Ticker

10/recent/ticker-posts

Hmeichhe nau paw lai sawisak lai video thehdarh chungchangah Mizoram State Commission for Women chuan MSCW Case (Suo moto) ziak lut

Aizawl | Aug 16, 2022: Tun hnaia mipa pakhatin hmeichhe nau paw lai nia lang a sawisa lai video social media a thehdarh chungchangah Mizoram State Commission for Women chuan MSCW Case (Suo moto) No. 45/2022 a ziak lut a. A hnuai a mi ang hian August ni 16, 2022 khan order a tichhuak.

1. 15th August, 2022 khan social media-ah mipa pakhatin hmeichhe pakhat nau paw lai nia lang chu a sawisa lai video, second 30 vel bawra sei chu vawrh darh a ni a (Video lanna pendrive pawh case record-ah dah tel a ni). Chu video atanga a lan dan chuan mipa pakhat T-shirt pawl ban bul leh kekawr tlawn ha hian In chhungah hmeichhe nau paw lai chu sawisain chhuata nau paw chunga hmeichhe let reng chu mipa chuan a pet a, a nau puak lai nena hnuk sawn bawkin hmeichhia chu a tlawh leh zawt a, mipa chuan duh tawk mai lovin a bula thingfak chuan hmeichhia, naute nu ni ngeia hriat chu a vaw zui bawk a, naupang tap rawng rawng thawm hriat tur a awm bawk. Video-ah chuan Mizo tawng an hmang a, chu vang chuan he thil thleng hi Mizoram chhung ngeia thleng nia ngaih theih a ni. He video-a lang chin bakah hian thil tam tak, hmeichhia leh naupang/nausen chungah hian kut inthlakna leh hleilenna dang a thleng ngeia ngaih theih a ni.

2. Hetianga insawisak thleng hi Mizoram State Commission for Women (Commission tia sawi zui a ni ang) chuan a ngai thu tak hle a, Clause (d) of Sub-section (1) of Section 10 of Mizoram State Commission for Women Act, 2004 chuan hetiang hian Commission thuneihna a sawi:- “(d) to look into complaints and take suo moto notice of matters relating to- (i) deprivation of women’s right; (ii) non-implementation of laws enacted to provide protection to women and also to achieve the objective of equality and development; (ii) non-compliance of policy decisions, guidelines or instructions aimed at mitigating hardships and ensuring welfare and providing relief to women; and to take up the issues arising out of such matters with appropriate authorities;

3. Ngun taka thil awm dan thlir a nih hnuin video lo lang hmeichhe nau paw lakah hian hmeichhe zahawmna leh dikna chanvo tihbawrhbanna nasa tak a thleng ngei niin Commission chuan a ngai a, nunrawng taka kut inthlakna- pet, tlawh leh thingfaka vuakna thleng nia video-a langte, naupang pawi sawi lo chunga tawrhna thleng nia lang te hi rang taka chhui chian ngai niin Commission chuan a hria a, chu vang chuan a chunga tarlan tak angin Commission hian suo moto cognizance lak ngei theihna tur case niin a hria a, MSCW Case (Suo moto) Case No. 45/ 2022 a ziak lut ta a ni.

4. He case-ah hian thubuai chhuitu lam atangin Director General of Police, Mizoram chu Opposite Party No. 1 atana ziah luh niin Protection of Women From Domestic Violence Act, 2005 chungchanga mawhphurhna latu Department i.e. Women & Child Development Dept., Govt. of Mizoram aiawhin Director chu Opposite Party No. 2 atana ziah luh a ni bawk.

