin.

Lawmman dawn i duh leh duh loh chu i thutluknaah a ingnghat ta. Tuna i nunah hian dawn i duh nge, lo la awm turah chuan i duh zawk?

Isuan, “Amaherawhchu in hmelmate hmangaih ula, an ṭhatna tur ti ula, puktir rawh u, beidawng hauh lovin; tichuan in lawmman a tam ang” a ti. Luka 6:35

Tuna i nunah khan lawmman dawn i duh chuan - larnate, hausaknate, hmingthannate, hlawhtlinna leh nawmsaknate - kum 80 emaw a aia tam emaw lek chhung chauh i chen ang. Amaherawhchu vanramah lawmman i khawl a nih chuan, chatuanin chung lawmmante chu i chen tawh ang.

He khawvelin a tawktarh lawmmante beisei lo la. Pathian fa i nihna angin, hnathawh tur tam tak leh hmabak tam tak i la nei zawk a ni!

Ngaihtuah zui atan

* “Isua ni se engtin nge a tih ang” tih ṭawngkam hi Kristiante chuan kan hmang rim viauin a lang a, amaherawhchu vanrama kan luh theih nana duhthlanna siam nan eng ang taka ṭangkai nge ni ang le?

* I thuawihna avang chuan Pathianin eng vangin nge lawmman pek che a duh nia i hriat le?

* He Leiah hian lawmman dawng turin engti zawngin nge i beih ṭhin le? Engti zawngin nge vanrama lawmman i hmuh theih nan i beih ṭhin le?
*[Lettu: Sangpuia]*


Post i hmuh dan

Post a Comment

0 Comments