Ticker

10/recent/ticker-posts

Revenue Minister hovin NH-54, Aizawl-Lunglei-Tuipang kawngpui zauh meka Rehabilitation & Resettlement kalpui dan tur chungchang sawiho

Aizawl the 22nd August, 2022: National Highway NH-54, Aizawl-Lunglei-Tuipang kawngpui zauh mekah harsatna awm chi hrang hrang te vawiin khan Revenue Minister Pu Lalruatkima hovin a pisaah ngaihtuah ho a ni a. Land Revenue &Settlement hotute, Mizoram District tina DC, Addl. DC, Settlement Officer leh revenue lam kaihhnawih official te bakah National Highways & Infrastructure Development Corporation Limited (NHIDCL) hotute he meeting ah hian an tel a ni.


He kawngpui zauh mekin a hrut khaw engngemawzat awmin heng khuaah te hian mahni chenna in chhuahsan ngai te, an eizawnna kalsana hmun danga eizawnna thar dap leh ngai te an awm a. Heng mite tan hian Rehabilitation leh Resettlement tih a ngaih dawn avangin District tin hotuten uluk takin zirchianna an kalpui a. He zirchianna assessment hi Mizoram Sawrkar dan Right to Fair Compensation and Transparency in Land Acquisition, Rehabilitation & Resettlement Act, 2013 hmanga neih a ni. He assessment atanga an thutlukna chu Mizoram Sawrkar Revenue Department chuan NHIDCL ah thehlutin NHIDCL chuan Sawrkar Laipui Ministry of Road Transport and Highway (MORTH) ah a thehlut a. MORTH hian NHIDCL hnenah JICA Project a nih anga assessment hi JICA Entitlement Matrix behchhana chhut turin a hriattir a. Vawiin meeting-ah hian harsatna awm mek leh awm thei te, thu inhmulo lai awm te sawiho a ni.

Meeting-ah hian Right to Fair Compensation and Transparency in Land Acquisition, Rehabilitation & Resettlement Act, 2013 leh JICA Entitlement Matrix inanlohna te enho a ni a. District tinin harsatna an neih mek te pawh sawiho a ni bawk a. JICA Entitlement Matrix inkaihhruaina anga kalpui a nih dawn avangin rehabilitation leh resettlement dawng thei tur zat leh an sum hmuh zat tur pawh a danglam thei dawn tih meeting ah hian tarlan a ni. Uluk taka sawiho a nih hnuah Mizoram puma hman tur Guideline thar, JICA Entitlement Matrix behchhanin Mizoram Sawrkarin siam se, chu guideline an buatsaih chu meeting-ah enho leh ni se tiin an rel a ni.

- DIPR
Post i hmuh dan

Post a Comment

0 Comments