Aizawl | August 31, 2022: Mizo Cultural Organisation (MCO) Gen. Hqrs chuan vawiin dar 11:00 khan September 4-7, 2022 chhunga buatsaih tur, Pi Vankamlovi (L) hriatrengna, Mizo Hnam Lam Intihsiakna a tel tur Sub-Hqrs, Branch/Club 36 te aiawh mi 2 ṭheuh te ko khawmin, Intihsiakna atana hriattur te leh Lam dan tur siamfelna hun Archive Hall, PWD Tlang, Zarkawt, Aizawl ah an hmang.
He hun hi MCO Gen. Secretary Lalbiakhlua'n a kaihruai a, Assistant Secretary K Lalrammawia'n hunserh hmangin, Secretary RC Zauva'n intihsiak an neih tur atana hriattur te bakah, Lam chi 3 (Cheraw, Khuallam leh Chheihlam) a intihsiakna tur atana MCO Gen. Hqrs in Dan leh hrai a zam hrang hrangte a sawi.
Intihsiakna endiktu (Judge) tur ten he hun hi hmanpuiin, endiktu te aṭangin heng mite:-
1. Pi Lalrindiki'n Cheraw chungchang,
2. Pi KC Runremsangi'n Chheihlam chungchang leh
3. Pu Zohmingliana'n Khuallam chungchang te an sawi a, zawhna leh chhanna hun te hman niin, kalkhawm ten hlawkthlak an ti hle.
He hunah hian, Intihsiakna tur atana lam dan tur indawt chu kalkhawmte aṭangin pawh fel nghal a ni a, Intihsiak ṭan zan September 4 ah Zemabawk Cul Club, Armed Veng Cul Club, MCO Saron Branch, Huiva Cul Club, MCC Vaivakawn, MC&DC Khatla te an intihsiak ang a.
September 5 zan ah Branch/Club 9 (pakua) te an intihsiak anga, September 6 zan ah pawh Branch/Club 9 (pakua) tho intihsiak leh in, a tawp zan ni September 7 zanah Mamit Sub-Hqrs, Hortoki Vengthar, MCC Ṭumpui Kolasib, Hnahthial Sub-Hqrs leh West Lungdar Cultural Club ten intihsiak an hmachhawn anga, intihsiak result puan leh lawmman semna hun hman nghal a ni ang.
He Hnam Lam intihsiak hi LPS in Live in a pechhuak ṭhin dawn a ni.
Post a Comment
He post chungchanga i ngaihdan lo sawi ve rawh: