INZAWMNA NEI TURIN HUAISEN RAWH

  Inlaichinna Ṭha

—Rick Warren 

— 2 Aug, 2022



“Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.” 2 Timothea 1:7 

Hlau leh mangang taka i awm chuan, mi dang hnaihna chang i hre ṭhin lo. Mi dang lak ata i inthiarfihlim zawk ṭhin. Hnawl nih te, phatsan nih te, nat te i hlauh avangin i rilru a no hle a, chu hlauhna avang chuan i kiang vela mi te nena inzawmna i chhu chat ṭhin a ni.

He hlauhna hi mihring awm tirh aṭanga lo awm ve nghal a ni a. Adama leh Evi suala an tluk pawh khan, Pathian chu anmahni zawng turin a kal a. Adama chuan, “Ka hlau ta a . . . tichuan ka biru ta a ni” a ti. (Genesis 3:10). Chumi aṭang chuan mihringte hi kan biru kan biru ta a ni.

I taksa chuan i biru lo a ni maithei, mahse i nihna tak tak kha i bihrukpui tlat a ni. I nihna tak tak kha mi dang hriattir i duh ṭhin lo. I chhungril kha i hmuhtir duh lo a ni. Eng vang nge?  A chhan chu i nihna tak tak i tihlan chuan mi in an ngaina lo ang che tih i hlau a, insawifiah a ngaihna i hrelo ang tih i hlau a ni. Chuvang chuan, i nihna lo angin lan i tum ta ṭhin a ni.

He hlauhna hian in inlaichinna kawng thumin a tichhe thei a ni:

*Hlauhna chuan mahni inveng reng rengin a awmtir che.* I nihna hailan i hlau a, mahse mi dangin i chaklohna te an sawi leh tho si a ni. Chung i chaklohna te an sawi chhuah chuan, i chhang leta insawifiah i tum ṭhin a ni.

*Hlauhna chuan mi dang a hlattir che* Mi dangin an hnaih che i hlau a, i inhawng ngam tawk lo a ni. Chuvang chuan mi dang aṭangin i inhnuk dawk a, inthup i tuma i hlat hlawm tial tial a. I inveng reng a, nangmah i hla zel a ni.

*Hlauhna chuan thil dang a kangkai zel.* Hlauhna i neih tam poh leh, inthunun leh mahni inven i tum ṭhin. Titihonaah pawh a tawpa insawifiah ngai ṭhin ang hi i ni a. Hlauhna i neih chuan thil dangah a kangkai zel ang chu chu hlauhna lanchhuahna a ni tlat si a.

Dik tak chuan, hlauhna chuan inlaichinna ngei hi a ti khawlo ṭhin. Mi dang nena inzawmna leh inkungkaihna thuk zawk i neih theihna turin a hmasa ber atan khawi aṭangin nge huaisenna i lak ang?

Pathian Thlarau i nuna awm hmangin i nei thei a ni. Paulan 2 Timothea 1:7 ah, “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.”

Engtin nge Pathian Thlarauah chuan i khat a ni tih i hriat theih ang? Inlaichinna kawngah huaisenna i neih zual zel chuan Pathian Thlarauah i khat a ni tih i hre thei ang. Mi dang kan hlau tur a ni lo a, zalen takin i khawsakpui anga i hmangaih tur a ni zawk a ni.

Bible chuan,  “Pathian chu hmangaihna a ni” a ti a (1 Johana 4:8), chu “hmangaihna famkim chuan hlauhna zawng zawng a hnawt chhuak zawk ṭhin” (1 Johana 4:18). I nunah Pathian a tam poh leh, hlauhna i nei tlem ang.

Mi dang nena inzawmna bul ṭanna chu ṭawngṭaina hmanga, “Lalpa, nangin bul ka ṭan theih nan huaisenna min pe rawh” ti ang che. Mi dang nena in inlaichinna atan vawiinah hian ṭawngṭai turin i inpeih em?

Ngaihtuah zui atan

* Engtin nge hlauhna chuan inlaichinna a nghawng dan?

* Inlaichinna kawngah engtik khan nge Pathian Thlarau awmpuina i lo tem ve tawh le?

* Eng inlaichinna kawngah nge inpawhna thuk zawk i neih theihna turin Pathian ṭanpuia i mamawh?

*Pathian chuan amah nena inzawmna nei turin a duh che*

Khawiah pawh awm la, eng pawh lo ti ṭhin tawh mah la, Pathian chuan amah nena inlaichina nei turin  a duh che a. I thil tih sual zawng zawng leh i hlawhchhamna zawng zawng pawh a hre fai vek a, nimahsela a la ngaihsak chein a la hmangaih reng che a ni.

A khawngaihna kawngah chuan engmah i thawhchhuah a ngai lo a; A Fapa Isua Kristaah i rinna i nghat a nih phawt chuan Pathian khawngaihna chuan a chhandam che a ni. Pathian khawngaihna chu i pawm thei dawn a nih chuan, hetiang hian ṭawngṭai ang che:

"Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin min lo email dawnnia Rick@PastorRick.com. Isua nena zinkawng i zawh theihna tura i mamawh te a thlawnin ka pe dawn che a ni.

[Lettu: Sangpuia]

No comments

He post chungchanga i ngaihdan lo sawi ve rawh:

Powered by Blogger.