World Photography Day pualin Photo Art Exhibition buatsaih

Aizawl | August 26, 2022: World Photography Day kum 183-na pualin vawiin khan Mizoram School of Photography leh Photography Club of Mizoram chuan Millenium Centre-ah Photo Art Exhibition vawi 6-na an buatsaih a. I&PR Minister Pu Lalruatkima chu khuallian niin ni hnih awh tur exhibition hi a hawng a ni.

Pu Lalruatkima chuan thlalak thiltihtheihzia sawiin, sawi leh chhiar piahlamah thlalak ngei hian thil thleng a ti chiangin a tifiah a, ngaihruatna mai ni loin darthlalalanga in en ang maia chianga kan hmuh theih avangin, thinlung thlengin hna a thawk thei hial a ni, a ti a. Thlalak chu thil tisualte man chhuah nan a tangkai a, hmun nuam leh mawi phochhuahna a nih avangin tourism atan a tangkai a, a tangkaina hi sawi sen a nih loh ang bawkin a hmang sual duh tan erawh thil tha lo tam tak titheih a ni, Minister chuan a ti. Photographers rual kalkhawm te chu an thiamna te chhawr tangkai a ethics inzirtirna kawnga hma la turin a fuih a. Mitinin mahni iptea camera kan ah vek tawhna khawvelah social media kaltlanga mipui hmuha phochhuah rem leh rem lo thliar thiam a, inzirtir a pawimawh tih a sawi. Hmanlai chuan silai puin mi an ramvak thin a, tunlaiah erawh camera nen ram an vak thin ta zawk tiin I&PR Minister Pu Lalruatkima chuan nungchate humhalh nachang kan hre ta hi hmasawnna ropui tak a ni a, hetiang lama tui mi photographers te chu thalai te entawn tura nung zel turin a fuih bawk a ni.

Photo Exhibition hi a duh apiang tan tel theih a ni a. Thlalak 130 a lut a, mi 39 an tel a ni. Monochrome leh colour ah thenin inelna neih nghal a ni a. August ni 27 hian lawmman dawngtute puan a ni dawn a, colour leh monochrome-a pakhatna te hi rampum huap intihsiakah an tel dawn a ni. He exhibition buatsaihtu Mizoram School of Photography hi kum 2017 khan din niin National Academy of Photography, Kolkata hriatpui (recognised) a ni a, MSP atanga zirchhuakte hi Photography Club of Mizoram (PCOM) an din a. He Club hi Federation of Indian Photography hnuaiah an inziak lut a ni.

Programme hi Exhibition Chairman Pu Malsawm Tluanga’na kaihruai a, Photo Art Exhibition neih mek chungchanga thil pawimawh te a report bawk a ni.

WORLD PHOTOGRAPHY DAY Kum 183-na pualin vawiin August Ni 26, 2022 hian Mizoram School of Photography leh Photography Club of Mizoram te buatsaihin Millennium Centre Atrium ah Photo Art Exhibition vawi 6-na an buatsaih.

Exhibition Chairman Pu Malsawmtluanga, MSP & PCOM dintu chuan report pe in he Photo Exhibition hi  aduh apiang tana tel theih ni in Colour leh Monochrome Section ah thenin thlalak 130 a lut a, mi 39 an tel a ni. Thlalak intihsiak result hi naktuk August ni 27, inrinni ah puan a ni ang a, Colour leh Monochrome a pakhatna te hi National Contest ah an tel nghal dawn a ni.

World Photography Day pual hian Civil Hospital ah Blood Donation an lo nei tawh bawk a ni.

Thlalak te hi kum danga an tih ngailoh Frame sa thlapin phochhuah a ni a, a duh apiang tan man tlawm zawkin a lei nghal theih bawk ang.

He exhibition a thlalak print leh lawmman te hi PRINTLINE Photolab ten an tum a, LPS Vision Production chu Media Partner an ni bawk.

Mizoram School of Photography hi kum 2017 khan din niin National Academy of Photography, Kolkata recognised a ni a, MSP atanga chhuak te hian PCOM (alumni of MSP) dinin, he Club hi Federation of Indian Photography hnuaiah an in Affiliate a ni.

Tunah hian he school atanga zirchhuak atangin mi 100 dawnin Photography hi eizawn nan an hmang tawh a, ram chhung leh ram pawn thleng pawha Photography hi eizawn nana hmang an awm a ni.