Mizoram DGP-in Serchhip tlawh

Serchhip | Sept 16, 2022: Vawiin khan Mizoram Police lal ber, Pu Devesh Chandra Srivastva, IPS, Director General of Police, Mizoram chuan Serchhip a tlawh a. Serchhip SP Conference Hall ah tlawmngaipawl aiawhte leh Village Defence Party (VDP) hruaitute nena inkawm hona an nei.

(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]



Pu Devesh Chandra Srivastva chuan, indaihlo tak chungin Serchhip Police ten theihtawp chhuahin hna an thawk thin tih ka hriaa, ka chhuangin an chungah ka lawm em em a ni. Police indaihlohna thu vawiina khawtlang hruaituten in lo thleng hi kei pawhin ka vei hle a, Police post hi za zela 33 vel zet a ruak mek a ni. Tin, Police Quarters repair leh a thar mamawhna a sang hle tih in sawi te, lirthei indaihlohna leh POL lama indaihlohna in sawite pawh hi kan hriaa, theihtawpa lo umzui ka tum dawn a ni, a ti a. Khawtlang hruaitute min hriat sak tura ka duh cheu chu tunhnaia National Crime Report lo chhuakah Mizoram hi misual thiamloh chantir tawhten sual dang an khawihnawn lehna rate hi a sang fal em em mai a. Tin, Drugs leh ruihhlo dang hman sual kawngah kan sang hle bawk a. Hengte hi a lo hniama sualna kawng tinreng dona lamah nasa lehzuala tlawmngaipawl, khawtlang hruaitute leh kohhrante kan thawh ho that lehzual a tul hle a ni. Tun hnaiah CYMA in Central Anti Drugs Squad an din hi a lawmawm hle a, nasa takin Mizoramin a tangkaipui dawn a ni. Chutihlaiin ruihhlo dotute hnena ka ngen duh chu heng kan thalai ruihhlo ngaia talbuai mekte hi misual an ni ngawr ngawr lova, mite sualna tuartu (victim) zawk an ni mah zawk a ni. Kawng diklo zawh palhin zui tur diklo an zui palh a, salah an tang a, chhanchhuah a, tanpuia, kawng dik kawhhmuh an mamawh a ni, tih hi a ni. Heng kan thalaite kawng diklova hruai bo tu ruihhlo zuartute, dan bawhchhetute zawk hi na taka kan hrem theih nan ruihhlo zuar leh tawlhru kan hria a nih chuan rang takin Police hnenah thlen thin ang u, tiin khawtlang hruaitute leh mipuite a ngen a ni. VDP hruaituten dilna an thlen hrang hrangte pawh a theih chen chen a ngaihtuah sak tur thu a hrilh a ni.

Inkawm hona hi Pu Stephen Lalrinawma, SP Serchhip chuan a kaihruai a. Mizoram Police lal berin Serchhip a rawn tlawh an lawm tak zet tih sawiin, tlawmngaipawl leh VDP te nena inkawm hona a nei chu Police te leh tlawmngaipawlte thawh hona kawng tinrengah a tangkai hle dawn a ni, a ti. Pu Devesh Chandra Srivastva chanchin tlangpui sawiin Mizoram DGP a rawn nih hnuah Police Department ten hmasawnna kan hmu nasa em em a, kan vannei hle a ni, a ti bawk.

Pu Saidingliana Sailo, Addl. SP chuan tun hnaia Serchhip district a Police Department dinhmun leh hmasawnna tlangpuite a tarlang a. Chumi hnuah tlawmngaipawl leh VDP hruaitute nen Serchhip district Police department hmasawnna tura an rawtna te, an thawh hona kawnga thil pawimawh nia an hriatte sawi hona hun an nei a, an mamawh hrang hrangte an thlen bawk a ni.

Vawiina inkawm khawmna hun hi Pu Kaste Romalsawma, SDPO chuan lawmthusawiin a khar a ni.


- DIPR


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)


Post a Comment

He post chungchanga i ngaihdan lo sawi ve rawh:

Previous Post Next Post