Ticker

10/recent/ticker-posts

I CHATUAN HMUN TUR KHAWI AH NGE?

 Chatuan Nihphungte

— Rick Warren 

— 21 Sept., 2022


“Pathianin khawvel a hmangaih em em a, chutichuan a Fapa mal neihchhun a pe a, amah chu tu pawh a ring apiang an boral lohva, chatuana nunna an neih zawk nan” Johana 3:16

Sual hi a awm hranlo ti tute nen kum tam kan lo inhnial ve tawh a. Anni chuan mihringte hi kan kan nihphung ah hian kan sual lo va, mahni hma kan sial hek lo va, midang ṭhatna tur an zawng zawk ṭhin tiin an sawi.

Chung mite chuan chanchinbu te hi an chhiar ngai lo em ni aw ka ti zawk! He khawvel hi zawng inlaichinna kehchhiatna, thutiam sutlehna leh sual inlarna a ni tih hre turin han thlir zau em em pawh a ṭul hran lo. Sual hi chu kan kiang velah hian a awm reng mai – khawvel politics aṭanga tualchhung politics thlengin inhuatna, khakna leh eirukna a awm a ni tih i hmu ang.

Sual leh a thiltihte a awm chuan hremhmun pawh a awm tihna a ni ang.

Nova hun laia thudik kha tunlai hunah pawh hian a la dik reng a ni: “Lalpa chuan leiah hian mihring sualzia chu nasa tak a ni tih leh an rilru suangtuahzia reng reng chu sual hlir a ni fo mai tih a lo hria a. Tichuan leiah hian mihring a lo siam tak avangin Lalpa chu a inchhir a, rilru nat nan a hman phah ta a” Genesis 6:5-6

Pathianin he khawvela thil diklo, sual thiltihte a hmuh khan a rilru a na a, a chhan chu mi zawng zawng hi min hmangaih a, keini pawh inhmangaih tawn turin min duh a ni.

Pathian chu dik leh thianghlim a ni a. A famkim avangin sualna neilo a ni. Engtik niah emaw chuan heng thil diklo te hi a la siamdik dawn a ni: “Lalpa hmaah chuan: ani chu a lo kal dawn a ni; Lei rorel turin a lo kal dawn si a; khawvel hi fel takin ro a relsak ang a, mi tin te chu a thutakin ro a relsak bawk ang” Sam 96:13 

Chuti chung chung pawhin Pathianin duhthlan theihna zau tak a pe che a, amah hmangaih chu i thlang thei a ni. Sual pawh he khawvelah awm a phal avangin duhthlan tur pawh a awmtir reng a ni – nimahsela vanramah chuan sual a awmtir tawh lo vang. Vanram chu hmun famkim a ni si a.

Vanram chu hmun famkim anih chuan mi famkimte chauh chutah chuan an lut dawn tihna anih chu. Amaherawh chu harsatna a awm ta – a chhan chu nang leh kei hi mi famkim kan ni si lo. Tumah hi mi famkim an awm si lo!

Chatuana nung tura siam i nih chuan i famkim si lo va, famkimna hmun vanramah chuan i lut thei dawnlo tihna a ni. Khawiah nge i kal tak ang? Bible-in hremhmun a sawi.

Pathian chu a va ṭha em! Vanrama kan luh ve theihna turin - Isua Krista kaltlangin kawng min siamsak a nih chu: “Pathianin khawvel a hmangaih em em a, chutichuan a Fapa mal neihchhun a pe a, amah chu tu pawh a ring apiang an boral lohva, chatuana nunna an neih zawk nan. Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e. Tu pawh amah ring chu thiam lohvin an awm lo vang, tu pawh ring lo chu tun apangin thiam lohvin an awm, Pathian Fapa mal neih hming an rin loh avangin” Johana 3:16-18

Hrehmun hi a awm chiang a. Vanram pawh a awm a ni. Krista thlang la, thiamloh channa a awm lo vang. Duhthlanna chu i kut a ni tawh e!

Ngaihtuah zui atan

* Chanchinṭha i sawiin engvangin nge hremhmun pawh a awm ngei a ni tih chiang taka sawi a pawimawh?

* “Engvangin nge hrehmun a awm a ni tih i rin?” tih zawhna hi engtin nge i chhan ang?

* Pathian hian dik taka rorel lovin hmangaihna a neih theih i ring em? Engvang nge, eng nge a chhan?

*Chatuana Pathian hnena chen chu i thlang dawn em?*

Bible chuan, “Pathian felna, Isua Krista rin avanga a ring apiangte hnena tihlana awm chu a ni; (danglamna reng a awm lo va)” a ti (Rom 3:22). I sualna te hawisana Isua hnena inpumpek i duh chuan, he ṭawngṭaina mawlte hmang hian han ṭawngṭai teh le:

"Aw Lapa, misual ka nih ka inhria a, chuvang chuan i ngaihdamna ka dil a che. Isua Krista hi i fapa a ni tih ka ring a. Ka sualna avangin a thi tih leh thihna hnehin i kai tho tih ka hria e. Ka chhandamtu atan ka duh che a, vawiin aṭang hian i hnungzui ka duh a ni. Ka nun min kaihruai la i duhzawng ka tih theih nan min pui ang che. Isua hmingin ka dil e. Amen.”

Isua thlanga i ṭawngṭai thei a nih chuan, hetah hian min lo email mai la Rick@PastorRick.com. Tichuan Isua nena zinkawng i zawh theihnana i mamawhte a thlawnin kan inpe dawn nia.

*[Lettu: Sangpuia]*

Post i hmuh dan

Post a Comment

0 Comments