Ticker

10/recent/ticker-posts

INDEPENDENCE DAY 2022 | Siaha khawpui-ah I Day ropui takin lawm

Siaha; the 15th August,2022: India ram hmun dang te rualin Siaha district-ah pawh Dr. K.Beichhua Minister of State for Social Welfare & Tribal Affairs, AH& Vety etc. hovin India Independence day Champha vawi 75-na chu ropui leh urhsun taka hman a ni.


He India Independence Day champha vawi 75-na( Diamond Jubilee) lawmna a khuallian Dr.K.Beichhua chuan Independence Day pualin mipui te chibai bukin Independence Day thuchah a sawi. Khuallian Dr.K.Beichhua chuan kan hriat theuh angin kumin hi India ramin zalenna a hmuh champha vawi 75-na niin, hemi pual hian sorkar department hrang hrang ten ‘Azadi Ka Amrit Mahotsav’ hnuaiah a lawmna programme chi hrang hrang an buatsaih mek zel a.

India ram chu British Sorkar hnuaiah kum 200 zet a awm a, a ram leilung hausakna nasa takin sawrchhuah a ni. He ram hian retheihna rapthlak tak a tuar a, hetianga in awpbehna atanga zalenna sualtu kan hnam pasaltha te kan hre reng a, ram tana an inpekna ropui tak hi thangthar te hian kan chawisangin kan nghilh lo a ni. Vawiinah hian kan hruaitu ropui tak tak- Mahatma Gandhi te, Subhash Chandra Bose te, Sardar Vallabhai Patel te, Jawaharlal Nehru te leh midangte pawh chawimawina leh zahna chibai kan buk nawn mawlh mawlh a ni, a ti.

Kum 1947, August 15-a India ramin zalenna a hmuh atangin kawng hrang hrangah hmasawnna nasa tak kan hmu a, tunah chuan Khawvel ram ropui leh thiltithei ber te zingah chhiar tel a ni ta! Zalenna hnuaiah Mizoram pawhin hmasawnna hmel thar nasa tak a hmu tawh a, a la hmu chho zel dawn bawk a ni.

Kan ram ralmuanna leh zalenna hnuaiah sorkarin a tihtur a hai lova, kohhran, NGO leh khawtlang mipuiin kan support tha a, Covid-19 hrileng doletna a sorkar leh mipui thawhhona ropui zia kha khawvel hmundangah hmuh tur a awm ka ring lo! Hun khirh tak karah kutkuangkuahin sorkar a ding mai mai lova, vawiinah hian Mizoramin zalenna rah duhawm tak kan seng mek a ni, tiin Mizoram huap leh Siaha district chhunga sawrkar hamlakna hrang hrang leh hmachhawp te a tarlang a ni.


Vawiin Independence Day lawmnaah hian Parade contingent 15(Uniform-3 leh School-12) an awm a. Uniform contingents a 1-na chu:Mizoram Home Guard
2-na:NCC Donbosco
3-na:Mizoram Police te an ni a.
School Contingent-ah
1-na:Foxall HSS
2-na:Auxilliam HS
3-na:Donbosco School te an ni.

Khuallian hian a hnuaia Best teacher 3 thlanchhuah te hnenah chawimawina certificate leh tangkaifai an hlan hlawm bawk. Chung mi te chu:

Primary School Section atangin: Pu K.Sachai Headmaster, Gov't Tipa V'-II,

Middle school Section atangin: Pu Israel Chozah, Headmaster,Meisavaih UPS leh High School Section atangin: Pu Lalropuia Chinzah, Teacher, Gov't H/S Siaha ( Ani hian State Award a dawng bawk ) te an ni.

Vawiin Independence Day lawmna pual hian Football leh Badminton tournament buatsaih a ni bawk.


- DIPR
















Post i hmuh dan

Post a Comment

0 Comments