Champhai | August 15, 2022: India ram zalenna champha phak vawi 75-na chu vawiin chawhma dar 10 khan Chhangphut Field Champhaiah urhsun taka lawm a ni a. Champhai District-a Independence Day lawmna pui berah hian School Education, Labour, Employment, Skill Development and Entrepreneurship (LESDE) leh Printing & Stationary Department changtu Minister Pu Lalchhandama Ralte chu khuallian a ni a, hnam puanzar pawtpharhin parade contingent 18-te chibai bukna a chhanglet a. Parade Contingent tithate lawmman a hlan a ni. Khuallian hi Health & Family Welfare Board Vice Chairman Dr. ZR Thiamsanga, MLA leh Pu Lalrinsanga Ralte, MLA, Rubber & Allied Crops Board Vice Chairman ten an tawiawm bawk a ni.
Khuallian Pu Lalchhandama Ralte chuan Champhai District mipuite Independence Day puala chibai bukin British awpbehna atanga zalenna ni ropui kan hmang leh thei hi a ropuiin a hlu em em a ni, a ti a. India ramin zalenna a neih theihna atana ram hruaitu hmasa leh mi dang tam takte inpekna leh inhlanna ropui a tih thu sawiin, he ni ropui takah hian an inpekna leh inhlanna zozaite hre thar leh ila, zalenna thawh chhuaktu zawng zawngte zahna thinlung nen he ni hi i hmang ang u, tiin kalkhawmte a sawm a. Hripui leng karah mipui leh sawrkarin harsatna hrang hrang a tawh mek karah mipuite mamawh phuhruk turin sawrkarin theihtawp a chhuah thu sawiin, hmasawnna ruhrel siam kawngah pawh a theih ang zela hmalak a ni, a ti bawk.
Khuallian chuan 2021 Independence day leh kumin Independence day inkara Champhai District chhunga Sawkar hmalakna hrang hrangte he hunah hian a tarlang a. DC Office atangin ILP 435 pek chhuah niin heta tanga sum hmuh Rs.15,88,690/- chu sawrkar sum bawmah chhun luh a ni a, mi 3331 tan biometric enrolment (Aadhaar) tihsak an ni a, raltlan buaipui leh inrelbawlna hrang hrang atan Rs. 1,15,78,825/- sen ral a ni tawh, a ti a. Police Department hmalaknain heroin kg 11 leh gram 786, cheng nuai 290 chuang man hu leh methamphetamine mum 76400, cheng nuai 176 chuang man hu man a ni a. Ramri kana lak luh ramsa chi hrang hrang 500 vel lai man niin hengte hi District Wildlife Crime Control Unit kaltlangin Customs Preventive Force hnenah hlan a ni, a ti bawk.
School Education Minister chuan District Education Office Building thar, cheng nuai 200 senga sak luahfel a nih thu leh DIET Building vertical extension khawih mek a nih thu te, Girls’ Hostel tur pawh sak tan mek a nih thute a sawi a. Sawrkar leh private school-ah Myanmar rambuai avanga raltlan naupang 2064 zet admit an ni a, a remchan dan angin zirlaibu leh an mamawh dang ngaihtuahsak thin an ni a, Sikul naupang mamawh zirlaibu leh uniform-te chu sawrkar enkawl primary leh middle school zawng zawngah pek a ni a, sikul zawng zawngah library tihchangtlun nan lehkhabu eng emaw zat pek a nih thu a sawi a. Independence day puala State Level hnathawk tha chawimawite zingah School Education Department hnuaiah Zirtirtu tha chawimawina Mizoram State Teachers' Award dawng zingah Champhai District atangin Pu F.Lalramliana, Headmaster, Govt. Zawlsei M/S a tel chu chhuanawm tiin, midangte tana chona leh entawn nise a duh thu a sawi bawk.
