Aizawl | Sept 20, 2022 : Sericulture Minister Dr. K.Beichhua remruatna angin Pu L.Thangmawia, MLA chuan vawiin khan Bangalore-a hmunpui nei, Central Silk Board (CSB) a tlawh a. CSB Member Secretary & CEO, Rajit Ranjan Okhandier, IFS leh CSB Consultant Pu Moncy Issaac, Joint Secetary (Rtd.) ten an lo dawngsawng.
Pu L. Thangmawia chuan CSB thuneitute hnenah Dr Lalthlamuana Pachuau, Scientist D chu CSB atanga deputation-a Mizoram sawrkara kal an phalsak avang te, Eri Silk project chhungkaw 400 tana Rs 15.73 Crore atanga 7.924 Crore kumin March thlaa an release sak avang te, Chhungkaw 350 tana Eri culture-a Rs 14.87 Crore an approved sak tawh avangtein lawmthu a hrilh a. Tuna Central Silk Board office-a inchiah mek, Mulberry Sericulture project atana cheng 10.67 Crore leh Mega Project on Eri culture chhungkaw 3000 tana project thehluh te pawh a rang lama approve sak turin a ngen nghal bawk. CSB hian Mizoram lam nasa zawka rawn hawi a, Mizoram sawrkarin rawtna a thlen bak pawh hmalakna thar neihna atan a bik taka Mizoram rawn focus turin a ngen bawk.
HRD Board Vice-Chairman Pu L. Thangmawia chuan Mizoram chhung hmun hrang hranga kuthnathawktu engemaw zat ten hlawhtling taka pangang chi hrang chi 4 khawi hna an kalpui thu leh a bial chhung Pawlrang, Hliappui, Ngopa leh Chiahpui khuaa chhungkaw 40 chuangin Mulberry pangang khawi an kalpui mek thu te a hrilh a. Muga pangang khawi phei chu sik leh sa inthlak avanga North East State danga harsatna an tawh thu te, tunah chuan Mizoram chauhva kalpui tura ruahmanna siam a tul thute a sawipui a. Zoram kut hnathawktute tana tha tihna chhan MLA hian sawifiahin heng Sericulture tharchhuah Cocoon te hi kawngpui (Link Road) awm lohnaah pawh mi pakhatin Rs. 7000 man hu a phurh chhuah theih laiin, tharchhuah dangte chu Motor-a phurh an nih loh chuan mi pakhat-in Rs. 1000 man pawh an phurh zawh loh thute a sawi a, chuvangin kuthnathawktu mil a ni a ti. Mizoram sawrkar rawtnate CSB-in a tihlawhtling thei a nih chuan Mizote mil eizawnna, hlawhtling taka kalpui theih, India ram tan pawh chhenfakawm khawp hlawhtlinna Mizoramah a thleng thei a ni a ti.
CSB Member Secretary Pu Rajit Ranjan Okhandier chuan Mizoram chu Silk pangang khawi nana duhthusam climate a neih avanga an theihna apianga pui tura an inpeih thu MLA hi lo hrilhin State sawrkar-in a tul anga rawn bawhzui apiang theihtawp an lo chhuahpui tur thu a lo hrilh a. Consultant Pu Moncy-a pawhin Mizoram chu a tlawh tawh thin thu leh kuthnathawktute tan silk pangang khawi hlawhtlin theihna tur state ni a hmuh thu te, state sawrkarin a tih ve turte tha taka a rawn tih fel chuan theihtawpa lo bawhzui zel anih tur thute MLA hi a lo hrilh bawk.
Central Silk Board hi India Parliament-in kum 1948-a a din, Bangalore-a hmunpui nei, thuneihna sang tak nei a, Ministry of Textiles, Govt. of India hnuaia mi a ni.
- DIPR
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: