Ticker

10/recent/ticker-posts

Khualzin tweet vangin Tamdil Lodge enkawltu ban!; Research scholar te'n thawktu thlavang hauh!

Aizawl | Sept 29, 2022: Mizoram Sawrkar, Tourism Department thuchhuahin a tarlan danin Ṭamdil enkawltu K Lalrohlua, Boatman (IV Grade) Provisional Employee chu nimin khan ban a ni.


Ban a nih chhan hi Mizoram mawina leh boruak nuam tak te rawn thlir a rawn hip tur leh Field Study tour a rawn kal, Tamdil a han riakin Nilanjan (@neilanjanB) in twitter-ah Tamdil Lodge chhiat thu a tweet vang a ni.

He tweet-ah hian, “A enkawltu zurui, Bathroom tui awm lo, Thosilen pawp, Pawnlam eng awm lo, Inenna darthlalang keh, Bed cover thler...” tih te a tarlang a. Hemi vang hian Mizoram Tourism lam chuan an thawktu hi thu leh awm lovin nimin khan an ban ta a ni.

Thuchhuahin a tarlan danin Pu K. Lalrohlua hian Sawrkarin tih tur leh mawhphurhna a pek ang te ti lovin, zu rui chungin mikhual a dawng sawng a, a duty na hmanrua te a enkawl ṭhat loh avangin vawi tam tak insiamṭha tura an hrilh hnuah pawh Sawrkar leh Dept timualphoin mikhual lakah a khawsak leh avangin nimin aṭang khan ban a ni.


He thil lo irhchhuah chhan hi tunhnaia hnamdang zin mi, Ṭamdila thlengin Social Media lama Ṭamdil hmunhma a chhiat thu a post vang a nih rin a ni. Ṭamdil chauh lo pawh, hmundanga kan hmunhma chhe tak tak leh ṭawp tak tak te pawh Social Media lamah kan hmu zui chuai chuai a nih kha.

PU Rotea hi boatman a ni a, Tourist Lodge enkawl vek tur emaw, a chhunga bungraw that leh that loh a mawhphurtu ber tur hi a ni tak tak em tih chu thalaite zawhna a ni!!

He Boatman hian a chhiat thu hi eng angin thlen mahse, a titha theitu a ni kher em? Bungraw tha nei tura hmala theitu a ni em? Sum chelek theitu a ni reng em? Tourist Lodge hmasawnna hna thawk tura ruahmanna siam a hmala theitu a ni chiah em? Zawnga tuar ai Ngauvin a tuar em ni?  tih te chu zawhna awm ta a ni!! 


MZU Dept. of Zoology hnuaia Developmental Biology & Herpetology Lab - Research Scholar te chuan, "Heng bedsheet thler, thosilen pawp, etc., te hi Pu Rotea thiam loh a nih kan hre lo. Light eng lo a tih te kha electric bulb hlui tawh puak zel vang a nih kha, LED te hmang ve hek lo.." an ti a. 

MZU research scholar zing ami Muansanga chuan he thu hu FB-ah post-in, "Kan thlen lai khan electric pawhna hrui chu thingtlu in a delh chhia a, kan siam dun hial a nih kha. Tui chungchangah pawh current a mumal loh miau chuan pump theih va ni suh. Hlo thlawh te pawh a hneh zaih zaih e. Ama tawkah mikhual chhawn a thiamin a mikhual te mamawh ang apiang a ngaihsak thin a, kan kal apiangin a duty laia a ruih kan hre ngai lo.  A chang phei chuan kan hnaah te hial min pui lawp lawp thin. An chhungte hnai tak mitthi Saituala an awm pawn min ngaihtuah avangin haw lovin min pui char char bawk. " a ti bawk.


Pu Rotea chungchanga MZU Dept. of Zoology hnuaia Developmental Biology & Herpetology Lab - Research Scholar te thuziak intawm hi i lo thlir ang hmiang.


Tamdil a thawk boatman pu Rotea kha. 

Tamdilah hian Forest project hna " HERPETOFAUNA OF TAMDIL" tih chu kan thawh avangin kan kal ngun ve viau thin, chuta Pu Rotea ka hmuh dan chu hetiang hi ani. 

Pa taima leh hna hmangaih tak mi niin ka hria a, hmani lawk pawn Sap ho a mikhualnaah sap ho mi 4 techuan an fakin amah chauha khitiang hna a thawkthei kha mak an tihial ani. Kan zin a kan riah apiangin Pu Rotea hian min mikhual thain kan mamawh ang ang min tihsak thina, a lodge a khi a hlui ve tawhin a pawnlam rawng an hnawih that leh ekin an siamthat tihloh chu kutthlak na thar hmuh tur avang hle.. a hmuna kan thlen khan kei ngei  pawh thosilen pawp heu huauah ka mua, a hmun hi ngaihsak ani lo hlein ka hria.

Tlang titi atanga kan lo hriat danin pu Rotea hian Tamdil hi kum 19 a lo enkawl tawh a, thawktu dang an awm ve lai chuan a hna pawh a zia deuh thu an sawi bawk. Amah hi kum upa tawh lam niin a hmun hi hnehsawh takin a enkawl  khi a mak zawk hial a ni. 

Kan thlen lai khan electric pawhna hrui chu thingtlu in a delh chhia a, kan siam dun hial a nih kha. Tui chungchangah pawh current a mumal loh miau chuan pump theih va ni suh. Hlo thlawh te pawh a hneh zaih zaih e. Ama tawkah mikhual chhawn a thiamin a mikhual te mamawh ang apiang a ngaihsak thin a, kan kal apiangin a duty laia a ruih kan hre ngai lo.  A chang phei chuan kan hnaah te hial min pui lawp lawp thin. An chhungte hnai tak mitthi Saituala an awm pawn min ngaihtuah avangin haw lovin min pui char char bawk. 

Heng bedsheet thler, thosilen pawp, etc., te hi Pu Rotea thiam loh a nih kan hre lo. Light eng lo a tih te kha electric bulb hlui tawh puak zel vang a nih kha, LED te hmang ve hek lo..

P.s. Aizawl office a an lak thlak pawn a aiawha an dah khan a tluk loh em avangin amah tho an dah chho leh a nih kha maw..!!

Hetianga mi pakhat thusawi chhuichianna (investigation) awm loa a chunga action an la mai hi mak kan tiin kan tuarpui hle a ni.  

Reiek Tourist Lodge ah hian thawk mi pa 7 (a ai pawn a tam mai thei) an awm laiin Tamdil ah chuan pakhat chauh.

He kan thu post avang hian a hna hi a hmu kir leh dawn lo tih chiang hle mah ila, a rilru na tur hi dâwn ve ila, a mualphona ah hian kan tuarpui tih hi a hmuna kal tam leh dawr nasa ber te hian kan han sawi ve duh a ni e. 

Pu rotea "Kum 19 ka thawk tawh a, Tamdilah hian. Ka hmangaih ve lutuk a, hetianga warning eih pawh awm lo a in ban hi chu ka rilru ana khawp mai". 

Sd/-
Research Scholars 
Developmental Biology & Herpetology Lab
Dept. of Zoology
MZU.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)






Post i hmuh dan

Post a Comment

0 Comments