LESDE Minister ni bawk chuan Covid-19 hrileng kara a enkawl Labour, Employment, Skill Development and Entrepreneurship Department kaltlanga hmalaknate tarlangin, hnathawktute chhawmdawl nan Welfare Board chuan Active member-te hnenah Rs 3,000/- theuh Direct Benefit Transfer hmangin an account-ah tanpuina a sem a, hemi atan hian Rs 15,82,41,000 (Vaibelchhe sawmpanga, nuai sawmriat pahnih, singli leh sangkhat) sem chhuah a ni a. Food, Civil Supplies & Consumers Affairs Department kaltlangin thlakhat ration member-te hnenah sem a ni bawk a, hemi atan hian Rs 6,40,67,820 (Vaibelchhe ruk, nuai sawmli, singruk sangsarih, zariat leh sawmhnih) sen ral a ni bawk a. Membe-te Covid kai leh Covid vanga thihna tuarte tan Covid-19 Special Package siam sak niin, mi 1428 (Death-3, Medical-1425) te hnenah Rs 2,87,01,000 (Vaibelchhe hnih, nuai sawmriat pasarih leh sangkhat) pekchhuah a ni, a ti a. Ministry of Skill Development and Entrepreneurship hnuaia PMKVY kaltlangin Covid Warrior atan Champhai District-ah thalai mi 120 te Home Health Aide (HAA) bikah trained chhuah niin, tangkai taka chhawr leh hman an ni a, tunah hian last batch-te chuan District Hospital Champhai-ah training an nei mek a, September thla a chhuak thei tura beisei an ni, a ti bawk.
Khuallian chuan Sawrkar flagship programme Socio-Economic Development Policy kaltlangin assembly constituency 3 (East Tuipui, Champhai North leh Champhai South) hnuaia khaw 68 atangin a thawh khatna atan beneficiary 4500 hming thehluh tawh a nih thu a tarlang a. District Hospital Champhai-ah PM Cares Fund atangin PSA Oxygen Generating Plant (500 LPM) bunfel a nih thu leh Covid-19 hripui leng mek dona kawngah leh damlote enkawl chungchangah District Hospital Champhai chuan Health & Family Welfare Department, Government of Mizoram atangin hnathawh that avanga chawimawina ‘Certificate of Appreciation’ a dawn thu te, ‘Ayushman Bharat Pradhan Mantri Jan Arogya Yojana’ (AB-PMJAY) hnuaiah bill bawhzui tha ‘Certificate of Recognition’ a dawn thute a sawi a. DCSO bial chhungah Aadhaar Seeding za zela 94.95 tih zawh tawh a nih thu leh Khawbung-ah buhfai metric ton 200 dah theihna Godown thar peih fel a nih thu te, buhfai dinhmun a that thu leh mipui tana hlauhthawnna tur a awm loh thute a sawi bawk.
School Education Minister Pu Lalchhandama Ralte chuan hrileng karah hmasawnna rahbi zawh tura thawhhona tha tak chhawmnun zel a tul thu sawiin, India ram zalennain kum 75 a pumhlumna ni chhinchhiahtlak takah hian ram tan enge ka tih ang tih rilru pu a ngaihtuahna hrisel seng theuh turin mipuite a chah a ni.
Vawiin Independence Day 2022 March-Past hi Overall Commander Sub-Inspector Joseph Vanlalauva leh 2nd Commander Sub-Inspector M. Hunter Hnamte ten kaihruaiin, contingent 18 zingah hian Armed Contingent 1, Unarmed Contingent 7 leh School Contingent 10 te an tel a. Parade entir zingah hian school contingent-te atangin a titha pathum thlanchhuah niin, Bethel Mission School Contingent chu pakhatna an ni a, Govt. Champhai High School Contingent chu pahnihna niin, pathumna chu Govt. GM Higher Secondary School Contingent-te an ni a. Parade contingent zawng zawngte lawmpuina thilpek hlan niin, he hunah hian Independence day puala infiamna hrang hranga tithate hnenah lawmman sem chhuah a ni bawk.
Covid-19 hri len hnua khawtlang huapa Independence day lawmna neih leh hmasak berah hian District Bawrhsap Pu James Lalrinchhana, SP Pu Lalrinpuia Varte, Sawrkar hnathawk, sawm bik hrang hrang bakah, Zirlai leh khawtlang mipuite an tel thain an hlut hle a. Independence day lawmna hun Chhangphut Field-a neih zawh hnu hian Independence Day Chief Guest hovin official leh mi sawm bikte tan DC Bungalow Jericho Garden, Keifangtlangah ‘VIP’s At Home’ function neih a ni.
- DIPR
Post a Comment
He post chungchanga i ngaihdan lo sawi ve rawh: