Ticker

10/recent/ticker-posts

Mizoram electoral roll atangin Bru voter 1,348 paih tawh!

Aizawl | Sept 5, 2022: Mizoram election department chuan Tripura a inbengbel tawh chunga Mizoram electoral roll a Bru vote nei hming la chuang mi 1,348 hming an paih tawh.

Bru Voters | News18

He thu hi AIR Aizawl chuan tarlangin, Joint chief electoral officer Pu David Liansanglura Pachuau hnen aţanga thudawn danin Tripura election official-te chuan Mizorama vote nei thin hming 5,009 chu Tripura electoral roll-ah an thun tawh a. Mahse, ERONet hmanga an hming paih turte an rawn thawn muan avangin hming 1,348 chauh hi Mizoram vote neite ziahna aţanga paih a la ni. Hemi chungchangah hian Election department chuan Election Commission of India hnenah Tripura election hotute lo hrilh turin an ziak tawh a. Election Commission pawhin Tripura sorkar chu electoral roll-a Bru hming an thunte Mizoram election department hnena hriattir nghal zel turin an hriattir tawh a. Chuti chung chuan helama hming an lo paih ve zel theihna turin ERONet hmanga inhrilh chhawn kawngah an la che chak thei chuang lo a. Tunhnaiah hian hming 89 chauh an la rawn thawn belh leh a ni.

 Kum 1997 October ni 21 a Dampa Tiger Reserve chhung, Persang khaw bula Bru helhovin forest guard Pu Lalzawmliana an kahhlum hlim chhawna boruak sosang avanga Tripura lama pem thla Bru-hote chu Tripura-ah awm reng mahse kum 25 chhung chu Bru mi 11,000 chuang chu Mizoram electoral roll-ah an la chuang ta reng a. Tlawmngai pawl leh zirlai pawlte’n nawr mahse, election commission-in an hming paih a remti tlat lova. Kum 2020 January ni 16-a sorkar laipui, Mizoram leh Tripura sorkar leh Bru pawl hrang hrangte inremna anga Tripura a an inbenbel phalsak an nih hnu-ah tun hnai aţang khan Tripura electoral roll-ah an hming thun chhoh a ni ta a. Tripura electoral roll a hming thun an rawn hriattir apiang Mizoram election department-in an lo paih ve nghal zel a ni, tiin AIR Aizawl chuan a tarlang.


- AIR Aizawl 
Post i hmuh dan

Post a Comment

0 Comments