MZP in Thu leh Hla kutpui 2022 buatsaih; MAL Book of the Year dawngte chawimawina hlan

Aizawl | August 24, 2022: Vawiin ni 24th August, 2022 (Nilaini) chawhma dar 11 khan MZP buatsaih Thu leh Hla kutpui ni hnihna chu Vanapa Hall-ah hman leh a ni a. Chawhma lamah ziaktute kawmna leh chawhnu lamah MAL Book of the Year dawng tawhte lawmpuina hun hman a ni. 

Chawhma lamah Pu Robert Romawia Royte Sports Minister chuan khuallian niin a hmanpui a. Khuallian chuan, "Ram leh Hnam venhimna leh vawnhimna atana hmanraw pawimawh em em chu thu leh hla a ni a, Hnam chanchin vawnghimtu a ni" a ti. 

"Lehkhabu chhiar hi kan uar thar a ngai, hnam puitlinna kawng a nih avangin uar sauh sauh ula. Thalaiten lehkha chhiar leh lehkhabu thar hriat hi a changkang a ni tih i hre thar ang u. Ziak ngeia dah lehkhabu hi a rintlak a, hriatna lak nana hmanraw pawimawh ber a ni" a ti bawk. 

Thu leh hla kutpui kharna hunah hian, MZP President Pu Lalnunmawia Pautu chuan, "Zirlaiten ngaihsan tur dik kan ngaihsan theih nan te, kan ziaktute ngaihsanna chang kan hriat theih nan te, kan thu leh hla humhalh nan leh lehkhabu chhiar kan uar thar lehzual nan hetiang hun buatsaih kan ni" a ti. 

Chawhnu lama MAL Book of the Year dawng tawhte chawimawina hun hmanpuitu Pu Zoramthanga Chief Minister chuan, "Thu leh Hla hi hnam anga min dinchhuah tirtu a ni a. Kan ti hausain kan ti hmasawn zel tur a ni. Mizo tawng hi tawng har tak a ni a, chutih laiin kan chhehvel kan unaute tawng hrang hrang luankhawmna leh inchhunkhawmna a ni a. Zofate min phuarkhawmtu a ni" a ti. 

Chief Minister chuan, "Pathianin Zofate kan insuihkhawm nan leh kan inpumkhat nan Mizo tawng min dinchhuah sak a. Hma a sawn nasa hle a, chumi atan chuan mawh kan phur theuh a ni" a bawk. 

Pu Zoramthanga chuan, Hnam chuangchang sawiin "Mizo hnam hi a neitu bik kan awm lo a, chipeng hrang hrang inzawmkhawm in kan hnam hi a siam a. A inti neitu apiang a neitu kan ni mai" a ti. 

Chawhma hunah, ziaktu lar hrang hrang; Pi B. Vanlalzari, Pu C. Lalnunchanga, Prof. RL. Thanmawia leh Pu B. Lalthangliana te kawmna hun hlawkthlak tak hman a ni a. Chawhnu lamah MAL Book of the Year 1989 atanga 2021 thlenga dawng tawhte chawimawina thuziak hlan an ni.



























Post a Comment

He post chungchanga i ngaihdan lo sawi ve rawh:

Previous Post Next Post