5. He video-a lo lang hi rang taka chhui chian a nih theih nan leh a tak ngeia thleng a lo nih chuan pawikhawihtu hi a rang thei ang bera man a, dan anga hremna pek a nih ngei theih nan theihtawp chhuaha hma la turin Commission chuan State Police-te a beisei a, Director General of Police (DGP), Mizoram, Opposite Party No. 1 chu a tul anga rang taka hma la turina Commission chuan a hriattir a, Police te hmalakna thlen chin kimchang hi he Order tihchhuah a nih atanga ni sarih (7) chhungin Commission hi ziaka rawn hriattir turin DGP chu beisei a ni a, he video-a lo lang hmeichhia leh a fa chunga hliam leh na tawrhna thleng a awm a nih chuan an nufa dinhmun kimchang leh an hliam tawrhte enkawl zui a nih dan kimchang chu Commission hnena report pek turah hian tel tura beisei a ni bawk.

6. Hetianga pawikhawihna hi hmeichhe chunga a thlen nawn tawh loh nan sawrkara thuneitu hrang hrangte chu anmahni zawn theuhah theihtawp chhuaha hma la turin Commission chuan a beisei bawk a. A bik takin The Protection of Women From Domestic Violence Act, 2005 hnuaia Protection Officer leh Service Provider zawng zawngte pawh anmahni huam chhung theuhah Inchhungkhura hmeichhe chunga hleilenna thleng palh thei veng tur leh chutiang thil a lo thleng a nih chuan dan anga rang taka hma lak zui a nih theih nan theihtawp chhuaha hma la turin Commission chuan a beisei a, a theih chin chinah Protection Officer leh Service Provider te chu khawtlang hruaitu heng- Local Council/Village Council te, Young Mizo Association (YMA) te leh Mizo Hmeichhe Insuihkhawm Pawl (MHIP) te nena mumal zawka thawhho dan kawng zawng a, Inchhungkhura hmeichhe chunga hleilenna thleng palh thei ven a nih theih nana thahnemngai taka thawk turin Commission chuan a beisei tlat a ni.

7. Director, Women & Child Development Dept., Govt. of Mizoram, Opposite Party No. 2 pawh The Protection of Women From Domestic Violence Act, 2005 hnuaia mawhphurtu (stakeholder) te thuam chak a, District tinah mumal taka a function theih nan hma lak ngai ang ang te vilzui nghal turin a beisei bawk a, Mizoram chhung District tina Protection Officer leh Service Provider te function mek dan kimchang leh harsatna an tawh mek nia lang te bakah chung Protection Officer leh Service Provider ni mekte hming leh phone number kimchang chu he order tihchhuah a nih atanga ni sarih (7) chhunga Commission hnena ziaka hriattir turin Director, Women & Child Development chu beisei a ni bawk.

8. Tin, hetianga hmeichhe chunga hleilenna a thlen changin, a chhan chu eng pawh lo ni se, a bulhnaia lo awm mi tu pawhin pawikhawihna nasa zawk a thlen loh nan rang taka hma la nghal zel turin Commission chuan Zoram mipuite a ngen a, hmeichhe awm nem zawk, hleilenna tuartute hi thlir liam mai lova an kiang hnaia awmten lo chhan vat zel tur leh pawikhawihna thleng reng reng chu thuneitute hnenah rang taka hriattir nghal vat turin mi tinte beisei kan ni bawk. Tin, Women Commission Phone Number 0389-2335505 ah hian office hun chhung chuan hmeichhe chunga pawikhawihna leh hleilenna thleng reng reng chu hriattir zel theih a ni bawk a, Women Helpline (Ph. No. 0389-2311271 & Toll Free No. 181) ah emaw, Women Police Station (Ph. No. 0389-2310585) ah te pawh hian hriattir vat ni thei se tih hi Commission duh dan a ni.

9. Tin, he video hmuh nuam lo tak hi social media-a tarlan zui zel a nih loh nan he video kawltu zawng zawng, sawrkar thuneitute tih loh chuan lo delete hram turin kan inngen bawk e.

10. Kar khat hnuah he case hi ngaihtuah leh a ni ang.


- DIPR
Post i hmuh dan

Post a Comment

0 Comments