I&PR leh CYMA-in Media Workshop 2022 buatsaih; Media hian naupang tawngtheilo atanga tar thlengin min nghawng vek tawh - Minister Lalruatkima


Aizawl | Sept 22,  2022: Vawiin khan Information & Public Relations Department leh CYMA buatsaih, Chanchinbu Enkawl Dan Zirhona: Media Workshop 2022 chu Central YMA Hall, Tuikhuahtlang, Aizawl-ah hman a ni a, I&PR Minister Pu Lalruatkima chu khuallian a ni.


Khuallian Pu Lalruatkima chuan thu sawiin CEC Literature hruaitute, Branch hrang hrang atanga lokal leh I&PR atanga vawiin hun hmanga lokal te chibai a buk a. Khuallian chuan vengtina YMA chanchinbute hi min ti bengvar tu, niin en nuam leh hmuh nuam a siam a ‘layout’ neih that te pawh hi a pawimawh a ni, a ti a. Chanchinbu hi khawtlang inzirtirna leh ram leh hnam humhalh kawngah pawh hmanraw tangkai tak a ni a, Mizo Tawng ziakdan dik uar kawngah te kan tunlai khawvel changkangna in a ken tel Social Media thu belh chian dawllo tak tak thlitfim nan leh a chhiartute kawng dik leh thu dik, finfiah tlak chhawpchhuakna atan Chanchinbu hi a pawimawh em em a ni, a ti a. Media hian naupang tawngtheilo atanga tar thlengin min nghawng vek tawh a, chutiang khawvela cheng kan nih tawh avang chuan hetiang lama zirna pawh hi kan ngaih pawimawh deuh deuh hi a tul a, a thiamte thu khawchang kan ngaihchan thiam hi a tul takzet a ni a ti a.
 

 
Khuallian chuan YMA chu mizo tawh phawt chuan kan ngai hluin kan zah em em a, YMA tih anih tawh chuan kan ngai thutak in, kan ngaipawimawh em em thin a, vawiina YMA Chanchinbu enkawl tute pual a Media Workshop ruahman pawh hi a awm viau a, YMA chu tlawmngai pawl, thliar bik neilo, tanpui ngai te tanpui tu, mizo nun ze mawi min zirtirtu a nih angin, kan media ah pawh mizo nun ze mawi a lan hi a mawi a ni tiin vawiin workshop a kal zawng zawngte duhsakna a hlan a ni.


I&PR Director Pu C.Lalnunkima chuan YMA Chanchinbu enkawltute puala workshop buatsaih a nih theihnana hmalatu I&PR Minister Pu Lalruatkima hnenah lawmthu a sawi a, vengkhat YMA Chanchinbu enkawl tur chuan mi bik thlan an ni thin a ti a, chanchinbu kan buatsaih hian a dawngsawngtuten eng angin nge an ngaih tih hi kan dawn ve a ngai a, tawngkam hman leh thuziak uluk a, thalai zawkten an tuipui leh an nun kaihruai thei thuziak ngaihtuahna kan hman hi a tul a ni tiin a sawi.

CYMA President Pu R.Lalngheta chuan workshop tangkai leh hlawhtling tak a nih theihnan mahni inseng ral leh tlawmngai a lo pen chhuak Aizawl khaw pawn leh chhung atanga lokal te chibai a buk a. Chanchinbu buatsaih hi khawtlang leh ram tan a hlawk a, hlawh leh hlawkna beiseilo a kan thawhna hi a ropuina lai tak a ni tiin a sawi a ni.


He hun hi CYMA Asst. Secretary Prof. Malsawmliana chuan a kaihruai a, General Secretary Prof. Lalnuntluanga hnen atangin Report tawi ngaihthlak a ni a, Literature Sub-Committee Vice Chairman Pu Lalnuntluanga Thomte chuan lawmthu sawiin chawhma hun hi a khar a. Chawhnu-ah hian Assistant Professor, IIMC Dr. C.Lalmuansangkimi leh CEC leh CYMA Chanchinbu Editor ni bawk Tv. Lalnunfela Hlawndo te hnen atangin paper presentation ngaihthlak leh zirhona neih a ni dawn a ni.


 
 
(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
 
 
 
 
 

Post a Comment

He post chungchanga i ngaihdan lo sawi ve rawh:

Previous Post Next Post